X Video Kickstart Bonus : కంటెంట్ క్రియేటర్లకు ఎక్స్ బంపర్ ఆఫర్.. 15 వీడియోలతో రూ.2.85 లక్షలు!
ఈ వార్తాకథనం ఏంటి
సోషల్ మీడియాలో వీడియోలు రూపొందిస్తూ ఆదాయం సంపాదించాలనుకునే కంటెంట్ క్రియేటర్లకు ఎలాన్ మస్క్‌కు చెందిన ఎక్స్ (గతంలో ట్విట్టర్) కొత్త అవకాశాన్ని తీసుకొస్తోంది. కేవలం 30 రోజుల్లో 15 ఒరిజినల్ వీడియోలను పోస్ట్ చేస్తే 3,000 డాలర్లు (భారత కరెన్సీలో సుమారు రూ.2.85 లక్షలు) బోనస్‌గా అందించే కార్యక్రమాన్ని ప్రయోగాత్మకంగా పరీక్షిస్తోంది. 'వీడియో కిక్‌స్టార్ట్ బోనస్' పేరుతో ఈ పథకాన్ని ప్రారంభించింది. ఈ ఆఫర్‌లో మరో ప్రత్యేకత ఏమిటంటే.. వీడియోలకు భారీ సంఖ్యలో వ్యూస్ రావాల్సిన అవసరం లేకుండానే నిర్దేశించిన నిబంధనలను పూర్తి చేసి బోనస్ పొందే అవకాశం ఉంది. అయితే, ఈ కార్యక్రమం ప్రస్తుతం ఎంపిక చేసిన క్రియేటర్లకు మాత్రమే అందుబాటులో ఉంది.
వివరాలు
30 రోజుల్లో 15 వీడియోలు తప్పనిసరి
ఎక్స్ నుంచి ఆహ్వానం అందుకున్నవారే ఇందులో పాల్గొనగలరు.
టిక్‌టాక్, ఇన్‌స్టాగ్రామ్ రీల్స్,యూట్యూబ్ షార్ట్స్ వంటి ప్లాట్‌ఫామ్‌లకు పోటీగా ఎక్స్ ఈ నిర్ణయం తీసుకోవడం ప్రాధాన్యం సంతరించుకుంది.
వీడియో కిక్‌స్టార్ట్ బోనస్ పొందాలనుకునే ఎంపిక చేసిన క్రియేటర్లు కొన్ని నిబంధనలను తప్పనిసరిగా పాటించాలి.
30 రోజుల వ్యవధిలో కనీసం 15 వీడియోలను అప్‌లోడ్ చేయాలి. అయితే,ఆ వీడియోలను 15 వేర్వేరు రోజుల్లో అప్‌లోడ్ చేయాల్సి ఉంటుంది.
ఒకే రోజులో మొత్తం వీడియోలను అప్‌లోడ్ చేస్తే ఈ అర్హతను పూర్తి చేసినట్లు కాదు.
ప్రతి వీడియో వర్టికల్ ఫార్మాట్‌లో ఉండాలి.అలాగే, దాని నిడివి మూడు నిమిషాల కంటే తక్కువగా ఉండాలి.
క్రియేటర్లు స్వయంగా రూపొందించిన ఒరిజినల్ వీడియోలనే ఈ కార్యక్రమం కోసం పోస్ట్ చేయాలి.
వివరాలు
వివరాలు
వ్యూస్, లైక్స్‌తో సంబంధం లేకుండా బోనస్
సాధారణంగా యూట్యూబ్ సహా పలు సోషల్ మీడియా ప్లాట్‌ఫామ్‌లలో వీడియోల ద్వారా వచ్చే ఆదాయం వాటికి లభించే వీక్షణలు, ప్రేక్షకుల స్పందన వంటి అంశాలపై ఆధారపడి ఉంటుంది.
