Hardik Pandya Birthday: పేదరికం నుంచి కోట్ల సంపద వరకు.. హార్దిక్ పాండ్యా సక్సెస్ స్టోరీ ఇదే!
ఈ వార్తాకథనం ఏంటి
భారత క్రికెట్ జట్టు స్టార్ ఆల్‌రౌండర్ హార్దిక్ పాండ్యా నేడు తన 33వ పుట్టినరోజు జరుపుకుంటున్నాడు. సాధారణ కుటుంబంలో జన్మించిన అతడు.. ఎన్నో కష్టాలను ఎదుర్కొని భారత క్రికెట్‌లో సూపర్‌స్టార్‌గా ఎదిగాడు. బ్యాటింగ్, బౌలింగ్‌ రెండింటిలోనూ అద్భుత ప్రదర్శన చేస్తూ జట్టుకు సమతుల్యతను అందిస్తున్నాడు. ప్రస్తుతం భారత జట్టులో కీలక ఆల్‌రౌండర్‌గా గుర్తింపు పొందాడు. అయితే గాయాలు అతడి కెరీర్‌ను అప్పుడప్పుడు ఇబ్బందులకు గురిచేస్తున్నాయి. ప్రస్తుతం కూడా గాయం కారణంగా టీమిండియా సెటప్‌కు దూరంగా ఉన్నప్పటికీ.. త్వరలోనే పూర్తి ఫిట్‌నెస్‌తో తిరిగి జట్టులోకి వస్తాడని అభిమానులు ఆశిస్తున్నారు. ఈ ప్రత్యేక సందర్భంలో హార్దిక్ పాండ్యా కష్టాల నుంచి కోట్ల రూపాయల సంపదను సంపాదించే స్థాయికి ఎలా ఎదిగాడో తెలుసుకుందాం.
వివరాలు
ఆర్థిక ఇబ్బందుల మధ్య బాల్యం..
హార్దిక్ పాండ్యా ప్రారంభ జీవితం ఎన్నో కష్టాలతో సాగింది. అతడి తండ్రి హిమాన్షు పాండ్యా సూరత్‌లో కార్ ఫైనాన్స్ వ్యాపారం చేసేవారు.
అయితే ఆ వ్యాపారంలో తీవ్ర నష్టాలు రావడంతో కుటుంబం వడోదరకు మారాల్సి వచ్చింది. దీంతో కుటుంబం ఆర్థికంగా తీవ్ర ఇబ్బందులను ఎదుర్కొంది.
పరిస్థితులు ప్రతికూలంగా మారడంతో హార్దిక్ స్కూల్ చదువు కూడా మధ్యలోనే ఆగిపోయింది.
ఆర్థిక కష్టాలు ఎంత తీవ్రంగా ఉండేవంటే.. హార్దిక్, అతడి అన్న కృణాల్ పాండ్యా కొన్నిసార్లు కేవలం మ్యాగీ తింటూ రోజంతా గడిపేవారు.
క్రికెట్‌పై ఎంతో ఆసక్తి ఉన్నప్పటికీ, సొంతంగా క్రికెట్ కిట్ కొనుగోలు చేసే స్థోమత కూడా వారికి ఉండేది కాదు.
వివరాలు
లక్ష్యాన్ని ఎప్పుడూ వదులుకోలేదు
దీంతో ఇతరుల దగ్గర కిట్ తీసుకుని క్రికెట్ ఆడేవారు. కొద్దిపాటి డబ్బులు సంపాదించేందుకు దూర ప్రాంతాలకు వెళ్లి మరీ మ్యాచ్‌లలో పాల్గొనేవారు.
అయినప్పటికీ హార్దిక్ తన లక్ష్యాన్ని ఎప్పుడూ వదులుకోలేదు. అవసరమైన వనరులు లేకపోయినా నిరాశ చెందకుండా కష్టపడ్డాడు.
మొదట స్థానిక టోర్నమెంట్లలో ఆడుతూ తన ప్రతిభను నిరూపించుకున్నాడు.
ఆ తర్వాత రాష్ట్ర జట్టులో చోటు సంపాదించి.. అక్కడి నుంచి ఇండియన్ ప్రీమియర్ లీగ్‌ (ఐపీఎల్‌) వరకు ఎదిగాడు.
వివరాలు
ఐపీఎల్‌తో మారిన హార్దిక్ పాండ్యా జీవితం..
