KL Rahul: కేఎల్‌ రాహుల్‌ అవుట్.. భారత్‌ 'ఎ' జట్టులోకి జార్ఖండ్‌ యువ సంచలనం!
ఈ వార్తాకథనం ఏంటి
న్యూజిలాండ్‌ పర్యటనలో భాగంగా భారత్‌-'ఎ' జట్టు ఆతిథ్య జట్టుతో అనధికారిక టెస్టు సిరీస్‌లో తలపడనుంది. అక్టోబరు 24 నుంచి నవంబరు 10 వరకు జరిగే ఈ సిరీస్‌లో ఇరు జట్లు మూడు మ్యాచ్‌లు ఆడనున్నాయి. ఈ సిరీస్‌ కోసం భారత క్రికెట్‌ నియంత్రణ మండలి (BCCI) ఇప్పటికే జట్టును ప్రకటించింది. తాజాగా భారత్‌-'ఎ' జట్టులో కీలక మార్పు చోటుచేసుకోనున్నట్లు తెలుస్తోంది. సీనియర్‌ బ్యాటర్ కేఎల్‌ రాహుల్‌ స్థానంలో జార్ఖండ్‌కు చెందిన యువ బ్యాటర్ శిఖర్‌ మోహన్‌కు అవకాశం దక్కినట్లు సమాచారం.
వివరాలు
సారథిగా ధ్రువ్‌ జురెల్
కేఎల్‌ రాహుల్‌, యశస్వి జైస్వాల్‌, రిషభ్‌ పంత్‌ వంటి సీనియర్‌ ఆటగాళ్లు జట్టులో ఉన్నప్పటికీ.. భారత్‌-'ఎ' జట్టు కెప్టెన్సీ బాధ్యతలను బీసీసీఐ ధ్రువ్‌ జురెల్‌కు అప్పగించింది.
అయితే గాయం కారణంగా రిషభ్‌ పంత్‌ ఇప్పటికే ఈ సిరీస్‌కు దూరమైనట్లు వార్తలు వచ్చాయి.
తాజాగా కేఎల్‌ రాహుల్‌ కూడా తొలి అనధికారిక టెస్టు అనంతరం జట్టు నుంచి తప్పుకోనున్నట్లు సమాచారం.
వివరాలు
అందుకే భారత్‌-'ఎ' జట్టుకు రాహుల్‌ దూరం!
టీమిండియా కూడా ప్రస్తుతం న్యూజిలాండ్‌ పర్యటనలో ఉన్న విషయం తెలిసిందే. అక్టోబరు 22 నుంచి డిసెంబరు 1 వరకు కివీస్‌తో భారత్‌ ఐదు టీ20లు, ఐదు వన్డేలు, రెండు టెస్టు మ్యాచ్‌లు ఆడనుంది.
ఈ పర్యటనలో తొలుత టీ20 సిరీస్‌ ప్రారంభం కాగా.. నవంబరు 4 నుంచి వన్డే సిరీస్‌ మొదలుకానుంది. ఈ సిరీస్‌ల కోసం బీసీసీఐ ఇప్పటికే రెండు జట్లను ఎంపిక చేసింది.
వన్డే సిరీస్‌లో భాగంగా కేఎల్‌ రాహుల్‌ తొలి మూడు మ్యాచ్‌లు ఆడాల్సి ఉంది.
ఈ నేపథ్యంలో భారత్‌-'ఎ' జట్టు తరఫున జరగనున్న రెండో, మూడో అనధికారిక టెస్టులకు అతడు అందుబాటులో ఉండటం లేదని సమాచారం.
వివరాలు
శిఖర్‌ మోహన్‌కు తొలి పిలుపు.. రంజీల్లో పరుగుల వరద
దీంతో రాహుల్‌ స్థానంలో జార్ఖండ్‌ టాపార్డర్‌ బ్యాటర్ శిఖర్‌ మోహన్‌కు సెలక్టర్లు తొలిసారి పిలుపునిచ్చినట్లు తెలుస్తోంది.
21 ఏళ్ల శిఖర్‌ మోహన్‌ దేశవాళీ క్రికెట్‌లో అద్భుత ప్రదర్శనతో ఆకట్టుకుంటున్నాడు. 2025-26 రంజీ ట్రోఫీ సీజన్‌లో 12 ఇన్నింగ్స్‌ ఆడి 613 పరుగులు సాధించాడు.
ఇందులో ఓ డబుల్‌ సెంచరీ కూడా ఉండటం విశేషం. తాజా రంజీ సీజన్‌లో ఇప్పటికే మూడు ఇన్నింగ్స్‌లు పూర్తి చేసుకున్న అతడు.. రెండు శతకాల సాయంతో 297 పరుగులు చేశాడు.
ఈ క్రమంలో ప్రస్తుత రంజీ ఎడిషన్‌లో తొలి శతకం నమోదు చేసిన క్రికెటర్‌గా శిఖర్‌ మోహన్‌ నిలిచాడు.
వివరాలు
తన ప్రతిభను చాటుకున్న యువ బ్యాటర్
రంజీల్లోనే కాకుండా ఇతర దేశవాళీ టోర్నీల్లోనూ ఈ జార్ఖండ్‌ యువ బ్యాటర్ తన ప్రతిభను చాటుకున్నాడు.
ఇరానీ కప్‌లో అర్ధ శతకం సాధించగా.. దులీప్‌ ట్రోఫీలో రెండు హాఫ్‌ సెంచరీలు నమోదు చేశాడు. అలాగే, జార్ఖండ్‌ టీ20 లీగ్‌లో తొమ్మిది ఇన్నింగ్స్‌లు ఆడి 322 పరుగులతో అదరగొట్టాడు.
దేశవాళీ క్రికెట్‌లో నిలకడగా రాణిస్తున్న శిఖర్‌ మోహన్‌కు ఈ ప్రదర్శనల ఫలితంగానే భారత్‌-'ఎ' జట్టులో చోటు దక్కినట్లు తెలుస్తోంది.