South Korea: ఏఐ సాయంతో పరీక్షలో చీటింగ్.. నిజం అంగీకరించిన టాపర్
ఈ వార్తాకథనం ఏంటి
దక్షిణ కొరియాలో పరీక్షల నిర్వహణపై చర్చకు దారితీసే ఘటన వెలుగులోకి వచ్చింది. దేశంలో అత్యంత కఠినమైన జాతీయ ట్యాక్స్ అకౌంటెంట్ అర్హత పరీక్షలో టాపర్గా నిలిచిన ఓ అభ్యర్థి.. తాను ఆర్టిఫిషియల్ ఇంటెలిజెన్స్ (ఏఐ) సాయంతో మోసానికి పాల్పడినట్లు అంగీకరించాడు. దాదాపు పూర్తి మార్కులు సాధించి అందరినీ ఆశ్చర్యపరిచిన అతను.. చివరకు స్వయంగా తన తప్పును బయటపెట్టడం సంచలనంగా మారింది. సదరు అభ్యర్థి ఆదివారం ఓ యూట్యూబ్ ఛానెల్కు ఇచ్చిన వీడియో ద్వారా ఈ విషయాన్ని వెల్లడించాడు. పరీక్ష సమయంలో ఏఐ గ్లాసెస్ ధరించి ప్రశ్నలను ఫొటోలు తీశానని తెలిపాడు. అనంతరం వాటిని ఏఐ టూల్ సాయంతో తన ఫోన్కు పంపించుకుని సమాధానాలు రాశానని వివరించాడు.
వివరాలు
ప్రతిభపై అనుమానాలు
ఈ విధంగా సాధించిన విజయం నిజాయతీతో కూడుకున్నది కాదని అంగీకరించాడు. తన చర్యకు క్షమాపణలు కూడా చెప్పాడు.
ఏప్రిల్, జులై నెలల్లో నిర్వహించిన ఈ పరీక్షల్లో హాన్ అసాధారణ మార్కులు సాధించాడు.
మొదటి రౌండ్లో మొత్తం 400 మార్కులకు గాను 397.5 మార్కులు పొందాడు. 160 ప్రశ్నల్లో 159కి సరైన సమాధానాలు రాశాడు.
ఈ స్థాయిలో మార్కులు సాధించడంతో అతని ప్రతిభపై అనుమానాలు వ్యక్తమయ్యాయి.
ఈ క్రమంలోనే అతను తన న్యాయవాది ద్వారా సియోల్ పోలీసులకు లిఖితపూర్వక వాంగ్మూలం సమర్పించాడు.
ఈ వాంగ్మూలం తమకు అందినట్లు పోలీసులు కూడా ధ్రువీకరించారు.
వివరాలు
దేశవ్యాప్త ప్రవేశ పరీక్షల ముందు ఘటనతో ప్రభుత్వం అప్రమత్తం
మరోవైపు, ఈ గురువారం దక్షిణ కొరియా వ్యాప్తంగా వార్షిక కాలేజీ ప్రవేశ పరీక్షలు జరగనున్నాయి.
ఈ నేపథ్యంలో ఏఐ సాయంతో పరీక్షలో మోసానికి పాల్పడిన ఘటన బయటపడటం ప్రభుత్వాన్ని అప్రమత్తం చేసింది.
ఈ వ్యవహారాన్ని అధ్యక్ష భవనం తీవ్రంగా పరిగణిస్తున్నట్లు ఉన్నతాధికారులు వెల్లడించారు.
భవిష్యత్తులో ఇలాంటి అక్రమాలు జరగకుండా అడ్డుకునేందుకు అత్యవసర చర్యలు చేపడుతున్నామని తెలిపారు.
పరీక్షల నిర్వహణలో పారదర్శకతకు ప్రాధాన్యం ఇస్తామని ప్రభుత్వం హామీ ఇచ్చింది.