Claude Personal Finance: ఇక మీ ఆర్థిక వ్యవహారాలనూ చూసుకునే క్లాడ్ ఏఐ.. కొత్త ఫీచర్ వచ్చేసింది!
ఈ వార్తాకథనం ఏంటి
ప్రముఖ ఏఐ సంస్థ ఆంత్రోపిక్ (Anthropic) తన ఏఐ చాట్‌బాట్ క్లాడ్ (Claude)లో సరికొత్త ఫీచర్‌ను అందుబాటులోకి తీసుకొచ్చింది. 'పర్సనల్ ఫైనాన్స్' (Personal Finance) పేరుతో రూపొందించిన ఈ ఫీచర్ ద్వారా వినియోగదారులు తమ ఆర్థిక లావాదేవీలను సులభంగా పర్యవేక్షించవచ్చు. ఆదాయం, ఖర్చులు, బ్యాంక్ బ్యాలెన్స్, క్రెడిట్ కార్డు లావాదేవీలకు సంబంధించిన వివరాలను ఒకేచోట తెలుసుకోవచ్చు. వ్యక్తిగత ఆర్థిక వ్యవహారాలను మెరుగ్గా నిర్వహించుకునేందుకు ఇది ఉపయోగపడుతుందని కంపెనీ వెల్లడించింది.
వివరాలు
బ్యాంక్ ఖాతాలను లింక్ చేసుకునే అవకాశం
ఈ కొత్త ఫీచర్ కోసం ఆంత్రోపిక్.. ప్లెయిడ్ (Plaid) సంస్థతో భాగస్వామ్యం కుదుర్చుకుంది. దీని సహాయంతో వినియోగదారులు తమ బ్యాంక్ ఖాతాలు, క్రెడిట్ కార్డులను నేరుగా క్లాడ్‌కు అనుసంధానం చేసుకోవచ్చు.
అనంతరం తమ ఆర్థిక పరిస్థితికి సంబంధించిన నిర్దిష్ట ప్రశ్నలను అడిగి సమాధానాలు పొందవచ్చు. ఉదాహరణకు.. నెలవారీ ఖర్చులు ఎంత ఉన్నాయి? ఏ విభాగంలో ఎక్కువ డబ్బు ఖర్చవుతోంది? ఖాతాలో ప్రస్తుతం ఎంత బ్యాలెన్స్ ఉంది? రాబోయే రోజుల్లో చెల్లించాల్సిన బిల్లులు ఏమిటి? వంటి ప్రశ్నలకు క్లాడ్ సమాధానాలు ఇస్తుంది.
అయితే ఈ ఫీచర్ కేవలం సమాచారాన్ని చదివి విశ్లేషించడానికి మాత్రమే పరిమితం. వినియోగదారుల తరఫున ఎలాంటి నగదు బదిలీలు, చెల్లింపులు లేదా పెట్టుబడులకు సంబంధించిన లావాదేవీలు నిర్వహించదు.
వివరాలు
వ్యక్తిగత ఆర్థిక సహాయకుడిగా క్లాడ్
సాధారణంగా ఏఐ చాట్‌బాట్‌లు ఆర్థిక అంశాలపై సాధారణ సలహాలు, సూచనలు అందిస్తుంటాయి.
అయితే పర్సనల్ ఫైనాన్స్ ఫీచర్ ద్వారా వినియోగదారుల సొంత ఆర్థిక సమాచారాన్ని విశ్లేషించి సమాధానాలు అందించడమే లక్ష్యంగా పెట్టుకుంది ఆంత్రోపిక్.
బ్యాంక్ ఖాతాల బ్యాలెన్స్‌లు, లావాదేవీల వివరాలతో పాటు ఆర్థిక రంగానికి సంబంధించిన తెలియని పదాలు, అంశాలను కూడా సులభమైన భాషలో వివరిస్తుంది.
అంతేకాకుండా ఈ ఫీచర్‌లో ప్రకటనలు, స్పాన్సర్డ్ సిఫార్సులు ఉండవని సంస్థ పేర్కొంది.
వివరాలు
చాట్‌జీపీటీ ఫైనాన్సెస్‌కు పోటీగా కొత్త ఫీచర్
వినియోగదారులు క్లాడ్‌ను ఎక్కువగా ఆర్థిక సలహాలు, డబ్బు నిర్వహణకు సంబంధించిన ప్రశ్నలు అడుగుతున్న నేపథ్యంలో ఈ ఫీచర్‌ను అభివృద్ధి చేసినట్లు ఆంత్రోపిక్ తెలిపింది.
