Delhi Capitals: టైటిల్ కోసం 19 ఏళ్ల నిరీక్షణ.. ఈసారైనా ఢిల్లీకి విజయం సాధ్యమయ్యేనా?
ఈ వార్తాకథనం ఏంటి
ఇండియన్ ప్రీమియర్ లీగ్ (ఐపీఎల్)లో ఇప్పటికే 18 సీజన్లు పూర్తయ్యాయి. అయినప్పటికీ టైటిల్ను అందుకోవాలన్న ఢిల్లీ క్యాపిటల్స్ ఆశ మాత్రం ఇంకా నెరవేరలేదు. జట్టు పేరు మారినా, ఆటగాళ్లు మారినా, అనేక ప్రముఖులు నాయకత్వం వహించినా ఢిల్లీ అదృష్టం మాత్రం మారలేదు. 2008లో ఐపీఎల్ ప్రారంభమైనప్పుడు ఢిల్లీ డేర్డెవిల్స్ పేరుతో అరంగేట్రం చేసిన ఈ జట్టు తొలి సీజన్లోనే సెమీఫైనల్కు చేరింది. తర్వాతి సీజన్లో కూడా అదే స్థాయిలో ప్రదర్శన కనబరిచింది.
వివరాలు
పుష్కర కాలం తర్వాత ఫైనల్ చేరిక..
2012లో మరోసారి ప్లేఆఫ్స్లోకి అడుగుపెట్టినప్పటికీ, టైటిల్ సాధనలో విఫలమైంది. ఆ తర్వాత వరుసగా ఆరు సీజన్ల పాటు లీగ్ దశకే పరిమితమైంది. 2018లో జేఎస్డబ్ల్యూ సంస్థ జట్టును స్వాధీనం చేసుకుని, ఢిల్లీ డేర్డెవిల్స్ పేరును ఢిల్లీ క్యాపిటల్స్గా మార్చింది. పేరు మారిన తరువాత జట్టు ఆటతీరు కూడా మారింది. 2019, 2020, 2021 సీజన్లలో వరుసగా మంచి ప్రదర్శన చేసింది. ఐపీఎల్ ప్రారంభమైన దాదాపు పన్నెండు సంవత్సరాల తర్వాత, 2020లో ఢిల్లీ క్యాపిటల్స్ తొలిసారి ఫైనల్కు చేరుకుంది. అయితే ముంబై ఇండియన్స్ చేతిలో ఓటమి చెందడంతో రన్నరప్గా నిలిచింది. 2021లో మరోసారి ప్లేఆఫ్స్కు చేరినా, 2022 నుంచి మళ్లీ జట్టు ప్రదర్శన క్షీణించింది. గత సీజన్లో కూడా లీగ్ దశలోనే ప్రయాణం ముగిసింది.
వివరాలు
బ్యాటింగ్ విభాగమే ప్రధాన బలం..
2026 ఐపీఎల్ సీజన్కు సిద్ధమవుతున్న ఢిల్లీ క్యాపిటల్స్ జట్టు బలంగా కనిపిస్తోంది. అయితే ఆ బలాన్ని మైదానంలో ప్రదర్శించగలదా లేదా అన్నది కీలకం. జట్టులో కేఎల్ రాహుల్ కీలక పాత్ర పోషించనున్నాడు. గత సీజన్లో అతను 539 పరుగులు సాధించి జట్టులో అత్యధిక పరుగులు చేసిన ఆటగాడిగా నిలిచాడు. రాహుల్తో పాటు బెన్ డకెట్, పాతుమ్ నిసాంక, పృథ్వీ షా, అభిషేక్ పొరేల్, నితీశ్ రాణా, డేవిడ్ మిల్లర్, సమీర్ రజ్వీ, ట్రిస్టన్ స్టబ్స్, అశుతోష్ శర్మ వంటి దూకుడు బ్యాటర్లు జట్టులో ఉన్నారు. కెప్టెన్ అక్షర్ పటేల్ కూడా బ్యాటింగ్, బౌలింగ్ రెండింటిలోనూ జట్టుకు మద్దతు ఇవ్వగలడు.
వివరాలు
స్టార్క్పై సందిగ్ధత..
బ్యాటింగ్తో పాటు బౌలింగ్ విభాగం కూడా బలంగా ఉన్నప్పటికీ, ఆస్ట్రేలియా పేసర్ మిచెల్ స్టార్క్ ఆడతాడా లేదా అన్న అనుమానం జట్టులో కొంత ఆందోళన కలిగిస్తోంది. నటరాజన్, ముకేశ్ కుమార్లతో పాటు దేశీయ క్రికెట్లో మెరుగైన ప్రదర్శనతో వేలంలో రూ. 8.4 కోట్లకు దక్కిన కశ్మీర్ పేసర్ అకిబ్ నబీపై కూడా భారీ ఆశలు పెట్టుకున్నారు. స్పిన్ విభాగంలో అక్షర్ పటేల్, కుల్దీప్ యాదవ్, విప్రజ్ నిగమ్ ఉన్నారు కాబట్టి ఆ విభాగం బలంగా ఉంది. మొత్తంగా చూస్తే అన్ని ఉన్నప్పటికీ ఫలితం రాకపోవడం ఢిల్లీ పరిస్థితిని ప్రతిబింబిస్తోంది. ఐపీఎల్ 19వ సీజన్లో మెరుగైన ప్రదర్శన చేసి టైటిల్ గెలవాలనే లక్ష్యంతో ఢిల్లీ బరిలోకి దిగుతోంది. వారి కల ఈసారి నెరవేరాలని ఆశిద్దాం.