Coconut Oil in Winter: చలికాలంలో నూనె గడ్డకట్టడానికి కారణం ఇదే!
ఈ వార్తాకథనం ఏంటి
శీతాకాలం మొదలయ్యే సరికి ఉదయం-సాయంత్రం వేళల్లో చలి తీవ్రత ఎక్కువగా ఉంటుంది. ఈ సమయంలో ఎక్కువ మందిని ఇబ్బందిపెట్టే విషయం కొబ్బరి నూనె గడ్డకట్టడమే. బాటిల్‌ను తెరిచినప్పుడు ద్రవంగా రావాల్సిన నూనె తెల్లగా గడ్డ కట్టి కనిపిస్తుంది. ప్లాస్టిక్, గాజు — ఏ పాత్రలో పెట్టినా ఇదే పరిస్థితి. కానీ ఇదే సమయంలో ఇతర నూనెలు అలాగే ద్రవ రూపంలో ఉండటం ఆశ్చర్యంగా అనిపిస్తుంది. మరి శీతాకాలంలో కొబ్బరి నూనె ఎందుకు ఇంత త్వరగా ఘనీభవిస్తుంది?
Details
సంతృప్త కొవ్వు వల్లే గడ్డకట్టే కొబ్బరి నూనె
కొబ్బరి నూనెలో సుమారు 90% సంతృప్త కొవ్వులు (సాచురేటెడ్ ఫ్యాట్స్) ఉంటాయి. వీటి అణు నిర్మాణం సూటిగా సరళ రేఖలా ఉంటుంది. చల్లని వాతావరణం రావడంతో ఈ అణువులు దగ్గరకు చేరి ఒకదానికొకటి బంధం ఏర్పరుచుకుంటాయి. దీంతో కొబ్బరి నూనె ద్రవం నుండి ఘనపదార్థంలా మారి గడ్డకడుతుంది. ఇతర నూనెలు ఎందుకు గడ్డకట్టవు? ఎందుకంటే అవి ఎక్కువగా అసంతృప్త కొవ్వులను కలిగి ఉంటాయి. వాటి అణు నిర్మాణం వంకర్లు-బంకర్లుగా ఉండటం వల్ల చల్లని వాతావరణంలో కూడా అణువులు గడ్డకట్టేలా దగ్గరకు రావు. కొబ్బరి నూనె ఘనీభవన స్థానం ఎక్కువ కొబ్బరి నూనె ఘనీభవించే ఉష్ణోగ్రత **24-25°C**. అందుకే తక్కువ చలి వచ్చినా బాటిల్‌లోని నూనె వెంటనే గడ్డకడుతుంది.
Details
చలికాలంలో కొబ్బరి నూనెను ఎలా ఉపయోగించాలి?
సన్నని బాటిల్‌కు బదులుగా వెడల్పైన బాటిల్ వాడితే నూనె తీసుకోవడం సులభం. బాటిల్‌ను స్వల్పంగా వెచ్చని నీటిలో పెట్టితే లేదా గ్యాస్ మంటకు కొంచెం దూరంగా పట్టుకుంటే నూనె వెంటనే కరిగిపోతుంది. కొబ్బరి నూనెలో కొద్దిగా నువ్వుల నూనె లేదా బాదం నూనె కలిపితే గడ్డకట్టే వేగం తగ్గుతుంది. బాటిల్‌ను బయట ఉంచకుండా గాలి చొరబడని డబ్బాలో పెట్టితే నూనె త్వరగా ఘనీభవించదు. చలికాలంలో కొబ్బరి నూనె గడ్డకట్టడం సహజమైన ప్రక్రియ. అయితే పై సూచనలు పాటిస్తే దాన్ని సులభంగా వినియోగించుకోవచ్చు.