Varun Chakravarthy: వ‌రుణ్ చక్రవర్తి అరుదైన రికార్డు.. అశ్విన్ ఆల్టైమ్ రికార్డు బ్రేక్
ఈ వార్తాకథనం ఏంటి
టీమిండియా ఆఫ్ స్పిన్నర్ వ‌రుణ్ చక్రవర్తి అరుదైన రికార్డు నెలకొల్పాడు. ఓ ద్వైపాక్షిక టీ20 సిరీస్‌లో భారత్ తరఫున అత్యధిక వికెట్లు సాధించిన బౌలర్‌గా చక్రవర్తి నిలిచాడు. నాలుగు టీ20ల సిరీస్‌లో భాగంగా సెంచూరియన్ వేదికగా దక్షిణాఫ్రికాతో బుధవారం జరిగిన మూడో టీ20లో రెండు వికెట్లు తీసి ఈ రికార్డు తన ఖాతాలో వేసుకున్నాడు. ఈ సిరీస్‌లో ఇప్పటివరకు 10 వికెట్లు సాధించిన చక్రవర్తి, ఈ మిస్టరీ స్పిన్నర్‌గా సిరీస్‌లో అద్భుత ప్రదర్శన కనబరిచాడు. ఇంతకు ముందు ఈ రికార్డు టీమిండియా వెటరన్ స్పిన్నర్ రవిచంద్రన్ అశ్విన్ పేరిట ఉండేది. 2016లో శ్రీలంకతో జరిగిన ద్వైపాక్షిక సిరీస్‌లో అశ్విన్ 9 వికెట్లు తీశారు.
వివరాలు
4 ఓవర్లలో రెండు వికెట్లు తీసి 54 రన్స్
తాజా మ్యాచ్‌లో వ‌రుణ్ ఆల్టైమ్ రికార్డు‌ను బ్రేక్ చేశాడు. దక్షిణాఫ్రికా సిరీస్‌లో మొదటి టీ20లో మూడు వికెట్లు తీసిన వ‌రుణ్, రెండవ టీ20లో ఐదు వికెట్లు పడగొట్టాడు. మూడో టీ20లో రెండు వికెట్లు తీసి తన వికెట్ల సంఖ్య 10కి చేరింది. చివరి టీ20 నవంబర్ 15న జరగనుంది. మూడో టీ20లో వ‌రుణ్ చక్రవర్తి 4 ఓవర్లలో రెండు వికెట్లు తీసి 54 రన్స్ ఇచ్చాడు. ఓపెనర్ రీజా హెండ్రిక్స్ (21) కెప్టెన్ ఐడైన్ మార్‌క్రమ్ (29)లను మంచి సమయంలో పెవిలియన్‌కి పంపి భారత్‌కు కీలక విజయాన్ని అందించాడు.
వివరాలు
వ‌రుణ్ 71 ఐపీఎల్ మ్యాచుల్లో 83 వికెట్లు
గత రెండు మ్యాచ్‌లతో పోలిస్తే వ‌రుణ్ ఈ మ్యాచ్‌లో కాస్త ఎక్కువ పరుగులు ఇచ్చినప్పటికీ, రెండు కీలక వికెట్లు పడగొట్టి భారత్‌కు మరొక విజయం అందించాడు. ఇప్పటివరకు 12 టీ20లు ఆడిన వ‌రుణ్ 17 వికెట్లు సాధించాడు. అతని అత్యుత్తమ గణాంకాలు 5/17. ఐపీఎల్ ద్వారా భారత జట్టులో చోటు సంపాదించిన వ‌రుణ్ 71 ఐపీఎల్ మ్యాచుల్లో 83 వికెట్లు తీశాడు.