Smriti Mandhana: పెళ్లి ముందు సర్‌ప్రైజ్.. టీమ్‌మేట్స్‌తో డ్యాన్స్ చేసిన స్మృతి, ఎంగేజ్‌మెంట్ రింగ్‌తో హైలైట్!
ఈ వార్తాకథనం ఏంటి
టీమిండియా స్టార్ మహిళా క్రికెటర్, వరల్డ్ కప్ విజేత జట్టులో కీలక సభ్యురాలు అయిన స్మృతి మంధాన త్వరలో వివాహ బంధంలోకి అడుగుపెట్టబోతున్నారు. ఆమె తన చిరకాల ప్రియుడు, సంగీత దర్శకుడు, ఫిల్మ్‌మేకర్ పలాష్ ముచ్చల్‌ను వివాహం చేసుకోనున్నట్లు తెలుస్తోంది. ఈ నెల 23న వీరి పెళ్లి జరగనున్నట్లుగా వార్తలు బయటకు వచ్చాయి. ఇటీవల ప్రపంచకప్ గెలిచిన అనంతరం ట్రోఫీ పక్కన స్మృతి-పలాష్ కలిసి చిరునవ్వులు చిందిస్తూ దిగిన ఫొటో సోషల్ మీడియాలో వైరల్ అయ్యింది. దాన్ని చూసిన అభిమానులు 'స్మృతికి ఇదే బెస్ట్ ప్రీ-వెడ్డింగ్ గిఫ్ట్' అంటూ అభినందనలు వెల్లువెత్తించారు. వీరి ప్రేమకథ 2019లో మొదలై, 2024 వరకు గోప్యంగానే కొనసాగింది.
Details
సమ్‌ఝో హో హీ గయా' పాటకు డ్యాన్స్
ఇప్పుడు ఆ బంధం పెళ్లిపీటల వరకూ చేరింది. మరోవైపు, పెళ్లి ముందు స్మృతి తన సహచర క్రికెటర్లు జెమీమా రోడ్రిగ్స్, రాధా యాదవ్, అరుంధతి రెడ్డి, శ్రేయాంక పాటిల్‌లతో కలిసి ఒక సరదా వీడియోను విడుదల చేసింది. 'లగే రహో మున్నాభాయ్' సినిమాలోని 'సమ్‌ఝో హో హీ గయా' పాటకు అందరూ ఉత్సాహంగా డ్యాన్స్ చేస్తూ కనిపించారు. వీడియో చివర్లో స్మృతి తన ఎంగేజ్‌మెంట్ రింగ్‌ను చూపించి అభిమానులకు సర్‌ప్రైజ్ ఇచ్చింది.
Details
ఎవరు పలాష్ ముచ్చల్?
30 ఏళ్ల పలాష్ ముచ్చల్ సంగీత దర్శకుడు, ఫిల్మ్‌మేకర్‌గా పనిచేస్తున్నారు. అతని సోదరి పలక్ ముచ్చల్ బాలీవుడ్‌లో ప్రముఖ గాయని. అభిషేక్ బచ్చన్, దీపికా పదుకొణె నటించిన 'ఖేలే హమ్ జీ జాన్ సే' సినిమాలో పలాష్ కూడా నటించాడు. ప్రస్తుతం రాజ్‌పాల్ యాదవ్, రుబీనా దిలైక్ ప్రధాన పాత్రల్లో రూపొందుతున్న 'అర్ధ్' సినిమాకు దర్శకత్వం వహిస్తున్నాడు. మరోవైపు 29 ఏళ్ల స్మృతి మంధాన ఉమెన్స్ ప్రీమియర్ లీగ్‌ (WPL)లో అత్యంత ఖరీదైన క్రీడాకారిణి. రాయల్ ఛాలెంజర్స్ బెంగళూరు ఆమెను రూ. 3.40 కోట్లకు దక్కించుకుంది.