Alien Species: యూఎఫ్వోల నుంచి 4 రకాల గ్రహాంతరవాసులను స్వాధీనం చేసుకున్నాం: మాజీ సీఐఏ పరిశోధకుడి సంచలన వ్యాఖ్యలు
ఈ వార్తాకథనం ఏంటి
అమెరికా ప్రభుత్వం భూమిపై కూలిపోయిన యూఎఫ్వోల(UFOs)నుంచి నాలుగు రకాల గ్రహాంతరవాసులను స్వాధీనం చేసుకుందని మాజీ సీఐఏ పరిశోధకుడు హాల్ పుట్హాఫ్ సంచలన వ్యాఖ్యలు చేశారు. 'ది డైరీ ఆఫ్ ఏ సీఈఓ'పోడ్కాస్ట్లో మాట్లాడిన ఆయన..ఈ విషయంపై పని చేసిన వ్యక్తులు కనీసం నాలుగు రకాల జీవుల గురించి చెప్పారని వెల్లడించారు. తాను వాటిని నేరుగా చూడలేదని,అయితే విశ్వసనీయ వర్గాల నుంచి ఈ సమాచారం అందిందన్నారు. హాల్ పుట్హాఫ్కు సన్నిహిత సహచరుడైన ఎరిక్ డేవిస్ గత ఏడాది ఈ నాలుగు జాతుల పేర్లను కూడా వెల్లడించారు. వాటిలో గ్రేస్,నార్డిక్స్, ఇన్సెక్టాయిడ్స్, రెప్టిలియన్స్ ఉన్నట్లు చెప్పారు. ఇవి పూర్తిగా పురుగులు లేదా సరీసృపాల్లా కాకపోయినా.. వాటి ఆకారాలు అలాంటి జీవులను పోలి ఉంటాయని డేవిస్ వివరించారు.
వివరాలు
ఎలియన్స్, యూఎఫ్వోలపై చర్చలు
అదే పోడ్కాస్ట్లో దర్శకుడు డాన్ ఫరా మాట్లాడుతూ.. అమెరికాలోనే డజన్ల కొద్దీ కూలిపోయిన యూఎఫ్వోలను స్వాధీనం చేసుకున్నారని పేర్కొన్నారు. ఇవి సహజంగా కూలిపోయినవో లేక ఇతర కారణాలతో ప్రమాదానికి గురైనవో కావచ్చని తెలిపారు. ఆ వాహనాలు మానవేతర మూలాల నుంచి వచ్చాయని ఆయన అభిప్రాయపడ్డారు. ఇటీవల డొనాల్డ్ ట్రంప్ ప్రభుత్వం 'ఎలియన్ ఫైల్స్' తొలి విడత పత్రాలను విడుదల చేసిన నేపథ్యంలో ఈ వ్యాఖ్యలు మరింత చర్చనీయాంశమయ్యాయి. అమెరికాలో ప్రస్తుతం ఎలియన్స్, యూఎఫ్వోలపై చర్చలు మళ్లీ ఊపందుకున్నాయి. చాలా మంది ఎలియన్ సిద్ధాంతవాదులు త్వరలోనే ప్రభుత్వాలు దశాబ్దాలుగా దాచిన నిజాలు బయటకు వస్తాయని భావిస్తున్నారు.
వివరాలు
రక్షణ మంత్రి పీట్ హెగ్సెత్ నేతృత్వంలో ప్రత్యేక కమిటీ
మాజీ అధ్యక్షుడు బరాక్ ఒబామా ఎలియన్స్ ఉన్నారంటూ చేసిన వ్యాఖ్యల తర్వాత ట్రంప్ ఈ ఫైళ్ల విడుదలకు ఆదేశాలు ఇచ్చినట్లు సమాచారం. ఈ ప్రక్రియ పర్యవేక్షణ కోసం రక్షణ మంత్రి పీట్ హెగ్సెత్ నేతృత్వంలో ప్రత్యేక కమిటీని కూడా ఏర్పాటు చేశారు. ఎరిక్ డేవిస్ ప్రకారం.. 1947లో జరిగిన ప్రసిద్ధ 'రోస్వెల్ యూఎఫ్వో ప్రమాదం'లో గ్రేస్ జాతికి చెందిన జీవులు లభించాయని చెబుతున్నారు.
వివరాలు
రెప్టిలియన్స్
గ్రేస్ జాతి జీవులు సుమారు నాలుగు అడుగుల ఎత్తులో ఉంటాయని, నార్డిక్స్ మాత్రం మనుషుల్లా ఐదు నుంచి ఆరు అడుగుల ఎత్తు కలిగి ఉంటారని తెలిపారు. రెప్టిలియన్స్, ఇన్సెక్టాయిడ్స్ కూడా దాదాపు అదే ఎత్తులో ఉంటాయని చెప్పారు. 'న్యూయార్క్ పోస్ట్' కథనం ప్రకారం.. గ్రేస్ జాతి జీవులు చిన్న శరీరం, పెద్ద కళ్లతో, వెంట్రుకలు లేకుండా ఉంటాయని భావిస్తున్నారు. ఇక రెప్టిలియన్స్ మాత్రం పాముల్లాంటి చర్మం, మనుషుల ఆకారంలో చేతులు, కాళ్లు, పొడవాటి తోకలతో ఉంటాయని నిపుణులు చెబుతున్నారు.