Lone Soviet: భూమిపై కూలనున్న సోవియట్ అంతరిక్ష నౌక.. ప్రయోగం విఫలమై 53 ఏళ్లుగా భూకక్ష్యలోనే
ఈ వార్తాకథనం ఏంటి
అర్ధశతాబ్దం క్రితం సోవియట్ యూనియన్ ప్రయోగించిన 'కాస్మోస్ 482' అనే అంతరిక్ష నౌక త్వరలో భూమివైపు దూసుకొస్తోంది.
మే 8 నుండి 11వ తేదీల మధ్య ఈ నౌక భూ వాతావరణంలోకి ప్రవేశించే అవకాశముందని శాస్త్రవేత్తలు అంచనా వేస్తున్నారు.
1972 మార్చి 31న శుక్రగ్రహంపై పరిశోధనలు చేయాలనే ఉద్దేశంతో ఈ అంతరిక్ష మిషన్‌ను సోవియట్ పంపింది.
ఈ కాస్మోస్ 482 వాస్తవానికి ఓ లాండింగ్ మాడ్యూల్ కాగా,దాని ముఖ్య ఉద్దేశం 495 కిలోల బరువు కలిగిన ల్యాండరును శుక్ర గ్రహంపై దించడమే.
అయితే, ప్రయోగ సమయంలో సాంకేతిక లోపం తలెత్తడంతో నౌక ముందుకి సాగలేకపోయి భూమి కక్ష్యలోనే ఇరుక్కుపోయింది.
అప్పటినుంచి అంటే గత 53 సంవత్సరాలుగా అది భూమి చుట్టూ తిరుగుతూ ఉంది.
వివరాలు
కూలే సమయం సమీపంలో...
ఇప్పుడు నౌక కక్ష్య మార్గం తగ్గుతుండటంతో, శాస్త్రవేత్తలు దాని కదలికల్ని నిరంతరం గమనిస్తున్నారు.
నౌక ఖచ్చితంగా ఎప్పుడు భూమిపైకి దిగుతుందన్న సమాచారం త్వరలో వెల్లడి కానుంది.
మే 8 నుంచి 11 మధ్య అది కూలవచ్చని అంచనా ఉన్నా, సూర్యుడి క్రియాశీలత ఆధారంగా ఈ తేదీల కంటే ముందు గానీ, తర్వాత గానీ ఇది కూలే అవకాశమూ ఉందని శాస్త్రవేత్తలు సూచిస్తున్నారు.
ఎందుకంటే సూర్యుడి క్రియాశీలత పెరిగితే భూమి ఎగువ వాతావరణం వేడెక్కి వ్యాపిస్తుంది.
దాంతో దిగువ కక్ష్యలో ఉన్న వస్తువులు వేగంగా భూమివైపు లాగబడతాయి. దీంతో 'కాస్మోస్ 482' మేము ఊహించిన సమయం కంటే ముందే కూలే అవకాశాన్ని తప్పించలేం.
వివరాలు
భూమిపై ఎక్కడ పడుతుంది?
ఈ నౌక భూమిలోకి అనియంత్రితంగా ప్రవేశించనుండటంతో, అది ఏ ప్రదేశంలో కూలుతుందో ప్రస్తుతం ఖచ్చితంగా చెప్పడం అసాధ్యం.
అయినా దీనికన్నా విశ్లేషణ చేసి చూస్తే... ఈ స్పేస్ క్రాఫ్ట్ భూమిపై 52 డిగ్రీల ఉత్తర అక్షాంశం నుంచి 52 డిగ్రీల దక్షిణ అక్షాంశం మధ్య ఉన్న విస్తృత ప్రాంతంలో ఎక్కడైనా కూలే అవకాశముంది.
అంటే బ్రిటన్ నుంచి న్యూజిలాండ్ వరకు ఉన్న ప్రదేశాల్లో ఎక్కడైనా ఇది పడే అవకాశం ఉంది.
భూమిపై సముద్ర విస్తీర్ణం ఎక్కువగా ఉండటంతో అది నేలపై కంటే సముద్రాల్లో పడే అవకాశాలే ఎక్కువగా ఉన్నాయి.
వివరాలు
భూభాగంపై పడితే ప్రమాదమేనా?
భూభాగంపై, ముఖ్యంగా జనాభా ఎక్కువగా ఉన్న ప్రాంతాల్లో కూలే అవకాశాలు చాలా తక్కువగా ఉన్నప్పటికీ,శాస్త్రవేత్తల్లో ఒక ఆందోళన నెలకొంది.
'కాస్మోస్ 482'కు ప్రత్యేకమైన నిర్మాణ లక్షణాలున్నాయి.ఇది సోవియట్ వెనెరా మిషన్‌లో వాడిన ల్యాండర్ తరహాలో రూపొందించబడింది.
దీన్ని శుక్రగ్రహంలోని తీవ్రమైన ఉష్ణోగ్రతలు,అధిక పీడనాన్ని తట్టుకునేలా రూపొందించారు.
సాధారణంగా స్పేస్ డెబ్రీస్ భూ వాతావరణంలోకి ప్రవేశించిన తర్వాత గాలి ఒత్తిడికి మండిపోయి చిన్న చిన్న ముక్కలుగా విడిపోయి కూలుతుంటాయి.
కానీ 'కాస్మోస్ 482' మాత్రం అలాంటిదికాదు.దాని ప్రత్యేకమైన డిజైన్ వల్ల అది వాతావరణంలోనూ ధ్వంసం కాకుండా, భూమిపై పూర్తిగా ఒకే ముక్కగా పడే అవకాశం ఉంది.
అది నేలపై పడితే చిన్న ఉల్కలు పడినట్టే ప్రభావం చూపించవచ్చు. ఇదే విషయం శాస్త్రవేత్తలను ఆందోళనకు గురిచేస్తోంది.