Jadeja: జడేజా కథ ముగిసిందా...పూజారా వ్యాఖ్యల అర్థం ఏంటి?
ఈ వార్తాకథనం ఏంటి
భారత స్టార్ ఆల్‌రౌండర్‌ రవీంద్ర జడేజా వన్డే భవిష్యత్తుపై ఇప్పుడు ఆసక్తికర చర్చ మొదలైంది. న్యూజిలాండ్‌తో నవంబర్‌ 4 నుంచి జరగనున్న ఐదు వన్డేల సిరీస్‌కు 37 ఏళ్ల జడేజాను ఎంపిక చేయకపోవడంతో అతడి కెరీర్‌పై ప్రశ్నలు తలెత్తుతున్నాయి. వచ్చే ఏడాది వన్డే ప్రపంచకప్‌ జరగనున్న నేపథ్యంలో జడేజాకు జట్టులో చోటు ఉంటుందా? లేక అతడి వన్డే ప్రయాణం ముగిసే దశకు చేరుకుందా? అనే సందేహాలు అభిమానుల్లో వ్యక్తమవుతున్నాయి.
Details
అక్షర్‌ పటేల్‌కు ప్రాధాన్యం.. పుజారా విశ్లేషణ
మాజీ భారత క్రికెటర్‌ చతేశ్వర్‌ పుజారా అభిప్రాయం ప్రకారం.. జడేజాను వన్డేల్లో కొనసాగించాలని జట్టు మేనేజ్‌మెంట్‌ భావించి ఉంటే న్యూజిలాండ్‌ సిరీస్‌కు ఎంపిక చేసేది.
ప్రస్తుతం ఎడమచేతి వాటం స్పిన్నర్‌ అక్షర్‌ పటేల్‌కు ఎక్కువ ప్రాధాన్యం ఇస్తున్నారని ఆయన పేర్కొన్నాడు. జడేజా వయసును దృష్టిలో ఉంచుకుని టెస్టు క్రికెట్‌పై దృష్టి పెట్టాలని సూచించి ఉండొచ్చని విశ్లేషించాడు.
అయితే ఇవి పుజారా వ్యక్తిగత అభిప్రాయాలే తప్ప, జడేజా వన్డే కెరీర్‌పై బీసీసీఐ లేదా టీమ్‌ మేనేజ్‌మెంట్‌ నుంచి అధికారిక ప్రకటన వెలువడలేదు.
Details
జడేజాకు ప్రపంచకప్‌ అవకాశం ఉందంటున్న నాయర్
మరో మాజీ క్రికెటర్‌ అభిషేక్‌ నాయర్ మాత్రం జడేజా అవకాశాలను పూర్తిగా కొట్టిపారేయలేదు.
వచ్చే ఏడాది ప్రపంచకప్‌ జట్టులో అతడికి చోటు దక్కే అవకాశం ఉందని అభిప్రాయపడ్డాడు. ప్రస్తుతం అక్షర్‌ పటేల్‌కు తొలి ప్రాధాన్యం ఉన్నప్పటికీ, అతడికి గాయం అయితే జడేజా మంచి ప్రత్యామ్నాయంగా ఉంటాడని చెప్పాడు.
ఈ క్రమంలో జడేజాను భారత జట్టుకు 'ఇన్సూరెన్స్‌ పాలసీ'గా అభివర్ణించాడు. అంటే ప్రధాన ఆటగాడు అందుబాటులో లేకపోతే జట్టుకు అండగా నిలిచే అనుభవజ్ఞుడైన ఆటగాడిగా అతడిని నాయర్ చూస్తున్నారు.
Details
ప్రపంచకప్‌కు ముందు కీలక పరీక్ష
నవంబర్‌ 4 నుంచి న్యూజిలాండ్‌తో ప్రారంభమయ్యే వన్డే సిరీస్‌ భారత జట్టు కూర్పును అంచనా వేయడానికి ఉపయోగపడనుంది.
వచ్చే ఏడాది దక్షిణాఫ్రికా, జింబాబ్వే, నమీబియా వేదికలుగా జరగనున్న వన్డే ప్రపంచకప్‌కు ముందు ఆటగాళ్ల ఎంపికపై జట్టు మేనేజ్‌మెంట్‌కు స్పష్టత రావాల్సి ఉంది.
ముఖ్యంగా స్పిన్‌ ఆల్‌రౌండర్‌ స్థానానికి అక్షర్‌, జడేజా మధ్య పోటీ ఎలా ఉండబోతోందన్నది ఆసక్తికరం. జడేజా వన్డే కెరీర్‌పై ఇప్పుడే తుది నిర్ణయానికి రావడం తొందరపాటే.
రాబోయే సిరీస్‌లు, ఆటగాళ్ల ప్రదర్శన ఆధారంగానే ప్రపంచకప్‌ అవకాశాలపై స్పష్టత వచ్చే అవకాశం ఉంది.