Nagula Chavithi: నాగుల చవితి ప్రత్యేకత.. పుట్టలో పాలు పోయడం వెనుక అద్భుత రహస్యమిదే!
ఈ వార్తాకథనం ఏంటి
భక్తి, విశ్వాసాలతో జరుపుకునే ప్రముఖ పండుగల్లో నాగుల చవితి ఒకటి. కార్తీక మాసంలో వచ్చే ఈ పండుగకు ప్రత్యేక ఆధ్యాత్మిక ప్రాధాన్యత ఉంది. ఈ సంవత్సరం నాగుల చవితి అక్టోబర్‌ 25న కార్తీక శుద్ధ చవితి రోజున జరుపుకుంటున్నారు. ఈ రోజు భక్తులు పాములను పూజించడం ఆనవాయితీగా కొనసాగుతోంది. నాగుల చవితి రోజున నాగ దేవతను పూజిస్తే కుజ దోషం, కాలసర్ప దోషం, కళత్ర దోషం వంటి అనేక దోషాలు తొలగిపోతాయని పురాణాలు చెబుతున్నాయి. ఈ రోజు తమకు సమీపంలోని దేవాలయాల్లో లేదా పాముల పుట్టల వద్ద భక్తులు పాలు పోయడం అనేది యుగాలుగా కొనసాగుతున్న ఆచారం. పుట్టనే సుబ్రహ్మణ్యస్వామి రూపంగా భావించి చలిమిడి, చిమ్మిలి, కొబ్బరికాయ, అరటిపండ్లు వంటి నైవేద్యాలను సమర్పిస్తారు.
Details
దేవత పట్ల అపారమైన భక్తి కారణం
అయితే, నాగుల చవితి రోజున పాముల పుట్టలో పాలు పోయడం వెనక ఒక ఆధ్యాత్మిక రహస్యమూ ఉంది. మనం విగ్రహానికి నైవేద్యం సమర్పించినప్పుడు దేవుడు ఆ ప్రసాదాన్ని కాకుండా మన భక్తి, ప్రేమను స్వీకరిస్తాడని శాస్త్రాలు చెబుతాయి. అదే విధంగా, నాగుల చవితి రోజున పుట్టలో పోసిన పాలను పాములు తాగకపోయినా, భక్తుల ఆ భక్తి చూసి నాగ దేవత సంతోషిస్తుందని నమ్మకం. దీని ఫలితంగా నాగ దేవత భక్తులను సకల శుభాలతో, ఆరోగ్యం, ఐశ్వర్యంతో దీవిస్తుందనే విశ్వాసం ఉంది. అంతిమంగా చెప్పాలంటే — పుట్టలో పాలు పోయడం వెనక ఉన్న అసలు అర్థం, దేవత పట్ల మన అపారమైన భక్తిని, శ్రద్ధను వ్యక్తం చేయడమే.