IPL 2026: ఐపీఎల్ 2026 షెడ్యూల్ ఖరారు.. మార్చి 26న ఐపీఎల్ 19వ సీజన్ ఆరంభం
ఈ వార్తాకథనం ఏంటి
ఇండియన్ ప్రీమియర్ లీగ్ (ఐపీఎల్) 19వ సీజన్ నిర్వహణకు భారత క్రికెట్ నియంత్రణ మండలి (బీసీసీఐ) ఏర్పాట్లు పూర్తి చేస్తోంది. 2026 ఐపీఎల్ సీజన్ను మార్చి 26 నుంచి మే 31 వరకు నిర్వహించనున్నట్లు బీసీసీఐ ఫ్రాంచైజీలకు అధికారికంగా తెలియజేసింది. అబుదాబిలో మంగళవారం జరగనున్న ఆటగాళ్ల మినీ వేలానికి ముందుగా జరిగిన సమావేశంలో ఐపీఎల్ సీడీవో హేమంగ్ అమిన్ ఈ విషయాలను వెల్లడించినట్లు 'క్రిక్బజ్' తన కథనంలో పేర్కొంది. డిఫెండింగ్ చాంపియన్ రాయల్ ఛాలెంజర్స్ బెంగళూరు (ఆర్సీబీ) తొలి మ్యాచ్తో ఈ సీజన్కు తెరలేవనుంది.
Details
నేడు అబుదాబిలో మినీ వేలం
అయితే బెంగళూరులోని చిన్నస్వామి స్టేడియంలో మ్యాచ్లు నిర్వహించగలమా లేదా అన్న దానిపై ఇప్పటికీ స్పష్టత లేదు. గతంలో టైటిల్ విజయోత్సవాల సందర్భంగా జరిగిన తొక్కిసలాట ఘటన నేపథ్యంలో స్టేడియం లభ్యతపై అనిశ్చితి నెలకొంది. భద్రతా ప్రమాణాలు కచ్చితంగా పాటించినప్పుడే మ్యాచ్లకు అనుమతి ఇస్తామని కర్ణాటక ప్రభుత్వం షరతులతో కూడిన గ్రీన్సిగ్నల్ ఇచ్చినట్లు సమాచారం. ఇదిలా ఉండగా, అబుదాబిలోని ఎతిహాద్ ఎరీనాలో నేడు జరగనున్న మినీ వేలంలో మొత్తం 10 ఐపీఎల్ ఫ్రాంచైజీలు పాల్గొననున్నాయి. ఈ వేలంలో 77 స్లాట్ల కోసం 359 మంది ఆటగాళ్లు పోటీ పడుతున్నారు.
Details
31 మంది విదేశీ క్రికెటర్లు
వీరిలో 31 మంది విదేశీ క్రికెటర్లు ఉండటం గమనార్హం. కోల్కతా నైట్ రైడర్స్ (కేకేఆర్) అత్యధికంగా 13 స్లాట్లను భర్తీ చేయాల్సి ఉండగా, సన్రైజర్స్ హైదరాబాద్ (ఎస్ఆర్హెచ్) 10 స్లాట్లను నింపుకోవాల్సి ఉంది. ఈ వేలంలో ఆస్ట్రేలియా ఆల్రౌండర్ కామెరాన్ గ్రీన్ ప్రధాన ఆకర్షణగా నిలవనున్నాడని అంచనా వేస్తున్నారు. అతనికి రూ. 25 కోట్లకు పైగా ధర పలికే అవకాశం ఉందని క్రికెట్ వర్గాలు భావిస్తున్నాయి. అంతేకాదు, లియామ్ లివింగ్స్టోన్, రవి బిష్ణోయ్ వంటి స్టార్ ఆటగాళ్లపై కూడా ఫ్రాంచైజీలు భారీగా ఖర్చు చేసే అవకాశాలు ఉన్నాయని సమాచారం.