ప్లెయిడ్ ద్వారా అనుసంధానించిన ఖాతాల సమాచారాన్ని మాత్రమే చదివి విశ్లేషించే విధానాన్ని ఇందులో తీసుకొచ్చింది.
ఇదే తరహాలో ఓపెన్‌ఏఐ కూడా చాట్‌జీపీటీలో ఫైనాన్సెస్ (ChatGPT Finances) ఫీచర్‌ను అందిస్తోంది.
దీంతో వ్యక్తిగత ఆర్థిక నిర్వహణ విభాగంలో ఏఐ సంస్థల మధ్య పోటీ మరింత పెరిగే అవకాశం ఉంది.
వివరాలు
వినియోగదారుల వ్యక్తిగత సమాచారానికి భద్రత
ఆర్థిక వివరాలను ఏఐ ప్లాట్‌ఫామ్‌లతో పంచుకోవడంపై వినియోగదారుల్లో ఉండే గోప్యతా ఆందోళనలను దృష్టిలో పెట్టుకుని ఆంత్రోపిక్ కీలక వివరాలను వెల్లడించింది.
క్లాడ్‌కు అనుసంధానించిన ఖాతాల ద్వారా బ్యాంక్ పేరు, ఖాతా పేరు, ఖాతా రకం, ఖాతా నంబర్‌లోని చివరి నాలుగు అంకెలు, ఖాతా బ్యాలెన్స్‌లు, క్రెడిట్ పరిమితులు వంటి వివరాలు అందుబాటులో ఉంటాయి.
అంతేకాకుండా గరిష్ఠంగా రెండేళ్ల వరకు లావాదేవీల చరిత్రను కూడా క్లాడ్ విశ్లేషించగలదు.
మరో ముఖ్యమైన విషయం ఏమిటంటే.. పర్సనల్ ఫైనాన్స్ విభాగంలో జరిగే సంభాషణలను ఏఐ మోడళ్లకు శిక్షణ ఇవ్వడానికి ఉపయోగించబోమని ఆంత్రోపిక్ స్పష్టం చేసింది.
వ్యక్తిగత ఆర్థిక సమాచార గోప్యతకు సంబంధించి ఇది కీలక భరోసాగా నిలుస్తుంది.
వివరాలు
చార్టులు, గ్రాఫ్‌ల రూపంలో ఆర్థిక వివరాలు
ఈ ఫీచర్‌లో మరో ప్రత్యేకత ఏమిటంటే.. ఆర్థిక సమాచారాన్ని కేవలం టెక్స్ట్ రూపంలోనే కాకుండా పట్టికలు, చార్టులు, గ్రాఫ్‌ల రూపంలోనూ చూడవచ్చు.
ఉదాహరణకు వారంవారీ ఖర్చుల వివరాలను చార్ట్ రూపంలో చూపించాలని, రాబోయే చెల్లింపుల క్యాలెండర్‌ను రూపొందించాలని లేదా ముఖ్యమైన ఆర్థిక వివరాలతో డ్యాష్‌బోర్డ్ తయారు చేయాలని క్లాడ్‌ను అడగవచ్చు.
వినియోగదారుల అభ్యర్థనలకు అనుగుణంగా క్లాడ్ వీటిని ఆర్టిఫాక్ట్స్ రూపంలో రూపొందిస్తుంది. వాటిని తర్వాత కూడా తిరిగి తెరిచి అవసరమైన మార్పులు చేసుకోవచ్చు.
దీనివల్ల తమ ఖర్చులు, ఆర్థిక పరిస్థితిని సులభంగా అర్థం చేసుకోవచ్చు.
వివరాలు
భవిష్యత్తులో మరిన్ని ఆర్థిక సేవలు
పర్సనల్ ఫైనాన్స్ ఫీచర్ కేవలం ప్రారంభ అడుగు మాత్రమేనని ఆంత్రోపిక్ వెల్లడించింది.
అయితే ఆర్థిక నిర్ణయాల కోసం క్లాడ్‌ను పూర్తిగా అధికారిక వనరుగా పరిగణించకూడదని సూచించింది.
భవిష్యత్తులో బ్యాంకులు, వెల్త్ మేనేజ్‌మెంట్ సంస్థలు, ఇతర ఆర్థిక సేవల కంపెనీలతో భాగస్వామ్యాలు కుదుర్చుకుని మరింత సమగ్ర ఆర్థిక ప్రణాళిక వ్యవస్థను అభివృద్ధి చేసే అవకాశాలను పరిశీలిస్తోంది.
దీంతో భవిష్యత్తులో వ్యక్తిగత ఆర్థిక నిర్వహణలో ఏఐ సేవల పాత్ర మరింత పెరిగే అవకాశం ఉంది.