undersea cable route: అంటార్కిటికాలో హైస్పీడ్ ఇంటర్నెట్.. సముద్రంలో కేబుల్కు భారీ ప్రణాళిక
ఈ వార్తాకథనం ఏంటి
ప్రపంచంలోని మిగతా ప్రాంతాలతో అంటార్కిటికా ఖండాన్ని నేరుగా అనుసంధానించేందుకు సముద్రగర్భ ఫైబర్-ఆప్టిక్ కేబుల్ ఏర్పాటు చేసే అవకాశం ఉందని ఓ అధ్యయనం వెల్లడించింది. చిలీ టెలికమ్యూనికేషన్స్ నియంత్రణ సంస్థ సబ్టెల్ నిర్వహించిన ఈ అధ్యయనం.. అంటార్కిటికాకు సముద్రగర్భ కేబుల్ ద్వారా ఇంటర్నెట్ అందించడం సాంకేతికంగా సాధ్యమేనని తేల్చింది. ప్రస్తుతం అంటార్కిటికా అంతా భారీ మంచుతో కప్పబడి ఉండటంతో అక్కడ సముద్రగర్భ ఇంటర్నెట్ కేబుల్స్ అందుబాటులో లేవు. దీంతో అక్కడ పనిచేస్తున్న పరిశోధనా కేంద్రాలు ఉపగ్రహాలపై ఎక్కువగా ఆధారపడుతున్నాయి. అంతేకాకుండా ఓడలు,విమానాల ద్వారా హార్డ్ డ్రైవ్లను తరలించి డేటాను బదిలీ చేయాల్సి వస్తోంది. ఈ పరిమితుల కారణంగా అందుబాటులో ఉన్న బ్యాండ్విడ్త్ తక్కువగా ఉండటంతో.. ఇంటర్నెట్ వినియోగంలో పరిశోధనా కార్యకలాపాలకే ఎక్కువ ప్రాధాన్యం ఇస్తున్నారు.
వివరాలు
కేబుల్ నిర్మాణానికి రెండు మార్గాలు
డ్రేక్ పాసేజ్ మీదుగా సముద్రగర్భ కేబుల్ ఏర్పాటు చేసేందుకు సబ్టెల్ అధ్యయనం రెండు రకాల ప్రణాళికలను ప్రతిపాదించింది.
కనిష్ట నిర్మాణ ప్రణాళికలో భాగంగా కింగ్ జార్జ్ ఐలాండ్, ఉత్తర అంటార్కిటిక్ ద్వీపకల్పం చుట్టుపక్కల ప్రాంతాల్లోని మూడు కేంద్రాలను అనుసంధానించేలా సుమారు 1,600 కిలోమీటర్ల పొడవైన కేబుల్ లింక్ను ఏర్పాటు చేయాలని సూచించింది.
ఇక అనుకూల నిర్మాణ ప్రణాళిక మరింత విస్తృతంగా ఉంటుంది.
ఇందులో సుమారు 4,100 కిలోమీటర్ల మేర సముద్రగర్భ ఫైబర్ కేబుల్ను ఏర్పాటు చేసి.. అంటార్కిటికాలోని తొమ్మిది ల్యాండింగ్ పాయింట్లను అనుసంధానించాలని ప్రతిపాదించారు.
ఈ నెట్వర్క్ ద్వారా చిలీ, అర్జెంటీనా, బ్రెజిల్, అమెరికా, బ్రిటన్ దేశాలకు చెందిన పరిశోధనా కేంద్రాలను అనుసంధానించే అవకాశం ఉంటుంది.
వివరాలు
కేబుల్ నిర్మాణానికి రెండు మార్గాలు
ఒక్కో ల్యాండింగ్ పాయింట్కు 15 నుంచి 30 టిబిట్/సెకను సామర్థ్యంతో డేటాను రియల్టైమ్లో ప్రసారం చేయవచ్చని అధ్యయనం పేర్కొంది.
సాధారణ కమర్షియల్ కేబుల్స్కు భిన్నంగా.. సముద్రపు అడుగుభాగంలో 'స్మార్ట్' సెన్సార్లను కూడా ఏర్పాటు చేయాలని ప్రతిపాదించారు.
ఇవి కేబుల్ వ్యవస్థ పనితీరును పర్యవేక్షించడంలో కీలకంగా ఉండనున్నాయి.
వివరాలు
రెండు ప్రధాన సవాళ్లు
అయితే అంటార్కిటికాకు ఫైబర్ నెట్ ఏర్పాటు చేయడం అంత సులభం కాదు.
ఈ ప్రాజెక్టు ప్రధానంగా రెండు కీలక సవాళ్లను ఎదుర్కోవాల్సి ఉంటుంది.
మొదటిది.. అక్కడి తీవ్రమైన వాతావరణ పరిస్థితులు. డిసెంబర్ నుంచి జనవరి మధ్య ఉండే వేసవి కాలంలోనే కేబుల్ నిర్మాణ పనులు చేపట్టే అవకాశం ఉంటుంది.
అది కూడా కేవలం మూడు వేసవి కాలాల వ్యవధిలోనే పనులు పూర్తి చేయాల్సి ఉంటుంది.
మరో ప్రధాన సమస్య మంచుకొండల రాపిడి నుంచి కేబుళ్లను రక్షించడం.
దీనికోసం హారిజాంటల్ డైరెక్షనల్ డ్రిల్లింగ్, డబుల్ ఆర్మర్డ్ కేబుల్స్ వంటి సాంకేతిక పరిజ్ఞానాలను పరిశీలించాలని అధ్యయనం సూచించింది.
వివరాలు
రెండు ప్రధాన సవాళ్లు
ఇక ఈ ప్రాజెక్టుకు అవసరమైన అంతర్జాతీయ అనుమతులు పొందడం, నిధులు సమీకరించడం వంటి ప్రక్రియలకు కూడా భారీ సమయం పట్టే అవకాశం ఉంది.
ఇవన్నీ పూర్తయ్యేందుకు దాదాపు ఎనిమిదేళ్లు పట్టవచ్చని అంచనా. సబ్టెల్ రూపొందించిన ఈ నివేదికను అంతర్జాతీయ ఆమోదం కోసం చిలీ విదేశాంగ మంత్రిత్వ శాఖ, అంటార్కిటిక్ పాలసీ కౌన్సిల్కు సమర్పించారు.