Josh Hazlewood: 9 ఫైనల్స్.. 9 విజయాలు.. ఆర్సీబీ లక్కీ చార్మ్‌కు రూ.30 కోట్ల డిమాండ్!

వ్రాసిన వారు Jayachandra Akuri

Jun 02, 2026

09:51 am

ఈ వార్తాకథనం ఏంటి

ఒకప్పుడు ఐపీఎల్‌లో దురదృష్టానికి ప్రతీకగా నిలిచిన రాయల్ ఛాలెంజర్స్ బెంగళూరు, ఇప్పుడు విజయాలకు కొత్త నిర్వచనంగా మారింది. ఎన్నో ఏళ్ల నిరీక్షణ తర్వాత 2025లో తొలి టైటిల్‌ను అందుకున్న ఆర్సీబీ, 2026లోనూ ట్రోఫీని కైవసం చేసుకుని వరుసగా రెండుసార్లు ఛాంపియన్‌గా నిలిచింది. దీంతో రాయల్ ఛాలెంజర్స్ బెంగళూర్, చెన్నై సూపర్ కింగ్స్, ముంబై ఇండియన్స్ తర్వాత బ్యాక్-టు-బ్యాక్ ఐపీఎల్ టైటిల్స్ గెలిచిన మూడో జట్టుగా చరిత్ర సృష్టించింది. 2025లో జట్టు పగ్గాలు చేపట్టిన రజిత్ పాటిదార్ అతి తక్కువ మ్యాచుల్లోనే రెండు ఐపీఎల్ ట్రోఫీలు అందించిన కెప్టెన్‌గా ప్రత్యేక గుర్తింపు పొందాడు.

వివరాలు

ఫైనల్ ఆడితే.. ట్రోఫీ ఖాయం!

అయితే ఆర్సీబీ విజయగాథ వెనుక కేవలం కెప్టెన్సీ వ్యూహాలే కాకుండా, జట్టులో ఉన్న ఓ ఆస్ట్రేలియా పేసర్‌కు సంబంధించిన అరుదైన సెంటిమెంట్ కూడా కీలక పాత్ర పోషించింది. ఆ ఆటగాడు మరెవరో కాదు.. ఆస్ట్రేలియా స్టార్ ఫాస్ట్ బౌలర్ జోష్ హేజిల్‌వుడ్. వైట్ బాల్ క్రికెట్‌లో ఇప్పటివరకు హేజిల్‌వుడ్ ఆడిన ప్రతి ఫైనల్ మ్యాచ్‌లో అతడి జట్టే విజేతగా నిలవడం విశేషం. తన కెరీర్‌లో మొత్తం తొమ్మిది పరిమిత ఓవర్ల ఫైనల్స్ ఆడిన హేజిల్‌వుడ్, తొమ్మిది సార్లూ ట్రోఫీని గెలుచుకున్న జట్టులో సభ్యుడిగా నిలిచి క్రికెట్ ప్రపంచంలోనే అరుదైన 'గోల్డెన్ లెగ్'గా గుర్తింపు తెచ్చుకున్నాడు.

వివరాలు

2010లో మొదలైన విజయ ప్రస్థానం

హేజిల్‌వుడ్ విజయయాత్ర 2010 అండర్-19 ప్రపంచకప్‌తో ప్రారంభమైంది. ఆ టోర్నీ ఫైనల్‌లో నాలుగు వికెట్లు తీసి ఆస్ట్రేలియాను విజేతగా నిలిపాడు. ఆ తర్వాత కూడా అతడి విజయ పరంపర కొనసాగింది. 2012 : సిడ్నీ సిక్సర్స్ తరఫున ఛాంపియన్స్ లీగ్ టీ20 టైటిల్ గెలుపులో భాగమయ్యాడు. 2015 : ఆస్ట్రేలియా వన్డే ప్రపంచకప్ విజేత జట్టులో సభ్యుడిగా నిలిచాడు. 2020 : బిగ్ బాష్ లీగ్ ఫైనల్‌లో సిడ్నీ సిక్సర్స్ విజయానికి తోడ్పడ్డాడు. 2021 (ఐపీఎల్) : చెన్నై సూపర్ కింగ్స్ తరఫున ఆడి, జట్టును మళ్లీ ఛాంపియన్‌గా నిలిపే క్రమంలో కీలక పాత్ర పోషించాడు.

వివరాలు

బౌలింగ్ లో అద్భుత ప్రదర్శన

2021 టీ20 ప్రపంచకప్ : న్యూజిలాండ్‌తో జరిగిన ఫైనల్‌లో మూడు వికెట్లు తీసి ఆస్ట్రేలియాకు తొలి టీ20 ప్రపంచకప్ అందించాడు. 2023 వన్డే ప్రపంచకప్ : అహ్మదాబాద్‌లో భారత్‌తో జరిగిన ఫైనల్‌లో రెండు కీలక వికెట్లు తీసి ఆస్ట్రేలియా విజయానికి మార్గం సుగమం చేశాడు. ఇలాంటి అద్భుతమైన ట్రాక్ రికార్డుతోనే 2025, 2026 సీజన్లలో ఆర్సీబీ వరుసగా రెండు ఐపీఎల్ టైటిల్స్ గెలవడంలో హేజిల్‌వుడ్ కీలక భూమిక పోషించాడు. అతడి బౌలింగ్ నైపుణ్యాలు మాత్రమే కాకుండా, ఫైనల్స్‌లో అపజయం ఎరుగని సెంటిమెంట్ కూడా జట్లను ఆకర్షిస్తోంది.

వివరాలు

ఆర్సీబీ డబుల్ ధమాకా.. ఇప్పుడు రూ.30 కోట్ల చర్చ

దీంతో ఇతర ఐపీఎల్ ఫ్రాంచైజీలు కూడా ఇప్పుడు హేజిల్‌వుడ్‌పై ప్రత్యేక దృష్టి సారించాయి. వచ్చే ఏడాది మెగా వేలంలో అతడు అందుబాటులోకి వస్తే, అతడిని సొంతం చేసుకునేందుకు కొన్ని జట్లు ఏకంగా రూ.30 కోట్ల వరకు ఖర్చు చేయడానికి సిద్ధంగా ఉన్నట్లు క్రికెట్ వర్గాల్లో చర్చ జరుగుతోంది. ఒకప్పుడు బ్యాడ్ లక్‌కు చిరునామాగా విమర్శలు ఎదుర్కొన్న ఆర్సీబీ, ఇప్పుడు వరుస టైటిల్స్‌తో ఐపీఎల్‌లో అత్యంత విజయవంతమైన జట్లలో ఒకటిగా నిలవగా.. ఆ విజయాల వెనుక జోష్ హేజిల్‌వుడ్ అనే 'గెలుపు గుర్రం' కథ ప్రత్యేక ఆకర్షణగా మారింది.