Ragi Java Recipe: బ్రేక్ఫాస్ట్కు టైమ్ లేదా? 10 నిమిషాల్లో శక్తినిచ్చే 'రాగి జావ'ను ఇలా తయారు చేసుకొండి!
ఈ వార్తాకథనం ఏంటి
ఈ రోజుల్లో చాలా మంది ఉరుకులు-పరుగుల జీవితం గడుపుతున్నారు. ఆఫీస్, కెరీర్ లక్ష్యాలు, బిజినెస్ ఒత్తిళ్లతో ఉదయం లేచినప్పటి నుంచే హడావుడి మొదలవుతుంది. ఈ గందరగోళంలో ఆనందం, ప్రశాంతత తగ్గిపోవడం, ఆరోగ్యకరమైన జీవనశైలి దూరమవడం సాధారణంగా మారింది. ముఖ్యంగా చాలామంది మార్నింగ్ టిఫిన్ను స్కిప్ చేయడం లేదా రోడ్డు మీద దొరికే నాణ్యత లేని అల్పాహారాన్ని ఆశ్రయించడం చూస్తూనే ఉన్నాం. టిఫిన్ తయారికి సమయం లేకపోవడమే దీనికి ప్రధాన కారణం. ఈ సమస్యలకు ఒక సరళమైన, ఆరోగ్యకరమైన పరిష్కారం ఉంది. ఇంట్లోనే కేవలం 10 నిమిషాల్లో తయారయ్యే పోషకమైన అల్పాహారం ఏదంటే - రాగి జావ. ఉదయం తొందరగా తయారై ఆరోగ్యానికి మేలు చేసే ఆహారంగా రాగి జావ చాలా మంచి ఎంపిక.
Details
అందరికీ సురక్షితమైన ఆహారం
మన దగ్గర సాధారణంగా రాగి అని పిలిచే ఈ ధాన్యం చిన్నదిగా కనిపించినా, ఇందులో పోషక విలువలు మాత్రం చాలా ఎక్కువ. రాగిని ఫింగర్ మిల్లెట్ అని కూడా అంటారు. ఇందులో గ్లూటెన్ ఉండదు, కాబట్టి చిన్న పిల్లల నుంచి పెద్దవాళ్ల వరకు అందరికీ ఇది సురక్షితమైన ఆహారం. అందుకే రాగిని ఇప్పుడు చాలామంది 'సూపర్ ఫుడ్'గా గుర్తిస్తున్నారు. సాధారణంగా రాగి జావ తయారీకి రాగిని నీటిలో నానబెట్టి, మొలకెత్తించి, ఆరబెట్టి పొడిగా తయారు చేస్తారు. కానీ ప్రస్తుతం మార్కెట్లో లభించే సాధారణ రాగి పిండితోనే చాలా సులభంగా, ఆరోగ్యకరంగా జావ చేయవచ్చు. ఇంట్లో తయారుచేసిన పిండికీ, బయట దొరికే పిండికీ పెద్దగా తేడా ఉండదు.
Details
ఉదయాన్నే తీసుకుంటే బాగుంటుంది
రాగి జావను రెండు విధాలుగా తయారు చేయవచ్చు - ఒకటి ఉప్పుగా, మరొకటి తీపిగా. వీటిలో తీపి రాగి జావ చాలామందికి ఇష్టమైన అల్పాహారం. ఇది చూడటానికి పుడ్డింగ్లా ఉంటుంది. గట్టిగా ఉన్నా, నోట్లోకి వెళ్లగానే మృదువుగా అనిపిస్తుంది. తేలికపాటి తీపి రుచి ఉండటంతో ఉదయాన్నే తినడానికి చాలా బాగుంటుంది. పైగా కొద్దిగా తరిగిన బాదం పప్పు వేస్తే క్రంచీ టచ్ కూడా వస్తుంది. ముఖ్యంగా ఈ రెసిపీ కేవలం ఐదు పదార్థాలతో 10-15 నిమిషాల్లోనే తయారవుతుంది.
Details
రాగి జావకు కావలసిన పదార్థాలు
రాగి పిండి - 2 టేబుల్ స్పూన్లు నీరు - 1 కప్పు పాలు - 1 కప్పు బెల్లం - 1 టేబుల్ స్పూన్ తరిగిన బాదం పప్పు - కొద్దిగా
Details
తయారీ విధానం
ముందుగా ఒక గిన్నెలో రాగి పిండిని తీసుకుని అందులో నీరు పోసి ముద్దలు లేకుండా బాగా కలపాలి. విస్క్తో లేదా చెంచాతో బాగా కలిపిన తర్వాత ఈ మిశ్రమాన్ని పాత్రలోకి తీసుకుని స్టవ్పై పెట్టాలి. మధ్యస్థ మంటపై నిరంతరం కలుపుతూ ఉడికించాలి. తర్వాత బెల్లం వేసి బాగా కలపాలి. బెల్లం కరిగే కొద్దీ మిశ్రమం రంగు మారి కాస్త మెరుస్తూ కనిపిస్తుంది. మిశ్రమం చిక్కబడటం మొదలైన తర్వాత మంటను కొంచెం తగ్గించాలి. ఇప్పుడు మెల్లగా పాలను పోస్తూ ఆపకుండా కలుపుతూ ఉండాలి. ఇలా చేస్తే ముద్దలుగా మారదు.
Details
తయారీ విధానం1/2
కొద్దిసేపటికి పాలు మరిగి మిశ్రమం మరింత గట్టిగా మారుతుంది. ఈ దశలో తరిగిన బాదం పప్పు వేయాలి. కావాలంటే కొద్దిగా యాలకుల పొడిని కూడా కలుపుకోవచ్చు. రెండు నిమిషాలు మరిగిన తర్వాత మంట ఆపేయాలి. ఇప్పుడు రాగి జావను మరో గిన్నెలోకి తీసుకుని మెల్లగా కలిపితే సిద్ధం. వేడి వేడిగా ఉన్నప్పుడే తాగితే అత్యంత రుచిగా ఉంటుంది. చల్లారితే ఇది ఇంకా చిక్కగా మారుతుందని గుర్తుంచుకోవాలి. తొందరపాటు జీవితంలోనూ ఆరోగ్యాన్ని పట్టించుకోవాలంటే, ఈ 10 నిమిషాల రాగి జావ అల్పాహారం మీ రోజుకు మంచి ఆరంభం ఇస్తుంది.