England Cricket Board: ఇంగ్లాండ్ క్రికెట్ బోర్డు కొత్త సెంట్రల్ కాంట్రాక్టులు విడుదల
ఈ వార్తాకథనం ఏంటి
క్రికెట్ ప్రపంచంలో 'సెంట్రల్ కాంట్రాక్టులు' అనేవి ఆటగాళ్లకు బోర్డు చెల్లించే వేతనాలు, ప్రోత్సాహకాలు, హక్కులకు సంబంధించిన ముఖ్యమైన ఒప్పందాలు. తాజాగా, ఇంగ్లాండ్ అండ్ వేల్స్ క్రికెట్ బోర్డు (ECB) 2025-26 సీజన్‌కు సంబంధించిన కొత్త సెంట్రల్ కాంట్రాక్ట్ జాబితాను అధికారికంగా ప్రకటించింది. ఈ సారి మొత్తం 30 మంది పురుషుల అంతర్జాతీయ క్రికెటర్లకు కాంట్రాక్టులు ఇచ్చేందుకు బోర్డు నిర్ణయం తీసుకుంది. అందులో 14 మంది ఆటగాళ్లు రెండేళ్ల కాంట్రాక్టులపై, అలాగే 12 మంది ఒక్క సంవత్సరపు ఒప్పందాలపై సంతకం చేశారు. ఇప్పుడు ఈ జాబితాలో ఉన్నవారు ఎవరు, లేక ఈసారి అవకాశం కోల్పోయిన వారు ఎవరు అనేది చూద్దాం.
వివరాలు
ఆరుగురి కాంట్రాక్టులు రద్దు
తాజా జాబితాలో ఇంగ్లాండ్ క్రికెట్ బోర్డు ఆరుగురి పేర్లు తొలగించింది. గత సీజన్‌లో సెంట్రల్ కాంట్రాక్ట్ ఉన్నప్పటికీ, ఈసారి వారికి కొనసాగింపు ఇవ్వలేదు. కాంట్రాక్టు రద్దైన ఆటగాళ్లు: జానీ బెయిర్‌స్టో, జాక్ లీచ్, లియామ్ లివింగ్‌స్టోన్, ఓలీ స్టోన్, రీస్ టోప్లీ, జాన్ టర్నర్. అదేవిధంగా, అంతర్జాతీయ క్రికెట్‌కు వీడ్కోలు పలికిన క్రిస్ వోక్స్ పేరును కూడా బోర్డు చేర్చలేదు. ఇక ఈసారి సెంట్రల్ కాంట్రాక్ట్ జాబితాలోకి కొత్తగా చేరిన ఆటగాళ్లు: సోనీ బేకర్, లియామ్ డాసన్, సాకిబ్ మహమూద్, జామీ ఓవర్టన్, ల్యూక్ వుడ్.
వివరాలు
బెన్ స్టోక్స్‌కి రెండేళ్ల కాంట్రాక్ట్ - యాషెస్‌పై స్పష్టత
ఇంగ్లాండ్ టెస్ట్ జట్టు కెప్టెన్ బెన్ స్టోక్స్ 2027 వరకు అమలులో ఉండే రెండేళ్ల సెంట్రల్ కాంట్రాక్టుపై సంతకం చేశాడు. దీని ద్వారా ఆయన 2027లో స్వదేశంలో జరగనున్న యాషెస్ సిరీస్‌లో ఆడాలనే ఉద్దేశాన్ని స్పష్టం చేసినట్లు క్రీడా విశ్లేషకులు భావిస్తున్నారు. గత ఏడాది గాయాలతో బాధపడిన స్టోక్స్, ప్రధానంగా టెస్ట్ క్రికెట్‌పైనే దృష్టి సారించాడు. ఈ కొత్త ఒప్పందం ద్వారా తన భవిష్యత్ ప్రణాళికలు, జట్టుపై తన కట్టుబాటు మరింత బలంగా చూపించాడు. ఇక ఇంగ్లాండ్ హెడ్ కోచ్ బ్రెండన్ మెకల్లమ్ కాంట్రాక్ట్ కూడా 2027 చివరి వరకు కొనసాగనుంది.
వివరాలు
ఇంగ్లాండ్ క్రికెట్ బోర్డు - 2025-26 సెంట్రల్ కాంట్రాక్టుల పూర్తి జాబితా
రెండేళ్ల సెంట్రల్ కాంట్రాక్ట్ పొందిన వారు: జోఫ్రా ఆర్చర్, గస్ అట్కిన్సన్, జాకబ్ బెథెల్, హ్యారీ బ్రూక్, జోస్ బట్లర్, బ్రైడాన్ కార్స్, సామ్ కుర్రాన్, బెన్ డకెట్, విల్ జాక్స్, ఆదిల్ రషీద్, జో రూట్, జేమీ స్మిత్,బెన్ స్టోక్స్, జోష్ టంగ్. ఒక సంవత్సరపు సెంట్రల్ కాంట్రాక్ట్ పొందిన వారు: రెహాన్ అహ్మద్, సోనీ బేకర్, షోయబ్ బషీర్, జాక్ క్రాలీ, లియామ్ డాసన్, సాకిబ్ మహమూద్, జామీ ఓవర్టన్,ఓలీ పోప్,మాథ్యూ పాట్స్, ఫిల్ సాల్ట్,ల్యూక్ వుడ్, మార్క్ వుడ్. ఇది తాజా సీజన్ కోసం ఇంగ్లాండ్ క్రికెట్ బోర్డు ప్రకటించిన పూర్తి కాంట్రాక్ట్ జాబితా. కొత్త ఆటగాళ్లకు వచ్చిన అవకాశాలు,అనుభవజ్ఞుల కాంట్రాక్ట్‌ల రద్దు.. రెండూ అభిమానుల్లో చర్చనీయాంశాలుగా మారాయి.