Rishabh Pant: పంత్ రికార్డుల హ్యాట్రిక్.. ఒకే రోజు మూడు ఘనతలు!
ఈ వార్తాకథనం ఏంటి
శ్రీలంకతో కొలంబో వేదికగా జరుగుతున్న రెండో టెస్టులో టీమిండియా వికెట్ కీపర్ బ్యాటర్ రిషబ్ పంత్ అర్ధ శతకంతో మెరిశాడు. రెండో రోజు 89 బంతుల్లో 63 పరుగులు చేసిన పంత్.. తన ఇన్నింగ్స్లో 6 ఫోర్లు, 2 సిక్సర్లు బాదాడు. ఈ క్రమంలో ఒకే రోజు మూడు అరుదైన ఘనతలను తన ఖాతాలో వేసుకున్నాడు. టెస్టు క్రికెట్లో సిక్సర్ల విషయంలో ఆడమ్ గిల్క్రిస్ట్ను అధిగమించడంతో పాటు.. వరల్డ్ టెస్టు ఛాంపియన్షిప్ (డబ్ల్యూటీసీ) చరిత్రలో అత్యధిక పరుగులు చేసిన భారత బ్యాటర్గా శుభ్మన్ గిల్ను వెనక్కి నెట్టాడు. అలాగే విదేశీ లేదా తటస్థ వేదికల్లో భారత వికెట్ కీపర్గా అత్యధిక టెస్టు పరుగులు చేసిన ఆటగాడిగానూ ఎంఎస్ ధోనీ రికార్డును బద్దలు కొట్టాడు.
వివరాలు
గిల్క్రిస్ట్ను వెనక్కి నెట్టిన పంత్
రెండో టెస్టు రెండో రోజు పంత్ కొట్టిన రెండు సిక్సర్లతో టెస్టుల్లో అతడి మొత్తం సిక్సర్ల సంఖ్య 102కు చేరింది.
దీంతో ఆస్ట్రేలియా దిగ్గజం ఆడమ్ గిల్క్రిస్ట్ను అధిగమించాడు. గిల్క్రిస్ట్ 96 టెస్టుల్లో 100 సిక్సర్లు కొట్టగా.. పంత్ కేవలం 52 టెస్టుల్లోనే 102 సిక్సర్లు బాదడం విశేషం.
ఈ క్రమంలో టెస్టుల్లో అత్యధిక సిక్సర్లు కొట్టిన ఆటగాళ్ల జాబితాలో పంత్ మూడో స్థానానికి చేరుకున్నాడు.
ఈ జాబితాలో ఇంగ్లండ్ మాజీ కెప్టెన్ బెన్ స్టోక్స్ 138 సిక్సర్లతో అగ్రస్థానంలో ఉన్నాడు. న్యూజిలాండ్ మాజీ కెప్టెన్ బ్రెండన్ మెకల్లమ్ 107 సిక్సర్లతో రెండో స్థానంలో కొనసాగుతున్నాడు.
వివరాలు
డబ్ల్యూటీసీలో గిల్ను అధిగమించి..
వరల్డ్ టెస్టు ఛాంపియన్షిప్ చరిత్రలోనూ పంత్ కొత్త రికార్డు నెలకొల్పాడు. టీమిండియా కెప్టెన్ శుభ్మన్ గిల్ను వెనక్కి నెట్టి డబ్ల్యూటీసీలో అత్యధిక పరుగులు చేసిన భారత బ్యాటర్గా నిలిచాడు.
గిల్ 42 టెస్టుల్లో 2,917 పరుగులు చేయగా.. పంత్ 42 మ్యాచ్ల్లోనే 2,948 పరుగులు సాధించాడు.
డబ్ల్యూటీసీలో పంత్ 42 మ్యాచ్ల్లో 74 ఇన్నింగ్స్లు ఆడి 42.11 సగటుతో పరుగులు చేశాడు. అతడి ఖాతాలో 6 సెంచరీలు, 18 అర్ధ శతకాలున్నాయి.
వివరాలు
ధోనీ రికార్డునూ బద్దలు కొట్టాడు
విదేశీ లేదా తటస్థ వేదికల్లో భారత వికెట్ కీపర్గా అత్యధిక టెస్టు పరుగులు చేసిన ఆటగాడిగానూ పంత్ మరో రికార్డు సృష్టించాడు.
ఎంఎస్ ధోనీ 48 టెస్టుల్లో 2,496 పరుగులు సాధించగా.. పంత్ తన పరుగుల సంఖ్యను 2,534కు పెంచుకున్నాడు. దీంతో తన గురువు ధోనీని అధిగమించాడు.
ఇప్పటికే టెస్టుల్లో దూకుడైన బ్యాటింగ్తో ప్రత్యేక గుర్తింపు తెచ్చుకున్న పంత్.. ఈ ఏడాది కూడా మంచి ఫామ్లో కొనసాగుతున్నాడు.
2026లో ఇప్పటివరకు మూడు టెస్టుల్లో నాలుగు ఇన్నింగ్స్లు ఆడిన అతడు 249 పరుగులు చేశాడు.
62.25 సగటుతో బ్యాటింగ్ చేసిన పంత్.. 73.02 స్ట్రైక్రేట్ నమోదు చేశాడు. ఈ ఏడాది అతడి ఖాతాలో మూడు అర్ధ శతకాలు ఉన్నాయి.