రంజాన్ 2023: విశేషాలు, ఆచారాలు, ఉపవాస నియమాలు
రంజాన్ లేదా రమదాన్.. ప్రపంచ వ్యాప్తంగా ముస్లింలు జరుపుకునే పవిత్రమైన పండగ. రంజాన్ మాసం వచ్చేస్తోంది. ఈ నేపథ్యంలో రంజాన్ విశేషాలు తెలుసుకుందాం. మార్చ్ 22 నుండి ఏప్రిల్ 21వరకు రంజాన్ మాసం ఇస్లామిక్ క్యాలెండర్ ప్రకారం, ఈ నెల 22వ తేదీ నుండి రంజాన్ మాసం ప్రారంభమవుతుంది. ఇస్లామిక్ క్యాలెండర్ లో 9వ నెలగా రంజాన్ నెల ఉంటుంది. ఇస్లాం మతస్తులు నమ్మే దాని ప్రకారం, స్వర్గలోక ద్వారాలు ఈ నెలంతా తెరిచే ఉంటాయి. నరక లోక ద్వారాలు మూసి ఉంటాయి. ఇంకా దుష్టశక్తులు బంధించబడి ఉంటాయి. ఈ నెలలో సూర్యుడు రాకముందే అన్నం తినేస్తారు, ఆ తర్వాత రోజు మొత్తం ఉపవాసం ఉండీ, సూర్యుడు అస్తమించాక భోజనం చేస్తారు.
ఉపవాస నియమాలు, మినహాయింపులు
సూర్యుడు రాకముందే తినే భోజనాన్ని సుహూర్ లేదా సేహ్రి అనీ, సూర్యుడు అస్తమించాక చేసే భోజనాన్ని ఇఫ్తార్ అని అంటారు. ఈ నెలలో ముస్లింలు అందరూ దానధర్మాలు చేస్తుంటారు. తమ మానవత్వాన్ని చూపించే కార్యక్రమాల్లో పాల్గొంటారు. ఉపవాస నియమాలు: సూర్యోదయం అయ్యాక అన్నం, నీళ్ళు, ఏవీ తీసుకోరాదు. అలాగే నెలరోజుల పాటు భాగస్వామితో భౌతికంగా దూరం ఉండాలి. ఉపవాసానికి మినహాయింపు ఎవరికి ఉంటుందంటే యుక్తవయసు రాని పిల్లలకు, గర్భిణీ స్త్రీలు, పాలిచ్చే తల్లులు, దీర్ఘకాల వ్యాధులతో బాధపడేవారు, ముసలివాళ్ళు, ప్రయాణాలు ఎక్కువగా చేసేవాళ్ళు ఉపవాసంఉండాల్సిన అవసరం లేదు. రంజాన్ నెలలో చివరగా ఈద్ ఉల్ ఫితర్ జరుపుకుంటారు. నిజానికి ఈ రోజుతో కొత్త నెల షవ్వాల్ ప్రారంభమవుతుంది.
