WhatsApp: వాట్సాప్లో కొత్త యూజర్ నేమ్ ఫీచర్.. ఇక నంబర్ లేకుండానే చాట్!
ఈ వార్తాకథనం ఏంటి
ప్రపంచవ్యాప్తంగా అత్యధిక మంది వినియోగిస్తున్న మెసేజింగ్ యాప్లలో ఒకటైన వాట్సాప్ మరో కీలకమైన ఫీచర్ను అందుబాటులోకి తీసుకురానుంది. ఇప్పటి వరకు కొత్త వ్యక్తితో సంభాషణ ప్రారంభించాలన్నా,కాంటాక్ట్గా సేవ్ చేయాలన్నా తప్పనిసరిగా ఫోన్ నంబర్ను పంచుకోవాల్సి వచ్చేది. అయితే ఇకపై ఆ అవసరం ఉండదు. మెటా యాజమాన్యంలోని వాట్సాప్, ఫోన్ నంబర్కు బదులుగా యూజర్ నేమ్ ద్వారా ఇతరులతో కనెక్ట్ అయ్యే కొత్త విధానాన్ని అధికారికంగా ప్రకటించింది. ఈ ఫీచర్ అందుబాటులోకి వచ్చిన తర్వాత వినియోగదారుల గోప్యత మరింత మెరుగుపడనుంది. ముఖ్యంగా అపరిచితులతో చాట్ ప్రారంభించేటప్పుడు లేదా కొత్త పరిచయాలు ఏర్పడిన సందర్భాల్లో వ్యక్తిగత మొబైల్ నంబర్ను వెల్లడించాల్సిన అవసరం ఉండదు.
వివరాలు
ఫోన్ నంబర్ స్థానంలో యూజర్ నేమ్
ప్రస్తుతం ఈ ఫీచర్ను కొంతమంది వినియోగదారులకు మాత్రమే విడుదల చేస్తున్నారు. త్వరలో దశలవారీగా అందరికీ అందుబాటులోకి తీసుకురానున్నారు. వాట్సాప్ తెలిపిన వివరాల ప్రకారం, ఫోన్ నంబర్ అనేది ప్రతి వినియోగదారుడి వ్యక్తిగత సమాచారంలో అత్యంత కీలకమైన అంశం. చాలా సందర్భాల్లో ఇతరులతో మాట్లాడాల్సి వచ్చినా, తమ మొబైల్ నంబర్ను పంచుకోవడానికి చాలామంది ఆసక్తి చూపరు. ముఖ్యంగా వ్యాపార అవసరాలు, కమ్యూనిటీ గ్రూపులు, పెద్ద ఈవెంట్లు లేదా కొత్త పరిచయాల సమయంలో గోప్యతకు ఎక్కువ ప్రాధాన్యం ఇస్తున్నారు. ఈ అవసరాన్ని దృష్టిలో పెట్టుకొని యూజర్ నేమ్ వ్యవస్థను తీసుకొస్తున్నట్లు కంపెనీ వెల్లడించింది. భవిష్యత్తులో ఫోన్ నంబర్ స్థానంలో యూజర్ నేమ్ను షేర్ చేసి సులభంగా చాట్ ప్రారంభించే అవకాశం కల్పించనుంది.
వివరాలు
యూజర్ నేమ్ను ముందుగానే రిజర్వ్ చేసుకునే అవకాశం
మెటా వెల్లడించిన వివరాల ప్రకారం ఈ వారం నుంచే ఈ ఫీచర్ను దశలవారీగా విడుదల చేయనున్నారు. వినియోగదారులు తమకు నచ్చిన ప్రత్యేకమైన యూజర్ నేమ్ను ముందుగానే రిజర్వ్ చేసుకునే అవకాశం కూడా ఉంటుంది. ఇందుకోసం వాట్సాప్ను తాజా వెర్షన్కు అప్డేట్ చేసిన తర్వాత Settings > Account > Username విభాగంలోకి వెళ్లి కొన్ని సెకన్లలోనే యూజర్ నేమ్ను సెట్ చేసుకోవచ్చు. ఒకసారి రిజర్వ్ చేసిన యూజర్ నేమ్ ద్వారా ఇతరులు మిమ్మల్ని సులభంగా సంప్రదించవచ్చు.
