Nitish Kumar Reddy: దక్షిణాఫ్రికాతో టెస్టు సిరీస్‌కు దూరమైనా నితీశ్‌.. 'ఎ' జట్టుతో వన్డేలు ఆడనున్న ఆల్రౌండర్
ఈ వార్తాకథనం ఏంటి
గత ఏడాది టెస్టుల్లో అరంగేట్రం చేసిన తర్వాత నిరంతరం తుది జట్టులో చోటు దక్కించుకున్న ఆంధ్రప్రదేశ్‌ ఆల్రౌండర్ నితీష్ కుమార్‌ రెడ్డి, పూర్తిస్థాయి ఫిట్‌నెస్‌లో ఉన్నప్పటికీ రాబోయే దక్షిణాఫ్రికా టెస్టు సిరీస్‌కు దూరమయ్యాడు. అతనికి జట్టులో స్థానం లభించే అవకాశం తక్కువగా ఉండటంతో, ఈ సిరీస్‌ నుంచి విడుదల చేసినట్లు సమాచారం. ఇదే సమయంలో నితీశ్‌ భారత్‌-ఎ జట్టులో సభ్యుడిగా దక్షిణాఫ్రికా-ఎ జట్టుతో వన్డే సిరీస్‌లో పాల్గొనబోతున్నాడు. గురువారం ప్రారంభమయ్యే తొలి వన్డేతో పాటు, ఈ నెల 16, 19 తేదీల్లో మరో రెండు మ్యాచ్‌లు జరగనున్నాయి.
వివరాలు
స్పెషలిస్టు బ్యాటర్‌ను తీసుకోవడమే మంచిది: జట్టు యాజమాన్యం
గత సంవత్సరం ఆస్ట్రేలియా పర్యటనలో టెస్టుల్లో అడుగుపెట్టిన నితీశ్‌, తన తొలి సిరీస్‌లోనే శతకం సాధించి ఆకట్టుకున్నాడు. బౌలింగ్‌లోనూ తగిన స్థాయిలో ప్రదర్శన ఇచ్చాడు. అయితే, తరువాతి సిరీస్‌లలో స్థిరమైన ప్రదర్శన కనబరచలేకపోయాడు. ఇంగ్లాండ్‌ పర్యటన మధ్యలో గాయపడి స్వదేశానికి తిరిగి వచ్చాడు. దేశీయ సిరీస్‌ల్లోనూ అతని బౌలింగ్‌ అవసరం పెద్దగా లేకపోవడంతో చివరి సిరీస్‌లో కేవలం నాలుగు ఓవర్లు మాత్రమే వేయాల్సి వచ్చింది. బ్యాటింగ్‌లో కూడా పెద్దగా మెరుగు ప్రదర్శన చేయకపోవడంతో, జట్టు యాజమాన్యం స్పెషలిస్టు బ్యాటర్‌ను తీసుకోవడమే మంచిదని భావించినట్లు తెలుస్తోంది. ఈ నేపథ్యంలోనే దక్షిణాఫ్రికా టెస్టు సిరీస్‌ మొదలవుతున్న తరుణంలో నితీశ్‌ను జట్టులోంచి విడుదల చేశారు.
వివరాలు
జురెల్‌ కోసమే..:
జట్టు వర్గాల ప్రకారం, ''నితీశ్‌కు ఈ సిరీస్‌లో తుది జట్టులో స్థానం దక్కే అవకాశం లేదు. అతను గాయాలనుంచి కోలుకున్నప్పటికీ, మ్యాచ్‌ ప్రాక్టీస్‌ అవసరం ఉంది. అయిదు రోజుల పాటు ఊరికే కూర్చోబెట్టడం వల్ల లాభం లేదు. దాని బదులు 'ఎ' జట్టు తరఫున వన్డేలు ఆడితే.. దక్షిణాఫ్రికాతో వన్డే సిరీస్‌కు సన్నద్ధమయ్యేందుకు ఉపయోగపడుతుంది'' అని జట్టు వర్గాలు తెలిపాయి. దేశవాళీ సీజన్‌లో అద్భుత ఫామ్‌లో ఉన్న వికెట్‌ కీపర్‌-బ్యాటర్‌ ధ్రువ్‌ జురెల్‌ దక్షిణాఫ్రికాతో జరగనున్న తొలి టెస్టులో ఆడబోతున్నట్లు తెలుస్తోంది. ఇంగ్లాండ్‌ పర్యటనలో రిషబ్‌ పంత్‌ గాయపడిన సమయంలో జురెల్‌ వరుసగా మ్యాచ్‌లు ఆడాడు. ఇప్పుడు పంత్‌ తిరిగి ఫిట్‌గా అందుబాటులోకి రావడంతో జురెల్‌ స్థానంపై అనుమానాలు వ్యక్తమయ్యాయి.
