Shreyas Iyer: గాయం నుంచి కోలుకుంటున్న శ్రేయస్‌ అయ్యర్‌.. మళ్లీ మైదానంలోకి అడుగు పెట్టేది అప్పుడే?
ఈ వార్తాకథనం ఏంటి
సిడ్నీ వేదికగా ఆస్ట్రేలియాతో జరిగిన మూడో వన్డేలో టీమ్‌ఇండియా వైస్‌ కెప్టెన్‌ శ్రేయస్‌ అయ్యర్‌ (Shreyas Iyer) తీవ్ర గాయానికి గురైన సంగతి తెలిసిందే. మ్యాచ్‌ సందర్భంగా క్యాచ్‌ పట్టే ప్రయత్నంలో ఆయన ప్లీహం (Spleen) దెబ్బతిన్నట్లు వైద్యులు నిర్ధారించారు. క్యాచ్‌ అందుకునే క్రమంలో ఎడమవైపు పక్కటెముకలు నేలపై బలంగా తగలడంతో ఈ ప్రమాదం జరిగింది. ప్రస్తుతం శ్రేయస్‌ సిడ్నీలోని ఒక ఆసుపత్రిలో చికిత్స పొందుతున్నాడు. ఆయన ఆరోగ్య పరిస్థితి నిలకడగా ఉందని, వేగంగా కోలుకుంటున్నాడని బీసీసీఐ (BCCI) సెక్రటరీ దేవ్‌జిత్‌ సైకియా అధికారిక ప్రకటనలో తెలిపారు. ఈ వార్తతో అభిమానులు ఊపిరి పీల్చుకున్నారు. అయితే గాయం సున్నితమైన స్వభావం కలిగినందున శ్రేయస్‌ తక్షణం మైదానంలోకి తిరిగి రావడం సాధ్యంకాదు.
Details
ప్లీహం అంటే ఏమిటి?
ప్లీహం అనేది మానవ శరీరంలోని ఎడమ వైపు పక్కటెముకల కింద ఉన్న పిడికిలి పరిమాణంలో మృదువైన అవయవం. ఇది రెండు ముఖ్యమైన పనులు చేస్తుంది. శరీరాన్ని ఇన్ఫెక్షన్ల నుంచి రక్షించడం, అలాగే పాత లేదా దెబ్బతిన్న ఎర్ర రక్త కణాలను తొలగించడం ద్వారా రక్తాన్ని శుభ్రపరచడం. ప్లీహం అనేక సూక్ష్మ రక్తనాళాలతో నిండి ఉంటుంది కాబట్టి ఇది చాలా సున్నితమైన అవయవం. ఎడమవైపు కింద పడటం లేదా పక్కటెముకలకు గాయం తగలడం వలన ప్లీహం చీలే ప్రమాదం ఉంటుంది. అలాంటి గాయం తీవ్రమైన రక్తస్రావానికి, కొన్నిసార్లు ప్రాణాపాయానికి కూడా దారితీస్తుంది. గాయం తీవ్రతను అంచనా వేయడానికి వైద్యులు సీటీ స్కాన్‌ (CT Scan)చేస్తారు. చిన్న గాయాలు అయితే ప్లీహం స్వయంగా నయం అవుతుంది.
Details
తొలి 48 గంటలు అత్యంత కీలకం
ప్లీహానికి గాయమైన తర్వాత మొదటి 24-48 గంటలు అత్యంత కీలకమైన సమయం. ఈ సమయంలో రక్తస్రావం నియంత్రణలో ఉంటేనే పరిస్థితి మెరుగ్గా ఉంటుంది. రోగి స్థితి స్థిరంగా ఉన్నప్పుడు వైద్యులు క్రమంగా ఆహారం, కదలికలకు అనుమతిస్తారు. రోజూ స్కానింగ్‌ ద్వారా ప్లీహం వద్ద రక్తస్రావం లేదని నిర్ధారించుకుంటారు. రక్తస్రావం ఆగిపోయాక, రోగిని సాధారణంగా ఒక వారం వరకు ఆసుపత్రిలో వైద్యుల పర్యవేక్షణలో ఉంచుతారు. అనంతరం డిశ్చార్జ్‌ చేస్తారు. కానీ పూర్తి ఆరోగ్యం తిరిగి పొందడానికి 6 నుంచి 12 వారాలు పట్టవచ్చు. ఈ కాలంలో రోగి అత్యంత జాగ్రత్తగా ఉండాలి. ఎందుకంటే ఈ దశలో మరల గాయం అయితే మళ్లీ అంతర్గత రక్తస్రావం జరిగే అవకాశం ఉంటుంది.
Details
శ్రేయస్‌ అదృష్టవంతుడు
శ్రేయస్‌ అయ్యర్‌ విషయంలో ఒకింత అదృష్టం కలిసొచ్చింది. గాయానికి గురైన వెంటనే వైద్య సాయం అందించడం ఆయనకు మేలు చేసింది. సమాచారం ప్రకారం ఆయన ప్లీహానికి గాయం తేలికపాటి స్థాయిలోనే ఉంది. అందువల్ల తక్కువ సమయంలోనే కోలుకునే అవకాశం ఉందని వైద్యులు భావిస్తున్నారు. శ్రేయస్‌ శారీరకంగా ఫిట్‌గా ఉన్నందున ఆయన రికవరీ మరింత వేగంగా జరగవచ్చు. అయితే వైద్యుల సూచనల ప్రకారం, ఆయన మళ్లీ మైదానంలోకి అడుగుపెట్టడానికి కనీసం మూడు నెలల సమయం పట్టవచ్చని తెలుస్తోంది. ప్రస్తుతం టీమిండియా సహచర ఆటగాళ్లు, బీసీసీఐ అధికారులు, అభిమానులు అందరూ శ్రేయస్‌ త్వరగా కోలుకోవాలని, ఆసుపత్రి నుంచి త్వరలోనే డిశ్చార్జ్‌ కావాలని ఆకాంక్షిస్తున్నారు.