India vs Pakistan Final: ఇండియా-పాకిస్థాన్ ఫైనల్‌కు వర్షం ముప్పు.. మ్యాచ్ రద్దయితే ఎవరు విజేత?
ఈ వార్తాకథనం ఏంటి
ఆసియా క్రీడలు 2026లో అభిమానులు ఎంతో ఆసక్తిగా ఎదురుచూస్తున్న టీమిండియా-పాకిస్థాన్ పురుషుల క్రికెట్ ఫైనల్‌కు రంగం సిద్ధమైంది. రెండు దేశాల మధ్య జరగనున్న ఈ హై-వోల్టేజ్ పోరుపై ఇప్పటికే భారీ అంచనాలు నెలకొన్నాయి. అయితే కీలకమైన ఫైనల్ మ్యాచ్‌కు వర్షం ముప్పు పొంచి ఉండటంతో నిర్వాహకులు ఫలితాన్ని నిర్ణయించేందుకు సంబంధించిన కీలక నిబంధనలను వెల్లడించారు. రేపు భారత్-పాకిస్థాన్ మధ్య ఈ ఫైనల్ మ్యాచ్ జరగనుంది. అయితే ఈ మ్యాచ్‌కు ఎలాంటి రిజర్వ్ డే కేటాయించలేదు. వర్షం కారణంగా మ్యాచ్‌కు అంతరాయం ఏర్పడితే.. కనీసం ఇరు జట్లూ ఐదు ఓవర్ల చొప్పున ఆడే అవకాశం ఉంటేనే డక్‌వర్త్ లూయిస్ పద్ధతిలో ఫలితాన్ని నిర్ణయిస్తారు.
వివరాలు
గత క్రీడల్లో భిన్నంగా..
ఒకవేళ వర్షం కారణంగా కనీసం ఐదు ఓవర్ల చొప్పున కూడా ఇరు జట్లకు ఆట సాధ్యం కాకపోతే.. మ్యాచ్‌ను పూర్తిగా రద్దు చేస్తారు.
అలాంటి పరిస్థితుల్లో భారత్, పాకిస్థాన్ జట్లను సంయుక్త విజేతలుగా ప్రకటించి, ఇరు దేశాలకు స్వర్ణ పతకాలు అందజేస్తారు.
2023లో జరిగిన గత ఆసియా క్రీడల్లో ఫైనల్ మ్యాచ్ వర్షం కారణంగా రద్దయింది. అప్పుడు మెరుగైన ర్యాంకింగ్ ఆధారంగా భారత్‌ను విజేతగా ప్రకటించారు.
అయితే ఈసారి నిర్వాహకులు ఆ నిబంధనను మార్చారు. మ్యాచ్ పూర్తిగా రద్దయితే ర్యాంకింగ్ ఆధారంగా ఒక్క జట్టును విజేతగా ప్రకటించకుండా.. ఇరు జట్లను సంయుక్త విజేతలుగా ప్రకటించి స్వర్ణ పతకాలను పంచనున్నారు.
వివరాలు
ఫైనల్‌కు ఎలా చేరాయంటే..
సెమీఫైనల్‌లో భారత్ అద్భుత విజయంతో తుది పోరుకు అర్హత సాధించింది.
శ్రీలంకపై జరిగిన సెమీఫైనల్‌లో టీమిండియా ఏకంగా 124 పరుగుల భారీ తేడాతో విజయం సాధించి ఫైనల్‌లో అడుగుపెట్టింది.
మరోవైపు పాకిస్థాన్ కూడా సెమీఫైనల్‌లో సత్తాచాటింది. బంగ్లాదేశ్‌పై 6 వికెట్ల తేడాతో విజయం సాధించి తుది పోరుకు అర్హత సాధించింది.
దీంతో ఆసియా క్రీడలు 2026 పురుషుల క్రికెట్ ఫైనల్‌లో భారత్, పాకిస్థాన్ తలపడనున్నాయి.
వివరాలు
మ్యాచ్ టై అయితే ఏం జరుగుతుంది?
నిర్ణీత సమయంలో ఫైనల్ మ్యాచ్ పూర్తయి ఇరు జట్ల స్కోర్లు సమంగా ఉంటే.. విజేతను నిర్ణయించేందుకు సూపర్ ఓవర్ నిర్వహిస్తారు.
అయితే వాతావరణ పరిస్థితులు అనుకూలించక సూపర్ ఓవర్ కూడా నిర్వహించే అవకాశం లేకపోతే.. అప్పుడు టీ20 ర్యాంకింగ్స్‌ను పరిగణనలోకి తీసుకుంటారు.
టీ20 ర్యాంకింగ్స్‌లో ముందున్న భారత్‌ను విజేతగా ప్రకటించి స్వర్ణ పతకం అందజేస్తారు.
ఇలా భారత్-పాకిస్థాన్ ఫైనల్‌లో వర్షం కారణంగా ఏర్పడే వివిధ పరిస్థితులకు అనుగుణంగా నిర్వాహకులు ప్రత్యేక నిబంధనలను సిద్ధం చేశారు.