వివరాలు
జురెల్‌ కోసమే..:
కానీ ఇటీవల అతను ఆడిన ఐదు ఫస్ట్‌క్లాస్‌ మ్యాచ్‌లలో 127*, 132*, 44, 125, 56, 140 పరుగులు చేయడంతో మరోసారి తన ఫామ్‌ను రుజువు చేశాడు. ముఖ్యంగా దక్షిణాఫ్రికా-ఎ జట్టుతో నాలుగు రోజుల మ్యాచ్‌లో రెండు ఇన్నింగ్స్‌ల్లోనూ సెంచరీలు సాధించడం అతనికి ప్రధాన బలం అయ్యింది. ఈ ప్రదర్శనలతో జురెల్‌ను తుది జట్టులోకి తీసుకోవడం తప్పనిసరి అయిందని, దాని ఫలితంగా నితీశ్‌ కుమార్‌ రెడ్డిని విడుదల చేసినట్లు తెలుస్తోంది. టీమ్‌ ఇండియా సహాయ కోచ్‌ టెన్‌ డస్కాటే కూడా దీన్ని ధ్రువీకరిస్తూ, ''జట్టు కూర్పు విషయంలో మేము స్పష్టతకు వచ్చాం. పంత్‌, జురెల్‌ ఇద్దరినీ పక్కన పెట్టడం సాధ్యం కాదు. ఈ టెస్టులో వారిద్దరూ బరిలో ఉండకపోతే ఆశ్చర్యమే'' అని తెలిపారు.
వివరాలు
స్పిన్‌ దాడికి సిద్ధం:
భారత బ్యాటర్లు దక్షిణాఫ్రికా స్పిన్నర్లను ఎదుర్కోవడానికి సిద్ధంగా ఉన్నారని, గత సంవత్సరం న్యూజిలాండ్‌తో టెస్టు సిరీస్‌లో ఎదురైన పరాజయం వారికి మంచి పాఠమైందని డస్కాటే పేర్కొన్నారు. ''మేము స్పిన్‌ను ఎదుర్కోవడానికి ప్రత్యేక ప్రణాళికతో సిద్ధమయ్యాం. పాకిస్థాన్‌తో జరిగిన సిరీస్‌లో దక్షిణాఫ్రికా స్పిన్నర్లు మంచి ప్రదర్శన ఇచ్చారు. ఈ సిరీస్‌లో కూడా వారు ముగ్గురు స్పిన్నర్లతో బరిలోకి దిగే అవకాశం ఉంది. వారిని ఎదుర్కోవడం సవాలే అయినా, వారు కూడా ఉపఖండ జట్టుతో ఆడుతున్నారనే విషయం గుర్తుంచుకోవాలి'' అని ఆయన అన్నారు.
వివరాలు
పంత్‌.. జోరుగా హుషారుగా
గాయం నుంచి పూర్తిగా కోలుకున్న వికెట్‌ కీపర్‌ బ్యాటర్‌ రిషబ్‌ పంత్‌, ఇటీవలే దక్షిణాఫ్రికా-ఎతో రెండు ఫస్ట్‌క్లాస్‌ మ్యాచ్‌లు ఆడి తన ఫిట్‌నెస్‌, ఫామ్‌ను చాటుకున్నాడు. ఇంగ్లాండ్‌ పర్యటనలో గాయపడి విరామం తీసుకున్న అతను, ఇప్పుడు సఫారీలతో జరిగే టెస్టు సిరీస్‌కు ముందు బలంగా సిద్ధమవుతున్నాడు. బుధవారం ఈడెన్‌ గార్డెన్స్‌లో జరిగిన ప్రాక్టీస్‌ సెషన్‌లో పంత్‌ ఎక్కువ సమయం నెట్స్‌లో గడిపి చెమటోడ్చాడు. అతను స్పిన్నర్లు వాషింగ్టన్‌ సుందర్‌, అక్షర్‌ పటేల్‌, రవీంద్ర జడేజా బౌలింగ్‌లను ధైర్యంగా ఎదుర్కొని, క్రీజు బయటకు వచ్చి బంతులను గాల్లోకి ఎగరేస్తూ సౌకర్యంగా షాట్లు ఆడాడు. అతని శక్తివంతమైన బ్యాటింగ్‌ జట్టుకు ధైర్యాన్నిచ్చేలా ఉందని జట్టు వర్గాలు పేర్కొన్నాయి.