వివరాలు
అవసరమైన సందర్భాల్లో మాత్రమే వ్యక్తిగత మొబైల్ నంబర్
ఈ కొత్త విధానం వల్ల ముఖ్యంగా పెద్ద గ్రూప్ చాట్లలో చేరినప్పుడు లేదా తొలిసారి ఏదైనా వ్యక్తి లేదా వ్యాపార సంస్థకు సందేశం పంపినప్పుడు మీ ఫోన్ నంబర్ ఆటోమేటిక్గా కనిపించదు. ఇప్పటి వరకు గ్రూప్ సభ్యులందరికీ ఫోన్ నంబర్లు కనిపించే అవకాశం ఉండేది. అయితే యూజర్ నేమ్ ఫీచర్ అమల్లోకి వచ్చిన తర్వాత అవసరమైన సందర్భాల్లో మాత్రమే వ్యక్తిగత మొబైల్ నంబర్ ఉపయోగించబడుతుంది. దీంతో వినియోగదారుల గోప్యత మరింత బలపడుతుందని కంపెనీ భావిస్తోంది.భద్రత పరంగా కూడా ఈ ఫీచర్లో కీలకమైన జాగ్రత్తలు తీసుకున్నట్లు మెటా స్పష్టం చేసింది. ఇతర సోషల్ మీడియా వేదికల్లా యూజర్ నేమ్లకు సంబంధించి ఎలాంటి పబ్లిక్ డైరెక్టరీ,సెర్చ్ లిస్ట్ లేదా ఆటో సజెషన్ వ్యవస్థ ఉండదని తెలిపింది.
వివరాలు
యాప్ ద్వారానే వినియోగదారులకు సమాచారం
అంటే ఎవరైనా మిమ్మల్ని సంప్రదించాలంటే మీ ఖచ్చితమైన యూజర్ నేమ్ తెలిసి ఉండాలి. దీంతో అపరిచితుల నుంచి వచ్చే అనవసర సందేశాలు తగ్గడమే కాకుండా స్పామ్ సమస్యలు కూడా తగ్గే అవకాశం ఉందని కంపెనీ పేర్కొంది. ఈఫీచర్ను ప్రపంచవ్యాప్తంగా ఒకేసారి కాకుండా దశలవారీగా విడుదల చేయనున్నారు. ప్రతి దేశంలో సేవ ప్రారంభమైనప్పుడు యాప్ ద్వారానే వినియోగదారులకు సమాచారం అందిస్తామని మెటా వెల్లడించింది. అందువల్ల మీ ఫోన్లో ఈ ఫీచర్ వెంటనే కనిపించకపోయినా,రాబోయే వారాలు లేదా నెలల్లో అప్డేట్ రూపంలో అందుబాటులోకి వచ్చే అవకాశం ఉంది. ఇదిలా ఉండగా,ఇటీవల భారతీయ ఫిన్టెక్ సంస్థ CRED వ్యవస్థాపకుడు కునాల్ షాను వాట్సాప్ గ్లోబల్ హెడ్గా నియమించిన కొద్ది రోజులకే ఈ ఫీచర్ను ప్రకటించడం ఆసక్తికరంగా మారింది.
వివరాలు
మెసేజింగ్ ప్లాట్ఫారమ్కు భారతీయ పారిశ్రామికవేత్త నాయకత్వం
ప్రపంచంలోనే అత్యధిక మంది ఉపయోగిస్తున్న మెసేజింగ్ ప్లాట్ఫారమ్కు భారతీయ పారిశ్రామికవేత్త నాయకత్వం వహించడం టెక్నాలజీ రంగంలో కీలక పరిణామంగా విశ్లేషకులు భావిస్తున్నారు. ఈ నియామకంపై మెటా సీఈఓ మార్క్ జుకర్బర్గ్ కూడా స్పందించారు. సోషల్ మీడియా వేదికగా కునాల్ షాకు అభినందనలు తెలియజేస్తూ,భారతదేశంలో CREDను అత్యంత విజయవంతమైన టెక్నాలజీ సంస్థల్లో ఒకటిగా తీర్చిదిద్దిన నాయకత్వం ఆయనదేనని ప్రశంసించారు. కొత్త ఆలోచనలను అమలు చేసే సామర్థ్యంతో పాటు ప్రపంచ స్థాయి దృష్టికోణం కునాల్ షాకు ఉందని పేర్కొన్నారు. బిలియన్ల మంది వినియోగదారులు, లక్షలాది వ్యాపార సంస్థలు ఉపయోగిస్తున్న వాట్సాప్ను మరింత అభివృద్ధి చేసే దిశగా ఆయనతో కలిసి పనిచేయడానికి ఆసక్తిగా ఎదురుచూస్తున్నట్లు జుకర్బర్గ్ వెల్లడించారు.