Team India: సెలెక్టర్లకు రిలీఫ్.. శ్రేయాస్ అయ్యర్ రీప్లేస్ వచ్చేశాడ్రోయ్..
ఈ వార్తాకథనం ఏంటి
భారత క్రికెట్ జట్టుకు గట్టి ఎదురుదెబ్బ తగిలింది. ఆస్ట్రేలియాతో జరిగిన వన్డే సిరీస్ చివరి మ్యాచ్‌లో స్టార్ బ్యాట్స్‌మన్ శ్రేయస్ అయ్యర్ గాయపడ్డాడు. క్యాచ్ పట్టే ప్రయత్నంలో అతని ప్లీహాకు గాయం కావడంతో, వెంటనే సిడ్నీలోని ఒక ఆసుపత్రికి తరలించి చికిత్స అందించారు. వైద్యులు ఆయనను కొన్ని రోజులు విశ్రాంతి తీసుకోవాలని సూచించగా, మైదానంలోకి తిరిగి రావడానికి కొంత సమయం పట్టే అవకాశం ఉందని సమాచారం. ఈ గాయం టీమిండియాకు పెద్ద ఆందోళనగా మారింది. ముఖ్యంగా వచ్చే నెలలో దక్షిణాఫ్రికాతో జరగనున్న వన్డే సిరీస్‌పై దీని ప్రభావం తీవ్రంగా ఉండొచ్చని విశ్లేషకులు చెబుతున్నారు. అయ్యర్ దూరమవడంతో సెలెక్టర్ల ముందు కొత్త సవాలు నిలిచింది.
వివరాలు
శ్రేయాస్ అయ్యర్ స్థానంలో ఎవరికి అవకాశం?
భారత వన్డే జట్టులో నాలుగో స్థానంలో స్థిరమైన బ్యాట్స్‌మన్‌గా శ్రేయాస్ అయ్యర్ తనకంటూ ప్రత్యేక స్థానం సంపాదించుకున్నాడు. ఒత్తిడిలోనూ అద్భుత ఇన్నింగ్స్‌లు ఆడి జట్టుకు అనేక విజయాలు అందించాడు. అయితే గాయం కారణంగా ఆఫ్రికా పర్యటన నుంచి దాదాపు తప్పుకున్నట్టే కనిపిస్తున్నాడు. దీంతో జట్టు బ్యాటింగ్ క్రమం మారే అవకాశం ఉంది. ఈ నేపథ్యంలో, మీడియా వర్గాల సమాచారం ప్రకారం, మధ్యప్రదేశ్ బ్యాట్స్‌మన్ రజత్ పాటిదార్‌కి జట్టులో చోటు దక్కే అవకాశం ఉంది. దేశీయ క్రికెట్‌లో స్థిరమైన ప్రదర్శనతో రజత్ తన ప్రతిభను నిరూపించుకున్నాడు.
వివరాలు
దేశీయ క్రికెట్‌లో అద్భుత ఫారమ్
ఐపీఎల్ 2025లో రాయల్ చాలెంజర్స్ బెంగళూరు (RCB) తరపున రజత్ పాటిదార్ కీలక ఇన్నింగ్స్ ఆడి జట్టుకు తొలి IPL టైటిల్‌ను అందించాడు. ఆ తర్వాత దేశీయ క్రికెట్‌లో కూడా నిరంతరం రాణిస్తూ, తన చివరి నాలుగు ఫస్ట్‌క్లాస్ మ్యాచ్‌లలో రెండు సెంచరీలు, ఒక డబుల్ సెంచరీ, రెండు హాఫ్ సెంచరీలు సాధించాడు. అంతేకాదు, 11 సంవత్సరాల తర్వాత సెంట్రల్ జోన్ జట్టును దులీప్ ట్రోఫీ టైటిల్‌దిశగా నడిపించాడు.
వివరాలు
టీమిండియాలో ఇప్పటివరకు ప్రదర్శన
రజత్ పాటిదార్ ఇప్పటివరకు భారత జట్టుకు మూడు టెస్టులు, ఒక వన్డే ఆడాడు. టెస్టుల్లో 6 ఇన్నింగ్స్‌ల్లో 63 పరుగులు మాత్రమే చేయగా, అతని ఏకైక వన్డే మ్యాచ్ 2023 డిసెంబర్‌లో దక్షిణాఫ్రికా వ్యతిరేకంగా ఆడాడు. ఆ మ్యాచ్‌లో 22 పరుగులు చేసి ఔటయ్యాడు. అయినప్పటికీ, ఇప్పుడు అయ్యర్ స్థానంలో అతనికి అవకాశం దక్కితే, అది అతని కెరీర్‌కు పెద్ద మలుపుగా మారే అవకాశముంది. ఈ సిరీస్ రజత్ పాటిదార్‌కి మరోసారి తన ప్రతిభను నిరూపించుకునే వేదికగా నిలుస్తుందా అనే ఆసక్తి అభిమానుల్లో నెలకొంది.