Spam Calls: భారత్లో పెరిగిన స్పామ్ కాల్స్.. 66% అనామక కాల్స్ స్పామ్గా గుర్తింపు.. ప్రశ్నార్థకంగా డీఎన్డీ పనితీరు ?
ఈ వార్తాకథనం ఏంటి
భారత్లో స్పామ్ కాల్స్ సమస్య రోజురోజుకూ పెరుగుతోంది. తాజా ట్రూకాలర్ ఇన్సైట్స్ నివేదిక ప్రకారం 2025లో దేశంలో వచ్చిన అనామక కాల్స్లో 66 శాతం స్పామ్గా గుర్తించారు. ప్రపంచవ్యాప్తంగా భారత్ స్పామ్ ప్రభావిత దేశాల్లో ఐదో స్థానంలో నిలిచింది. ఇండోనేషియా, చిలీ, వియత్నాం, బ్రెజిల్ తర్వాత భారత్ ఉంది. గత ఏడాది దేశంలో 41.68 బిలియన్ స్పామ్ కాల్స్, 129.03 బిలియన్ స్పామ్ మెసేజ్లు నమోదయ్యాయి. ఇందులో భారీగా మోసపూరిత కాల్స్ కూడా ఉన్నాయి. టెలీమార్కెటింగ్ కాల్స్ 36 శాతం, ఫైనాన్షియల్ సర్వీసులు 18 శాతం, స్కామ్లు 12 శాతం వాటా కలిగి ఉన్నాయి. ప్రభుత్వం తీసుకొచ్చిన డూ నాట్ డిస్టర్బ్ (డీఎన్డీ) విధానం ఉన్నప్పటికీ సమస్య పూర్తిగా తగ్గలేదు.
వివరాలు
21 లక్షలకుపైగా నంబర్లు బ్లాక్ చేసిన టెలికాం కంపెనీలు
ఒకవైపు, రిజిస్టర్ అయిన టెలీమార్కెటర్లు నిబంధనలు పాటిస్తున్నా.. అనధికార కాలర్లు 10 అంకెల సాధారణ నంబర్లతో కాల్స్ చేస్తూ డీఎన్డీని లెక్కచేయడం లేదు. సిమ్ ఫార్మ్లు, బల్క్ సిమ్లు వాడుతూ భారీగా కాల్స్ చేస్తున్నారు. దీంతో వినియోగదారులు ఇబ్బందులు ఎదుర్కొంటున్నారు. ఇక టెలికాం నియంత్రణ సంస్థ ట్రాయ్, టెలికాం శాఖ, మొబైల్ నెట్వర్క్ సంస్థలు చర్యలు చేపట్టాయి. 2026 ప్రారంభానికి టెలికాం కంపెనీలపై 150 కోట్ల రూపాయల జరిమానాలు విధించగా, 21 లక్షలకుపైగా నంబర్లు బ్లాక్ చేశారు. 2025లోనే 7.31 లక్షల నోటీసులు పంపించారు. స్పామ్పై ఫిర్యాదులు చేయాలని ప్రజలను ప్రోత్సహిస్తున్నారు. ఐదు రోజుల్లో స్పందన ఇవ్వాలని నిబంధనలు పెట్టారు. ప్రొమోషన్ సందేశాల ట్రాకింగ్ కోసం డీఎల్టీ విధానం అమలు చేస్తున్నారు.
వివరాలు
స్పామర్లు కొత్త మార్గాలు
అయితే సాంకేతికత వేగంగా మారుతుండటంతో స్పామర్లు కొత్త మార్గాలు వెతుకుతున్నారు. నంబర్ స్పూఫింగ్, నంబర్ మార్పులు, వాయిస్ క్లోనింగ్, రోబో కాల్స్ వంటి పద్ధతులు వినియోగిస్తున్నారు. విదేశీ కాల్ రూటింగ్, డేటా లీక్ల ద్వారా నంబర్లు సేకరించడం కూడా పెరిగింది. దీంతో డీఎన్డీ నమోదు మాత్రమే సరిపోవడం లేదు. ప్రభుత్వం కఠిన చర్యలు తీసుకుంటున్నా, తక్కువ ఖర్చుతో స్పామ్ కార్యకలాపాలు కొనసాగుతుండటంతో సమస్య ఇంకా నియంత్రణలోకి రావడం లేదు.