Lance Morris Injury: ఆసిస్‌ బౌలర్‌కి ఊహించని షాక్‌...ఎంగేజ్‌మెంట్‌లో తీవ్రగాయం
ఈ వార్తాకథనం ఏంటి
ఆస్ట్రేలియా యువ ఫాస్ట్ బౌలర్ లాన్స్ మారిస్‌కు క్రికెట్‌లోకి ఘనంగా పునరాగమనం చేసిన ఆనందం ఎక్కువసేపు నిలవలేదు. దాదాపు రెండేళ్ల విరామం తర్వాత అద్భుతంగా బరిలోకి దిగిన అతడు.. అదే రోజు రాత్రి తన ఎంగేజ్‌మెంట్ పార్టీలో ప్రమాదానికి గురయ్యాడు. ఈ ఘటనలో ఎడమ చేతికి తీవ్ర గాయం కావడంతో శస్త్రచికిత్స చేయించుకోవాల్సి వచ్చింది. వైద్యుల అంచనా ప్రకారం మారిస్ సుమారు నాలుగు వారాల పాటు క్రికెట్‌కు దూరంగా ఉండనున్నాడు. ఒకే రోజు మూడు వికెట్లు తీసి అందరి దృష్టిని ఆకర్షించిన అతడికి ఇలా గాయం కావడం ఆస్ట్రేలియా క్రికెట్ వర్గాలను నిరాశకు గురిచేసింది.
Details
రీఎంట్రీలో అదరగొట్టిన మారిస్
వెన్నెముక గాయానికి శస్త్రచికిత్స కారణంగా గత 18-20 నెలలుగా ఆటకు దూరంగా ఉన్న మారిస్ శనివారం మళ్లీ మైదానంలోకి వచ్చాడు.
ఇంగ్లండ్ వన్డే జట్టుతో జరిగిన వార్మప్ మ్యాచ్‌లో వెస్ట్రన్ ఆస్ట్రేలియా తరఫున ఆడిన అతడు తన పేస్‌తో ప్రత్యర్థి బ్యాటర్లను ఇబ్బంది పెట్టాడు.
10 ఓవర్లలో కేవలం 29 పరుగులు ఇచ్చి మూడు వికెట్లు పడగొట్టాడు. ఇందులో జో రూట్, టామ్ బాంటన్ వంటి కీలక బ్యాటర్ల వికెట్లు ఉండటం విశేషం.
దీంతో మారిస్ తిరిగి తన రిథమ్ అందుకున్నాడనే అభిప్రాయం వ్యక్తమైంది.
Details
ఎంగేజ్‌మెంట్ పార్టీలో ప్రమాదం
మ్యాచ్ ముగిసిన కొన్ని గంటలకే మారిస్ తన తల్లిదండ్రుల ఇంట్లో జరిగిన ఎంగేజ్‌మెంట్ పార్టీలో ప్రమాదానికి గురయ్యాడు.
వేడుక సమయంలో అదుపుతప్పి పెద్ద గాజు వస్తువుపై పడటంతో అతడి ఎడమ చేతికి లోతైన గాయమైంది.
వెంటనే ఆసుపత్రికి తరలించగా సోమవారం వైద్యులు శస్త్రచికిత్స చేశారు. చికిత్స విజయవంతంగా పూర్తయినట్లు వెస్ట్రన్ ఆస్ట్రేలియా తెలిపింది.
Details
బీబీఎల్‌ నాటికి ఫిట్‌గా రావడమే లక్ష్యం
వెస్ట్రన్ ఆస్ట్రేలియా హై పర్ఫార్మెన్స్ మేనేజర్ కేడ్ హార్వే మాట్లాడుతూ వచ్చే వారం నుంచే మారిస్ బౌలింగ్ ప్రాక్టీస్ ప్రారంభించేలా ప్రణాళిక ఉందని తెలిపారు.
నాలుగు వారాల్లోపు తిరిగి మ్యాచ్ ఆడే స్థాయికి తీసుకురావాలని లక్ష్యంగా పెట్టుకున్నామని చెప్పారు.
డిసెంబర్ మధ్యలో ప్రారంభమయ్యే బిగ్ బాష్ లీగ్ (BBL) నాటికి అతడు పూర్తి ఫిట్‌నెస్ సాధిస్తాడని జట్టు ఆశిస్తోంది.
రీఎంట్రీతో వచ్చిన ఉత్సాహానికి ఈ గాయం బ్రేక్ వేసినా.. మారిస్ త్వరగా కోలుకుని మళ్లీ బంతితో మెరుస్తాడని అభిమానులు ఎదురుచూస్తున్నారు.