IPL: ఐపీఎల్ లవర్స్కు షాక్..ఆ ఇబ్బందులు తప్పవా?
ఈ వార్తాకథనం ఏంటి
పశ్చిమాసియాలో పెరుగుతున్న ఉద్రిక్త పరిస్థితులు క్రికెట్పై కూడా ప్రభావం చూపుతున్నాయి. ఈమధ్యనే టీ20 వరల్డ్ కప్ కోసం భారత్కు వచ్చిన కొన్ని జట్లు స్వదేశాలకు చేరుకోవడంలో ఇబ్బందులు ఎదుర్కొన్నాయి. ముఖ్యంగా వెస్టిండీస్, దక్షిణాఫ్రికా ఆటగాళ్లు కొన్ని రోజుల పాటు కోల్కతాలోనే నిలిచిపోవాల్సి వచ్చింది. దీనిపై పలువురు ఆటగాళ్లు అసంతృప్తి వ్యక్తం చేశారు. ఇంగ్లాండ్ జట్టును ముందుగా పంపి, తర్వాత వెస్టిండీస్, దక్షిణాఫ్రికా ఆటగాళ్లను పంపడంపై అంతర్జాతీయ క్రికెట్ మండలిపై విమర్శలు కూడా వచ్చాయి. ఈ పరిస్థితులు కొనసాగితే వచ్చే ఏడాది జరగనున్న భారత ప్రీమియర్ లీగ్ (ఐపీఎల్) పోటీలపై కూడా ప్రభావం పడవచ్చని భావిస్తున్నారు.
వివరాలు
సిరీస్ వాయిదా తప్పదా?
ముఖ్యంగా ఇరాన్-ఇజ్రాయెల్ మధ్య కొనసాగుతున్న ఉద్రిక్తతల కారణంగా కొన్ని ముఖ్యమైన విమాన మార్గాలు మూసివేసిన సంగతి తెలిసిందే. ఈ తరుణంలో ఐపీఎల్ ఆడే విదేశీ ఆటగాళ్ల రాక మరింత ఆలస్యమయ్యే అవకాశాలు ఉన్నాయి. ఇప్పటికే ఈ నెల యునైటెడ్ అరబ్ ఎమిరేట్స్లో జరగాల్సిన శ్రీలంక-అఫ్గానిస్థాన్ సిరీస్ వాయిదా పడింది. దుబాయ్, దోహా వంటి ముఖ్య రవాణా కేంద్రాల్లో విమానాల రాకపోకలపై పరిమితులు ఉన్నాయి. దీంతో విదేశీ ఆటగాళ్లను సమయానికి రప్పించడం కష్టమవుతుందని కొన్ని జట్ల నిర్వాహకులు ఆందోళన వ్యక్తం చేస్తున్నారు.
వివరాలు
వంట గ్యాస్ కొరతతో ఆ ఇబ్బంది
ముఖ్యంగా దక్షిణాఫ్రికా, వెస్టిండీస్ ఆటగాళ్ల రాక కష్టతరమయ్యేలా ఉంది. అయితే కొన్ని జట్లు మాత్రం ఆశాభావంతో ఉన్నాయి. వెస్టిండీస్కు చెందిన అకీల్ హోసిన్, దక్షిణాఫ్రికా ఆటగాడు బ్రెవిస్లు సమయానికి జట్టుతో కలుస్తారని చెన్నై జట్టు ప్రధాన కార్యనిర్వాహక అధికారి కాశీ విశ్వనాథన్ తెలిపారు. అయితే విమాన ప్రయాణ ఖర్చులు పెరగడంతో జట్లపై అదనపు భారం పడే అవకాశం కూడా ఉంది. మరోవైపు వంటగ్యాస్ కొరత కూడా జట్లకు ఆతిథ్యం ఇచ్చే హోటళ్లకు సవాల్గా మారుతోంది.
వివరాలు
పూర్తి షెడ్యూల్ ఎప్పుడంటే?
పోటీలను నిర్ణీత షెడ్యూల్ ప్రకారమే ప్రారంభించాలనే లక్ష్యంతో భారత క్రికెట్ నియంత్రణ మండలి పరిస్థితిని గమనిస్తోంది. ప్రస్తుతం తొలి ఇరవై మ్యాచ్ల షెడ్యూల్ మాత్రమే ప్రకటించారు. మిగతా మ్యాచ్ల తేదీలను ఇంకా వెల్లడించలేదు. పోటీల ప్రారంభ మ్యాచ్లో ప్రస్తుత విజేత బెంగళూరు జట్టు, హైదరాబాద్ జట్టుతో తలపడనుంది. తదుపరి రోజు ముంబై జట్టు, కోల్కతా జట్టుతో పోటీ పడుతుంది. తమిళనాడు, అసోం, పశ్చిమ బెంగాల్ రాష్ట్రాల ఎన్నికల తేదీలు ప్రకటించిన తర్వాత పూర్తి షెడ్యూల్ విడుదల చేయనున్నారు. పోటీలు వాయిదా పడవచ్చన్న వార్తలను భారత క్రికెట్ నియంత్రణ మండలి ఖండించింది. నిర్ణీత సమయానికే పోటీలు నిర్వహిస్తామని ఉపాధ్యక్షుడు రాజీవ్ శుక్లా తెలిపారు.