కానీ ఎక్స్ తీసుకొస్తున్న వీడియో కిక్‌స్టార్ట్ బోనస్ విధానం ఇందుకు భిన్నంగా ఉంది.
ఈ కార్యక్రమంలో ప్రధానంగా నిర్దేశించిన సంఖ్యలో వీడియోలను, నిర్ణీత వ్యవధిలో పోస్ట్ చేయడంపైనే దృష్టి పెట్టారు.
వీడియోలకు ఎన్ని వ్యూస్ వచ్చాయి? ఎన్ని లైక్స్ వచ్చాయి? అనే అంశాలను బోనస్ మొత్తాన్ని నిర్ణయించడానికి ప్రాతిపదికగా తీసుకోరు.
అర్హత కలిగిన క్రియేటర్లు అన్ని నిబంధనలను సక్రమంగా పూర్తి చేస్తే 3,000 డాలర్ల స్థిర బోనస్ పొందే అవకాశం ఉంటుంది.
వివరాలు
ఇతర ప్లాట్‌ఫామ్‌ల వీడియోలను కూడా పోస్ట్ చేయొచ్చు
క్రియేటర్లు గతంలో ఇతర సోషల్ మీడియా వేదికల్లో అప్‌లోడ్ చేసిన తమ సొంత వీడియోలను కూడా ఎక్స్‌లో పోస్ట్ చేయవచ్చు.
అయితే, ఆ వీడియోలపై ఇతర ప్లాట్‌ఫామ్‌లకు సంబంధించిన వాటర్‌మార్క్‌లు, పేర్లు లేదా లోగోలు ఉండకూడదు.
ఈ నిబంధనను పాటిస్తూ తమ ఒరిజినల్ కంటెంట్‌ను ఎక్స్‌లో ప్రచురించవచ్చు. ప్రస్తుతం ఈ బోనస్ కార్యక్రమం ప్రయోగాత్మక దశలోనే ఉంది.
సంస్థ నుంచి అధికారిక ఆహ్వానం అందుకున్న క్రియేటర్లకు మాత్రమే ఇందులో చేరే అవకాశం ఉంటుంది.
ఎవరిని ఎంపిక చేస్తారు? ఎంపికకు సంబంధించిన పూర్తి ప్రమాణాలు ఏమిటి? అనే వివరాలను ఎక్స్ ఇప్పటివరకు బహిరంగంగా వెల్లడించలేదు.
వివరాలు
అక్టోబర్ 30లోపు రిజిస్ట్రేషన్ పూర్తి చేయాలి
ఈ కార్యక్రమానికి ఆహ్వానం అందుకున్న క్రియేటర్లు ఎక్స్‌లోని Creator Studioలో ఉన్న 'Programmes' విభాగం ద్వారా నమోదు చేసుకోవాలి.
తొలి విడతలో పాల్గొనాలనుకునేవారు 2026 అక్టోబర్ 30లోపు రిజిస్ట్రేషన్ ప్రక్రియను పూర్తి చేయాలి.
ఈ పథకానికి సంబంధించిన ప్రత్యేక అర్హతలు, నిబంధనలను పాటించడం తప్పనిసరి.
భవిష్యత్తులో వీడియో కిక్‌స్టార్ట్ బోనస్‌ను మరింత మంది కంటెంట్ క్రియేటర్లకు విస్తరిస్తారా? ప్రస్తుతం ఆహ్వానం అందుకోని వారికి కూడా అవకాశం కల్పిస్తారా? అనే విషయాలపై ఎక్స్ ఇంకా స్పష్టత ఇవ్వలేదు.
కాబట్టి, ఈ ఆఫర్ ద్వారా ఆదాయం పొందాలనుకునే క్రియేటర్లు తమకు ఆహ్వానం అందిందో లేదో పరిశీలించి, నిర్దేశించిన గడువులోగా రిజిస్ట్రేషన్ పూర్తి చేయాల్సి ఉంటుంది.