Vikram-I: అంతరిక్షంలోకి మోదీ పోస్టుకార్డ్.. స్వహస్తాలతో రాసిన ఆ రెండు పదాలు ఏంటంటే?
ఈ వార్తాకథనం ఏంటి
భారత అంతరిక్ష రంగంలో మరో చారిత్రాత్మక ఘట్టానికి రంగం సిద్ధమైంది. దేశంలోనే తొలిసారిగా ప్రైవేట్ సంస్థ అభివృద్ధి చేసిన ఆర్బిటల్ రాకెట్ 'విక్రమ్-1 (Vikram-I)' ప్రయోగానికి అన్ని ఏర్పాట్లు పూర్తయ్యాయి. హైదరాబాద్కు చెందిన ప్రైవేట్ స్పేస్టెక్ సంస్థ స్కైరూట్ ఏరోస్పేస్ ఈ ప్రయోగాన్ని 'మిషన్ ఆగమన్' పేరుతో జులై 18న నిర్వహించనున్నట్లు ప్రకటించింది.
వివరాలు
మోదీ స్వహస్తాలతో రాసిన 'వందేమాతరం' అంతరిక్షంలోకి
ఈ ప్రయోగంలో ప్రత్యేక ఆకర్షణగా ప్రధాని నరేంద్ర మోదీ స్వయంగా రాసిన ఒక పోస్టుకార్డును కూడా అంతరిక్షంలోకి పంపనున్నారు.
ఆ పోస్టుకార్డుపై ఆయన 'వందేమాతరం' అనే పదాన్ని స్వహస్తాలతో రాశారు.
మోదీ సందేశంతో పాటు స్కైరూట్ బృంద సభ్యులు, మాజీ ఇస్రో ఛైర్మన్లు, భారతీయ వ్యోమగాములు, పెట్టుబడిదారులు, శాస్త్రవేత్తలు రాసిన డజన్ల కొద్దీ పోస్టుకార్డులను కూడా ఈ మిషన్ ద్వారా అంతరిక్షంలోకి తీసుకెళ్లనున్నారు.
వివరాలు
అంతరిక్ష అభివృద్ధికి సేవలందించిన వారికి నివాళి
దేశ అంతరిక్ష రంగ అభివృద్ధికి విశేషంగా సేవలందించిన ప్రముఖులను గౌరవించడమే ఈ ప్రత్యేక కార్యక్రమం వెనుక ఉద్దేశమని స్కైరూట్ వెల్లడించింది.
'మిషన్ ఆగమన్' విజయానికి అనేక మంది శాస్త్రవేత్తలు, ఇంజినీర్లు, సాంకేతిక నిపుణులు, సిబ్బంది చేసిన కృషికి గుర్తింపుగా ఈ చర్య చేపట్టినట్లు సంస్థ పేర్కొంది.
వివరాలు
18 క్యారెట్ల బంగారు రాకెట్ కూడా పేలోడ్లో
ఈ మిషన్లో తీసుకెళ్లే పేలోడ్లలో మరో విశేషం కూడా ఉంది.
మైక్రో ఆర్టిస్ట్ అజయ్ కుమార్ మట్టేవాడ రూపొందించిన 18 క్యారెట్ల బంగారంతో చేసిన సూక్ష్మ రాకెట్ నమూనా కూడా అంతరిక్షంలోకి వెళ్తోంది.
ఈ బంగారు రాకెట్పై భారత అంతరిక్ష రంగానికి విశేష సేవలందించిన సీ.వి. రామన్, విక్రమ్ సారాభాయ్, డాక్టర్ ఏపీజే అబ్దుల్ కలాం సూక్ష్మ రూపాలను చెక్కారు.
వాటి పరిమాణం ఒక్కొక్కటి బియ్యం గింజ కంటే కూడా చిన్నదిగా ఉండటం విశేషం.
అలాగే కాస్మోస్ డైమండ్స్ సంస్థ రూపొందించిన 'కాస్మిక్ బ్లూమ్' అనే ప్రత్యేక ఆర్ట్వర్క్ను కూడా ఈ మిషన్ పేలోడ్లో చేర్చారు.
వివరాలు
భారత ప్రైవేట్ స్పేస్ రంగానికి కీలక మైలురాయి
విక్రమ్-1 ప్రయోగం విజయవంతమైతే భారత ప్రైవేట్ అంతరిక్ష రంగానికి ఇది ఒక కీలక మైలురాయిగా నిలవనుంది.
అంతేకాకుండా ప్రపంచ వాణిజ్య ఉపగ్రహ ప్రయోగ మార్కెట్లో భారతదేశానికి మరింత గుర్తింపు లభించే అవకాశం ఉంది.
ఈ చారిత్రాత్మక ప్రయోగాన్ని శ్రీహరికోటలోని సతీశ్ ధావన్ అంతరిక్ష కేంద్రం (షార్)లోని ఫస్ట్ లాంచ్ ప్యాడ్ (FLP) నుంచి నిర్వహించనున్నారు.