సీఎస్కే అభిమానులకు గుడ్ న్యూస్.. వచ్చే ఏడాది కూడా ఆడనున్న ధోని
టీమిండియా మాజీ కెప్టెన్ ఎంఎస్ ధోనికి ఉన్న క్రేజ్ గురించి ప్రత్యేకంగా చెప్పనక్కర్లేదు. ప్రస్తుతం ధోని అభిమానులు సంబరాలు చేసుకొనే మంచి న్యూస్ అందింది. ధోని ఈ ఐపీఎల్ తర్వాత రిటైరవుతాడా లేదా? వచ్చే ఏడాది కూడా అతడు ఆడతాడా? అన్న ప్రశ్నలకు చైన్నై సూపర్ కింగ్స్ సీఈఓ కాశీ విశ్వనాథ్ సమాధానమిచ్చారు. వచ్చే సీజన్ లో నూ ధోని ఆడతాడని, సీఎస్కే అభిమానులు పెద్ద సంఖ్యలో వచ్చి జట్టుకు మద్దతు తెలపాలని కోరాడు. 2024లోనూ ధోని మైదానంలో తప్పకుండా అడుగు పెడుతానని, తనకు ఆ నమ్మకం ఉందని కాశీ విశ్వనాథ్ వెల్లడించారు. కేకేఆర్ తో మ్యాచ్ ముగిసిన తర్వాత సీఎస్కే ఈ వీడియోను పోస్టు చేసింది.
మోకాలి గాయంతో బాధపడుతున్న ధోని
ఈ సీజన్లో ఓ మ్యాచ్ టాస్ సందర్భంగా ఇదే తన చివరి సీజన్ అని మీరే డిసైడ్ అయ్యారా అని హోస్ట్ తో ధోని మాట్లాడిన విషయం తెలిసిందే. మరోవైపు ధోని ఎప్పుడు రిటైర్ కావాలన్న నిర్ణయం పూర్తిగా అతనిదేనని, ఎందుకు ఆ ప్రశ్నను పదే పదే అడిగి విసిగిస్తారని మాజీ క్రికెటర్ సెహ్వాగ్ ఇటీవల కామెంట్ చేశాడు. ప్రస్తుతం ధోని మోకాలి గాయంతో బాధపడుతున్నాడు. దీంతో అతడు చివర్లో బ్యాటింగ్ చేస్తూ భారీ షాట్లు అడుతున్నాడు. డెత్ ఓవర్లలో సిక్సర్లు బాదుతూ జట్టుకు అద్భుతమైన సహకారాన్ని అందిస్తున్నాడు.
