Asteroid: భూమి వైపు దూసుకొస్తున్న 3,300 అడుగుల భారీ గ్రహశకలం.. ఢీకొట్టే ప్రమాదం ఉందా?
ఈ వార్తాకథనం ఏంటి
భూమి వైపు దూసుకొస్తున్న దాదాపు 3,300 అడుగుల పరిమాణం ఉన్న భారీ గ్రహశకలం ఇప్పుడు శాస్త్రవేత్తల దృష్టిని ఆకర్షిస్తోంది. అయితే ఇది భూమిని ఢీకొట్టే ప్రమాదం ఉందా అనే ప్రశ్న చాలా మందిలో ఆసక్తిని రేకెత్తిస్తోంది. సుమారు ఒక కిలోమీటర్ లేదా 3,300 అడుగుల పరిమాణం కలిగిన 1997 NC1 అనే గ్రహశకలం జూన్ 27న భూమికి సమీపంగా ప్రయాణించనుంది. గత నాలుగేళ్లలో ఇంత పెద్ద పరిమాణం గల గ్రహశకలం భూమికి దగ్గరగా రావడం ఇదే తొలిసారి. ఈ గ్రహశకలాన్ని హవాయిలోని హలేకాలాలో ఉన్న ఎర్త్ ఆస్టరాయిడ్ ట్రాకింగ్ వ్యవస్థ గుర్తించింది. ప్రస్తుతం ఇది గంటకు 32,000 కిలోమీటర్ల వేగంతో ప్రయాణిస్తోంది.
వివరాలు
ప్రపంచవ్యాప్తంగా సంచలనం..
ఇంత పెద్ద అంతరిక్ష శిలాఖండం చివరిసారిగా 2022 జనవరిలో భూమికి సమీపంగా వచ్చింది. అప్పట్లో 1994 PC1 అనే గ్రహశకలం, 1997 NC1తో దాదాపు సమాన పరిమాణంలో ఉండి, భూమికి 19.8 లక్షల కిలోమీటర్ల దూరంలో నుంచి దూసుకెళ్లింది. ఇక 1997 NC1 గ్రహశకలం భూమికి అత్యంత సమీపంగా వచ్చినప్పుడు కూడా సుమారు 24 లక్షల కిలోమీటర్ల దూరంలోనే ఉంటుంది. ఇది భూమి కక్ష్యను దాటే అటెన్ (Aten) రకం గ్రహశకలంగా శాస్త్రవేత్తలు పేర్కొంటున్నారు. 2013లో రష్యా మీదుగా పేలిన చెల్యాబిన్స్క్ ఉల్క ఘటన ప్రపంచవ్యాప్తంగా సంచలనం సృష్టించింది. ఆ ఉల్క 1997 NC1 కంటే 50 నుంచి 60 రెట్లు చిన్నదైనా భారీ విధ్వంసాన్ని సృష్టించింది.
వివరాలు
శాస్త్రవేత్తల హెచ్చరిక..
గంటకు 32,000 కిలోమీటర్ల వేగంతో భూమిని ఢీకొంటే, సుమారు 10 నుంచి 15 కిలోమీటర్ల వెడల్పు, 1.6 కిలోమీటర్ల లోతు ఉన్న భారీ గుంత ఏర్పడవచ్చు. ఢీకొన్న వెంటనే గ్రహశకలం, అలాగే అది పడిన ప్రాంతం ఆవిరైపోయే పరిస్థితి ఏర్పడుతుంది. ప్రభావ ప్రాంతం చుట్టుపక్కల ఉన్న భవనాలు నేలమట్టమవుతాయి. వందల కిలోమీటర్ల మేర భూభాగ స్వరూపమే మారిపోయే అవకాశం ఉంటుంది. ఢీకొన్న తర్వాత గాల్లోకి ఎగిసే రాళ్లు, ధూళి కారణంగా సూర్యకాంతి నెలల తరబడి అడ్డంకులకు గురయ్యే ప్రమాదం కూడా ఉందని శాస్త్రవేత్తలు హెచ్చరిస్తున్నారు.