Forever Chemicals: షాకింగ్.. మనుషుల రక్తంలో 98.8% వరకు 'ఫరెవర్ కెమికల్స్' గుర్తింపు
ఈ వార్తాకథనం ఏంటి
ఇటీవల అమెరికాలో నిర్వహించిన ఒక అధ్యయనంలో పరీక్షించిన మానవ రక్త నమూనాల్లో 98.8%లో "ఫరెవర్ కెమికల్స్" గుర్తించబడ్డాయి. ఇవి అధికారికంగా PFAS (పర్ఫ్లోరోఆల్కైల్ మరియు పాలీఫ్లోరోఆల్కైల్ పదార్థాలు)గా పిలవబడతాయి. ఈ వర్గంలో 15,000కుపైగా రసాయనాలు ఉన్నాయి. ఇవి సులభంగా కరిగిపోవు.. అలాగే పర్యావరణంలో చాలా కాలం పాటు నిలిచిపోతాయి. దశాబ్దాలుగా PFASలను దుస్తులు, ఫర్నిచర్, ఆహార ప్యాకేజింగ్ వంటి రోజువారీ వస్తువుల తయారీలో విస్తృతంగా ఉపయోగిస్తున్నారు. దీని కారణంగా ఈ రసాయనాలు క్రమంగా ఆహారం, నీరు, పర్యావరణ వ్యవస్థలో చేరుతూ వస్తున్నాయి.
వివరాలు
10,566 రక్త నమూనాలు పరిశీలించిన శాస్త్రవేత్తలు..
పెన్సిల్వేనియాలోని NMS ల్యాబ్స్కు చెందిన పరిశోధకులు PFAS పరీక్షల కోసం పంపిన 10,566 రక్త నమూనాలను పరిశీలించారు. ఒకేసారి మనుషులు ఎన్నిరకాల PFAS రసాయనాలకు గురవుతున్నారో తెలుసుకోవడమే వారి లక్ష్యం. "NMS ల్యాబ్స్కు చెందిన టాక్సికాలజిస్ట్ లారా లాబే మాట్లాడుతూ, ఈ సామూహిక రసాయన ప్రభావాల నమూనాలను గుర్తించడం ద్వారా PFASల విస్తృత ప్రభావం మానవ ఆరోగ్యంపై ఏమేరకు ఉండవచ్చో మరింత స్పష్టంగా అర్థం చేసుకోవచ్చు" అని తెలిపారు.
వివరాలు
శరీరంలో అనేక రసాయనాలు మిశ్రమం..
పరీక్షించిన నమూనాల్లో కేవలం 0.18%లో మాత్రమే ఒక్క రకమైన PFAS కనిపించింది. అయితే చాలా నమూనాల్లో అనేక రకాల రసాయనాల మిశ్రమం గుర్తించబడింది. వాటిలో PFHxS అనే రసాయనం 97.9% నమూనాల్లో కనిపించింది. ఇది ప్రధానంగా వస్త్రాలు, ఫర్నిచర్, అంటుకునే పదార్థాల తయారీలో ఉపయోగిస్తారు. కాలేయం, రోగనిరోధక వ్యవస్థపై ప్రతికూల ప్రభావాలు ఉండవచ్చనే ఆందోళనలతో అనేక దేశాలు ప్రస్తుతం దీని వినియోగాన్ని పరిమితం చేస్తున్నాయి. లారా లాబే మాట్లాడుతూ, "సాధారణంగా వ్యక్తుల శరీరాల్లో ఐదు లేదా అంతకంటే ఎక్కువ PFAS రసాయనాలు వేర్వేరు స్థాయిల్లో నిల్వ అవుతున్నాయి. వీటి శరీరంలో నిలిచే కాలం కూడా భిన్నంగా ఉంటుంది" అని చెప్పారు.
వివరాలు
పరిశోధనలో షాకింగ్ విషయాలు..
ఈ అధ్యయనంలో కేవలం 13 సాధారణ PFAS రసాయనాలనే పరీక్షించారు. అందువల్ల మనుషుల శరీరాల్లో ఉన్న అసలు రసాయనాల సంఖ్య ఇంకా ఎక్కువగా ఉండే అవకాశం ఉందని పరిశోధకులు భావిస్తున్నారు. అలాగే పరీక్షలు కేవలం రసాయనాల ఉనికిని మాత్రమే గుర్తించాయి; వాటి పరిమాణాన్ని నిర్ధారించలేదు. PFAS ఎంత మోతాదులో ఉంటే హానికరమవుతాయో శాస్త్రవేత్తలకు ఇంకా స్పష్టత లేదు. జంతువులు, కణాలపై చేసిన పరిశోధనల్లో ఈ రసాయనాలు వేగవంతమైన వృద్ధాప్యం, మెదడు మార్పులు, కొన్ని రకాల క్యాన్సర్ల ప్రమాదంతో సంబంధం ఉన్నట్లు గుర్తించారు. అయితే మనుషులలో దీనికి నేరుగా సంబంధించిన స్పష్టమైన ఆధారాలు ఇంకా లభించలేదు.
వివరాలు
మరింత లోతుగా అధ్యయనం చేసే అవకాశం..
PFASలకు ప్రత్యామ్నాయాలను కనుగొనడం కష్టంగా మారింది, ఎందుకంటే ఇవి చాలా ఉపయోగకరమైన లక్షణాలు కలిగి ఉన్నాయి. ఇవి ఉత్పత్తులను నీరు, వేడి, నూనెలకు నిరోధకంగా మారుస్తాయి. అందుకే ప్రభుత్వాలు ప్రస్తుతం వీటి వినియోగాన్ని తగ్గించేందుకు, మరింత సురక్షితమైన ప్రత్యామ్నాయాలను అభివృద్ధి చేయడానికి చర్యలు తీసుకుంటున్నాయి. పరిశోధకులు పరీక్షించిన నమూనాల్లో 70కుపైగా వేర్వేరు PFAS మిశ్రమాలను గుర్తించారు. భవిష్యత్తులో ఈ రసాయనాల కలయికలు ఆరోగ్యంపై ఎలా ప్రభావం చూపుతాయో మరింత లోతుగా అధ్యయనం చేయాల్సిన అవసరం ఉందని వారు సూచించారు.