Loading...
Super Hot Rock Geothermal Energy:ఏఐ డేటా సెంటర్లకు కొత్త విద్యుత్ వనరు.. సూపర్‌హాట్ రాక్ ఎనర్జీతో గూగుల్ భారీ డీల్!
ఏఐ డేటా సెంటర్లకు కొత్త విద్యుత్ వనరు.. సూపర్‌హాట్ రాక్ ఎనర్జీతో గూగుల్ భారీ డీల్!

Super Hot Rock Geothermal Energy:ఏఐ డేటా సెంటర్లకు కొత్త విద్యుత్ వనరు.. సూపర్‌హాట్ రాక్ ఎనర్జీతో గూగుల్ భారీ డీల్!

వ్రాసిన వారు Jayachandra Akuri
Nov 21, 2026
01:24 pm

ఈ వార్తాకథనం ఏంటి

ఆర్టిఫిషియల్ ఇంటెలిజెన్స్ (AI) రంగం వేగంగా విస్తరిస్తుండటంతో డేటా సెంటర్లకు విద్యుత్ అవసరం భారీగా పెరుగుతోంది. ఈ నేపథ్యంలో వాటికి నిరంతర విద్యుత్ సరఫరా చేయగల ప్రత్యామ్నాయ ఇంధన వనరుగా సూపర్‌హాట్ రాక్ జియోథర్మల్ ఎనర్జీ (Super-hot Rock Geothermal Energy) ప్రాధాన్యం సంతరించుకుంటోంది. ఈ సాంకేతికత సంప్రదాయ భూఉష్ణ విద్యుత్ ఉత్పత్తి విధానాలకు ఆధునిక డ్రిల్లింగ్ పద్ధతులను జోడిస్తుంది. చమురు, సహజ వాయువు పరిశ్రమల్లో ఉపయోగించే అధునాతన డ్రిల్లింగ్ సాంకేతికతలను ఇందులో వినియోగిస్తున్నారు. అమెరికాలో ఈ విధానం ద్వారా సుమారు 57 టెరావాట్ల విద్యుత్ ఉత్పత్తి సామర్థ్యం ఉందని అంచనా. రానున్న రోజుల్లో ఏర్పాటు కానున్న ఏఐ డేటా సెంటర్ల విద్యుత్ అవసరాలను తీర్చడానికి ఇది సరిపోతుందని భావిస్తున్నారు.

వివరాలు

సూపర్‌హాట్ రాక్ జియోథర్మల్ ఎనర్జీ అంటే ఏమిటి?

భూమి లోతుల్లో ఉండే అత్యంత వేడైన రాళ్ల నుంచి ఉత్పత్తయ్యే ఉష్ణశక్తిని వినియోగించుకోవడమే సూపర్‌హాట్ రాక్ జియోథర్మల్ ఎనర్జీ.

భూమి అంతర్భాగంలోని వేడికి దగ్గరవుతున్న కొద్దీ ఉష్ణోగ్రత, పీడనం గణనీయంగా పెరుగుతాయి. ఈ పరిస్థితుల్లో సాధారణ నీరు సూపర్‌క్రిటికల్ ఫ్లూయిడ్‌గా మారుతుంది.

ఇది భారీ స్థాయిలో శక్తిని మోసుకెళ్లగలదు. ఈ సాంకేతికత ద్వారా ఒక సూపర్‌హాట్ రాక్ బావి నుంచే 15 మెగావాట్లు లేదా అంతకంటే ఎక్కువ విద్యుత్ ఉత్పత్తి చేయవచ్చని అంచనా.

అందుకే ఇంధన రంగంలో ఈ విధానం కీలక మార్పులకు దారితీయవచ్చని నిపుణులు భావిస్తున్నారు.

వివరాలు

సూపర్‌హాట్ రాక్ ఎనర్జీపై గూగుల్ ఆసక్తి

సూపర్‌హాట్ రాక్ జియోథర్మల్ ఎనర్జీపై పనిచేస్తున్న క్వైజ్ ఎనర్జీ (Quaise Energy) సంస్థతో గూగుల్ ఒప్పందం చేసుకుంది.

