డబ్బును అర్థం చేసుకుని ఆర్థికంగా నిలదొక్కుకోవాలన్న ఆశ మీకుంటే ఈ పుస్తకాలు చదవండి
డబ్బు సంపాదించడం ఒక ఎత్తయితే దాన్ని సరిగా నిర్వహించడం మరొక ఎత్తు. నువ్వు సంపాదించినంతా ఖర్చు అవుతుంటే నీకు డబ్బు మీద సరైన అవగాహన లేదన్నమాట. అసలు డబ్బును ఎలా ఖర్చు పెట్టాలి? ఎలా సంపాదించాలి? అనే అంశాలు తెలుసుకుని ఆర్థికంగా నిలదొక్కుకోవడానికి డబ్బును సరిగ్గా అర్థం చేసుకోవాలి. అలా అర్థం చేయించే పుస్తకాలేంటో చూద్దాం. సైకాలజీ ఆఫ్ మనీ - మోర్గాన్ హౌసెల్: ఈ పుస్తకంలో డబ్బును ఎలా ఖర్చు చేయాలో చెప్పే లెక్కలు, సూత్రాలు ఉండవు. డబ్బు పట్ల మీ ప్రవర్తన, ప్రపంచాన్ని మీరు చూసే విధానం, గతంలోని మీ ఫైనాన్షియల్ స్టేటస్ మొదలగు వాటి గురించి ఉంటుంది. డబ్బు మనస్తత్వాన్ని ఈ పుస్తకం పూర్తిగా అర్థం చేయిస్తుంది.
రిటైర్మెంట్ ప్లాన్ కోసం ఉపయోగపడే పుస్తకం
స్పెండ్ వెల్, లివ్ రిచ్ - మిషెల్లీ సింగ్లెటరీ: ఈ పుస్తకంలో రచయిత, ఐదుగురు పిల్లలను అతి తక్కువ సంపాదనతో పెంచిన తన అమ్మమ్మ కథను చెబుతుంది. పిల్లల పోషణ కోసం డబ్బును అమ్మమ్మ ఎలా ఉపయోగించిందనే విషయాలను తెలుపుతుంది. అమ్మమ్మ పాటించిన చిట్కాలు మీకు ఉపయోగపడతాయి. రిటైర్ బిఫోర్ మామ్ అండ్ డాడ్ - రాబ్ బర్జర్: తొందరగా రిటైర్ అవ్వాలని ప్రతీ ఒక్కరికీ ఉంటుంది. కానీ రిటైర్ అయ్యాక తగినంత డబ్బు లేకపోతే అనేక సమస్యలు వస్తాయి. ఈ పుస్తకంలో రిటైర్మెంట్ ప్లాన్ కోసం ఏం చేయాలనేది రచయిత చెబుతాడు. రిటైర్ అయ్యాక డబ్బు గురించి చింత లేకుండా ఎలా గడపవచ్చో, గడపలాంటే ఏం చేయాలో రచయిత సూచిస్తాడు.