Apple: ఆపిల్‌ ఎక్స్‌కోడ్‌కు చాట్‌జీపీటీ అనుసంధానం..!
ఈ వార్తాకథనం ఏంటి
ఆపిల్‌ తన వార్షిక వరల్డ్‌ వైడ్‌ డెవలపర్స్‌ కాన్ఫరెన్స్‌ (WWDC) 2025లో అనేక కీలక పరిణామాలను ప్రకటించింది.
ముఖ్యంగా, యాప్‌ల అభివృద్ధికి ఉపయోగించే ప్రధాన సాధనంగా ఉన్న ఎక్స్‌కోడ్‌ టూల్‌కు చాట్‌జీపీటీని అనుసంధానిస్తున్నట్లు వెల్లడించింది.
దీనివల్ల డెవలపర్లు ఆర్టిఫిషియల్‌ ఇంటెలిజెన్స్‌ సాయంతో కోడ్‌ను తయారు చేయడం, బగ్స్‌ను గుర్తించి పరిష్కరించడం, డాక్యుమెంటేషన్‌ తయారీ, యాప్‌ టెస్టింగ్‌ వంటి పనులను మరింత వేగంగా నిర్వహించగలగనున్నారు.
తాజాగా కంపెనీ విడుదల చేసిన ఎక్స్‌కోడ్‌ 26 వెర్షన్‌లో డెవలపర్లు ఇతర ఏఐ మోడల్స్‌ను కూడా ఏపీఐ కీ ద్వారా ప్లగ్‌ఇన్‌ చేసుకునే సౌలభ్యం కల్పించింది. ఇది కోడింగ్‌ ప్రక్రియను మరింత మెరుగ్గా, అనుకూలంగా మార్చనుంది.
వివరాలు
కొత్త ఫౌండేషన్‌ మోడల్స్‌ ఫ్రేమ్‌వర్క్‌
ఇప్పటికే ఆపిల్‌ చిప్‌లు ఉన్న పరికరాలను వాడుతున్నవారికి ప్రత్యేకంగా, ఇంటర్నెట్‌ అవసరం లేకుండానే ఏఐ మోడల్స్‌ను అమలుచేయగలిగే సామర్థ్యాన్ని ఆపిల్‌ అందిస్తోంది.
కేవలం మూడు లైన్ల కోడ్‌తో యూజర్లు ఆపిల్‌ ఎఐ టూల్స్‌ను వాడుకొనేలా,ఒక కొత్త ఫౌండేషన్‌ మోడల్స్‌ ఫ్రేమ్‌వర్క్‌ను ప్రవేశపెట్టింది.
ముఖ్యంగా, ఎక్స్‌కోడ్‌లో చాట్‌జీపీటీని ఉపయోగించాలంటే ఓపెన్‌ఏఐ ఖాతాలో లాగిన్‌ కావాల్సిన అవసరం ఉండదని స్పష్టం చేసింది.
అంతేకాకుండా, ఈ తాజా వెర్షన్‌లో నావిగేషన్‌ వ్యవస్థను మెరుగుపరచడంతో పాటు, యాప్‌లకు ట్రాన్స్‌లేషన్‌ సౌలభ్యం, వాయిస్‌ కంట్రోల్‌ పనితీరు మెరుగుదల వంటి ఎన్నో మార్పులు చోటుచేసుకున్నాయి.
వివరాలు
లిక్విడ్‌ గ్లాస్‌ డిజైన్‌ పరిచయం
ఈ కాన్ఫరెన్స్‌లో ఆపిల్‌ మరో ముఖ్యమైన మార్పును ప్రకటించింది.
ఐఫోన్‌, మ్యాక్‌, ఆపిల్‌ వాచ్‌ వంటి పరికరాల కోసం 'లిక్విడ్‌ గ్లాస్‌' అనే కొత్త డిజైన్‌ కాన్సెప్టును పరిచయం చేసింది.
ఈ డిజైన్‌ అన్ని డివైసులకూ ఒకే తరహా అనుభూతిని కలిగించేందుకు రూపొందించబడింది.
ఈ మార్పులు ఐఓఎస్‌, ఐపాడ్‌ ఓఎస్‌, మ్యాక్‌ ఓఎస్‌, వాచ్‌ ఓఎస్‌ వేదికలపై ఒకేసారి అమలులోకి రానున్నాయి.
గతంగా ఆపిల్‌ డిజైన్‌లో వచ్చిన కీలక మార్పు ఐఓఎస్‌ 7 సమయంలో చోటు చేసుకుంది.
వివరాలు
వినియోగదారుల కంటెంట్‌కు అనుగుణంగా మార్పు
ఈ సందర్భంగా, ఆపిల్‌ డిజైన్‌ విభాగం వైస్‌ ప్రెసిడెంట్‌ అలాన్‌ డై మాట్లాడుతూ.. ''ఈరోజు మా సంస్థ నుంచి ఎంతో ప్రాముఖ్యత గల డిజైన్‌ అప్‌డేట్‌ను పరిచయం చేయబోతున్నాం. ఇది పూర్తిగా కొత్తగా ఉంటుంది. దానికి మేము 'లిక్విడ్‌ గ్లాస్‌' అని పేరు పెట్టాం. ఇందులో గాజు, ద్రవాల స్ఫటికత ఉంటుంది. ఇది వినియోగదారుల కంటెంట్‌కు అనుగుణంగా మారుతుంది. అవసరమైన స్పష్టత, నియంత్రణలను ఇది అందిస్తుంది'' అని వివరించారు.