సెంట్రల్ ఒరెగాన్‌లో క్వైజ్ చేపడుతున్న ప్రాజెక్టు నుంచి 50 మెగావాట్ల విద్యుత్‌ను కొనుగోలు చేసేందుకు గూగుల్ 500 మిలియన్ డాలర్లకు పైగా చెల్లించనుంది.

ఈ ఒప్పందం సరికొత్త భూఉష్ణ విద్యుత్ సాంకేతికతకు వాణిజ్యపరమైన అవకాశాలు ఉన్నాయని సూచిస్తోంది.

భవిష్యత్తులో విద్యుత్ అవసరాలను తీర్చగల సంస్థలతో ముందుగానే ఒప్పందాలు చేసుకోవాలన్న గూగుల్ వ్యూహాన్ని కూడా ఇది వెల్లడిస్తోంది.

ADVERTISEMENT

వివరాలు

డ్రిల్లింగ్‌లో వినూత్న సాంకేతికతలు

సూపర్‌హాట్ రాళ్లను చేరుకునే క్రమంలో డ్రిల్లింగ్ పరికరాలు అధిక ఉష్ణోగ్రతలను తట్టుకోవడం ప్రధాన సవాలుగా మారుతోంది.

ఈ సమస్యకు మజామా ఎనర్జీ (Mazama Energy) సంస్థ ఓ పరిష్కారాన్ని అభివృద్ధి చేసింది. డ్రిల్లింగ్ సమయంలో బిట్స్‌ను చల్లగా ఉంచేందుకు సాధారణంగా ఉపయోగించే నీటి ఆధారిత డ్రిల్లింగ్ మడ్‌కు బదులుగా కార్బన్ డయాక్సైడ్‌ను వినియోగిస్తోంది.

అత్యంత లోతుల్లో, అధిక ఉష్ణోగ్రతల వద్ద ఈ కార్బన్ డయాక్సైడ్ సూపర్‌క్రిటికల్ స్థితికి చేరుకుంటుంది. తద్వారా గణనీయమైన శక్తిని నిల్వ చేసుకునే సామర్థ్యాన్ని కలిగి ఉంటుంది.

మరోవైపు సూపర్‌హాట్ రాళ్లు ఉండే లోతుల్లో విద్యుత్ ఉత్పత్తి వ్యవస్థల విశ్వసనీయతను మెరుగుపరిచేందుకు ఎక్స్‌జీఎస్ ఎనర్జీ (XGS Energy) సంస్థకు అమెరికా ఇంధన శాఖ (Department of Energy)గ్రాంట్ కూడా అందించింది.

ADVERTISEMENT

వివరాలు

టెక్నాలజీపై పెట్టుబడిదారుల భారీ ఆసక్తి

సూపర్‌హాట్ రాక్ జియోథర్మల్ ఎనర్జీ భవిష్యత్తుపై పెట్టుబడిదారులు ఆశాభావంతో ఉన్నారు. ఈ రంగంలో పనిచేస్తున్న క్వైజ్ ఎనర్జీ ఇప్పటివరకు 270 మిలియన్ డాలర్లకు పైగా పెట్టుబడులు సమీకరించింది.

ప్రీల్యూడ్ వెంచర్స్ (Prelude Ventures), కొలాబరేటివ్ ఫండ్ (Collaborative Fund) వంటి సంస్థలు ఇందులో పెట్టుబడులు పెట్టాయి.

వినోద్ ఖోస్లా ఏంజెల్ ఇన్వెస్టర్‌గా ఉన్నారు. మజామా ఎనర్జీ కూడా 171 మిలియన్ డాలర్ల నిధులను సమీకరించింది. ఖోస్లా వెంచర్స్ (Khosla Ventures), బిల్ గేట్స్ వంటి వారు ఈ సంస్థకు పెట్టుబడులు అందించారు.

ఈ భారీ ఆర్థిక మద్దతు సూపర్‌హాట్ రాక్ జియోథర్మల్ ఎనర్జీ భవిష్యత్తుపై పెట్టుబడిదారులకు ఉన్న నమ్మకాన్ని తెలియజేస్తోంది.

ADVERTISEMENT