Nasa: చంద్రయాన్-3 ల్యాండ్ అయిన ప్రాంతంలో నాసా ప్రయోగాలు
ఈ వార్తాకథనం ఏంటి
భారత్ చంద్రయాన్-3 2023లో చారిత్రకంగా ల్యాండింగ్ చేసిన చంద్రుడి దక్షిణ ధృవ ప్రాంతంలోనే నాసా తాజాగా మరిన్ని శాస్త్రీయ పరికరాలను అమర్చేందుకు సిద్ధమైంది. ఆర్టెమిస్-IV మిషన్లో భాగంగా రెండు అత్యాధునిక పరికరాలను చంద్రుడి మీదకు పంపనున్నట్లు నాసా ప్రకటించింది. వ్యోమగాములు చంద్ర ఉపరితలంపై ప్రత్యక్షంగా ఏర్పాటు చేసేలా రూపొందించిన ఇవి, భవిష్యత్తులో చంద్రుడు-మంగళ గ్రహాల అన్వేషణకు అత్యంత కీలకమైన శాస్త్రీయ సమాచారం అందిస్తాయని నాసా తెలిపింది. డస్టర్ (DUst and plaSma environmenT survEyoR) చంద్ర ఉపరితలంపై ఉండే ధూళికణాలు, ప్లాస్మా ప్రవర్తనను అధ్యయనం చేస్తే, ఎస్పీఎస్ఎస్ (South Pole Seismic Station) చంద్రుడి లోపలి భూకంప చలనలు కొలిచి అంతర్గత నిర్మాణంపై స్పష్టత ఇస్తుంది.
వివరాలు
వ్యోమగాముల భద్రతకు సంబంధించిన కీలక సమాచారం
డస్టర్ కోసం చిన్న ఆటోనమస్ రోవర్ను యూనివర్సిటీ ఆఫ్ కొలరాడో బౌల్డర్కు చెందిన షూ వాంగ్ బృందం అభివృద్ధి చేస్తుండగా, మూడు సంవత్సరాలపాటు రూ.200 కోట్లకు పైగా (24.8 మిలియన్ డాలర్లు) ఒప్పందం కుదిరింది. ఎస్పీఎస్ఎస్ను నాసా జెట్ ప్రొపల్షన్ ల్యాబ్కు చెందిన మార్క్ పనింగ్ నేతృత్వంలో తయారుచేస్తుండగా, దీనికీ మూడు సంవత్సరాలకు సుమారు 25 మిలియన్ డాలర్ల ఒప్పందం ఖరారు అయింది. ఈ పరికరాల ద్వారా ఉల్కాపాతాల తీవ్రత, భూకంప ప్రభావాలు, చంద్రుడి లోతైన అంతర్గత వివరాలతో పాటు వ్యోమగాముల భద్రతకు సంబంధించిన కీలక సమాచారం లభిస్తుందని నిపుణులు చెబుతున్నారు.
వివరాలు
భూమి నుంచి ఎంత దూరంగా వెళ్తే అంతగా శాస్త్ర పరిశోధన
భూమి నుంచి ఎంత దూరంగా వెళ్తే అంతగా శాస్త్ర పరిశోధన మీద ఆధారపడాల్సి ఉంటుందని నాసా సైన్స్ మిషన్ డైరెక్టరేట్ అసోసియేట్ అడ్మినిస్ట్రేటర్ నిక్కీ ఫాక్స్ పేర్కొన్నారు. ఆర్టెమిస్-IV మిషన్లో ఈ పరికరాల తుది భాగస్వామ్యం తర్వాత ఖరారవుతుందని నాసా వెల్లడించింది. చంద్ర ఉపరితలంపై మనుషుల ప్రత్యక్ష భాగస్వామ్యంతో జరగనున్న ఈ పరిశోధనలు భవిష్యత్ అంతరిక్ష మిషన్లకు దిశానిర్దేశం చేయనున్నాయని సంస్థ తెలిపింది.