2015లో ముంబై ఇండియన్స్‌తో ఒప్పందం కుదుర్చుకోవడం హార్దిక్ పాండ్యా జీవితంలో కీలక మలుపుగా మారింది. ఐపీఎల్‌లో తన ప్రతిభను నిరూపించుకున్న కొద్ది నెలల్లోనే భారత జాతీయ జట్టులోకి కూడా అడుగుపెట్టాడు.
అక్కడి నుంచి అతడి క్రికెట్ ప్రయాణం కొత్త పుంతలు తొక్కింది. బ్యాటింగ్‌తో పాటు బౌలింగ్‌లోనూ తనదైన ముద్ర వేసిన హార్దిక్.. టీమిండియాలో కీలక ఆటగాడిగా ఎదిగాడు.
తన ఆల్‌రౌండ్ ప్రదర్శనలతో జట్టుకు విలువైన సేవలు అందిస్తూ అంతర్జాతీయ క్రికెట్‌లో ప్రత్యేక గుర్తింపు సంపాదించుకున్నాడు.
మైదానంలో సాధించిన విజయాలతో పాటు హార్దిక్‌కు పేరు, ప్రఖ్యాతులు, సంపద కూడా పెరిగాయి.
ఐపీఎల్‌తో పాటు భారత జట్టు తరఫున అతడు చూపించిన ప్రతిభ కారణంగా పలు ప్రముఖ బ్రాండ్లు అతడితో ఒప్పందాలు చేసుకునేందుకు ఆసక్తి చూపించాయి.
వివరాలు
లగ్జరీ కార్లు, ఖరీదైన వాచ్‌లు..
ప్రకటనల కోసం కోట్ల రూపాయల విలువైన డీల్స్ కుదిరాయి. ఒకప్పుడు ఆర్థిక ఇబ్బందులతో సతమతమైన హార్దిక్.. నేడు తనకు ఇష్టమైన విలాసవంతమైన జీవనశైలిని ఆస్వాదిస్తున్నాడు.
ఒకప్పుడు పూట గడవడమే కష్టంగా ఉన్న హార్దిక్ పాండ్యా.. ఇప్పుడు కోట్ల రూపాయల విలువైన గడియారాలను ధరిస్తున్నాడు. ఖరీదైన కార్లను వినియోగిస్తూ విలాసవంతమైన జీవితాన్ని గడుపుతున్నాడు.
గతంలో క్రికెట్ కిట్ కొనుగోలు చేయడానికి కూడా ఇబ్బందులు ఎదుర్కొన్న అతడు.. ఇప్పుడు విదేశీ పర్యటనలకు వెళ్లినప్పుడు తన ఫిట్‌నెస్‌కు ఎలాంటి ఆటంకం కలగకుండా చూసుకునేందుకు సొంత ఖర్చులతో కోచ్‌ను కూడా వెంట తీసుకెళ్తున్నాడు.
నివేదికల ప్రకారం హార్దిక్ పాండ్యా నికర ఆస్తుల విలువ సుమారు రూ.95 కోట్ల నుంచి రూ.120 కోట్ల మధ్య ఉంటుందని అంచనా.
వివరాలు
విలాసవంతమైన ఇళ్లు.. భారీ కార్లు, వాచ్‌ల కలెక్షన్..
ఐపీఎల్‌లో ఆడటం, బీసీసీఐ సెంట్రల్ కాంట్రాక్ట్ ద్వారా లభించే పారితోషికం అతడి ప్రధాన ఆదాయ వనరులుగా ఉన్నాయి.
వీటితో పాటు బోట్, రిలయన్స్, ఎనర్జీ డ్రింక్స్ వంటి పలు ప్రముఖ బ్రాండ్లతో హార్దిక్‌కు వాణిజ్య ఒప్పందాలు ఉన్నాయి.
ఈ డీల్స్ ద్వారా కూడా అతడు కోట్ల రూపాయల ఆదాయాన్ని సంపాదిస్తున్నాడు.
హార్దిక్ పాండ్యా ఆస్తుల్లో ముంబై, వడోదరలో ఉన్న విలాసవంతమైన ఇళ్లు కూడా ఉన్నాయి.
వీటితో పాటు స్టార్టప్‌లలో ఈక్విటీ పెట్టుబడులు, లగ్జరీ కార్లు, ఖరీదైన వాచ్‌ల భారీ కలెక్షన్ అతడి సొంతం. ఒకప్పుడు ఆర్థిక ఇబ్బందుల కారణంగా కనీస అవసరాలను తీర్చుకోవడానికి కూడా కష్టపడిన హార్దిక్.. తన ప్రతిభ, పట్టుదల, నిరంతర శ్రమతో ఈ స్థాయికి చేరుకున్నాడు.