IND vs NZ: రెండో రోజు ముగిసిన ఆట.. రాణించిన భారత స్పిన్నర్లు
భారత్-న్యూజిలాండ్ మధ్య జరుగుతున్న మూడు మ్యాచ్‌ల టెస్ట్ సిరీస్‌లో చివరి మ్యాచ్ ముంబై వాంఖడే స్టేడియంలో జరుగుతోంది. రెండో రోజు టీమిండియా ఆధిక్యం సాధించింది. కివీస్‌ను రెండో ఇన్నింగ్స్‌లో స్వల్ప స్కోరుకే పరిమితం చేసింది. ఆట ముగిసే సమయానికి న్యూజిలాండ్ రెండో ఇన్నింగ్స్‌లో 171/9 పరుగులు చేసింది. ప్రస్తుతం భారత్ 143 పరుగుల ఆధిక్యంలో ఉంది. ప్రస్తుతం క్రీజులో అజాజ్ పటేల్ 7 పరుగులతో నాటౌట్‌గా ఉన్నాడు. మొదటి ఇన్నింగ్స్‌లో న్యూజిలాండ్ 235 పరుగులు చేసింది. భారత్ 263 పరుగులు చేసి 28 పరుగుల ఆధిక్యం సాధించింది.
న్యూజిలాండ్ బ్యాటర్లు విఫలం
న్యూజిలాండ్ రెండో ఇన్నింగ్స్‌లో రవీంద్ర జడేజా, ఆర్ అశ్విన్ స్పిన్ బౌలింగ్‌తో చక్కటి ప్రదర్శన ఇచ్చారు. న్యూజిలాండ్ బ్యాటింగ్‌లో విల్ యంగ్ 51 పరుగులతో రాణించారు. ఇతర బ్యాటర్లు విఫలమయ్యారు. టామ్ లాథమ్ 1, డెవాన్ కాన్వే 22, రచిన్ రవీంద్ర 4, డారిల్ మిచెల్ 21, టామ్ బ్లండెల్ 4, గ్లెన్ ఫిలిప్స్ 26, ఇష్ సోధీ 8, మాట్ హెన్రీ 10 తక్కువ పరుగులకే వెనుతిరిగారు. భారత్ బౌలర్లలో జడేజా 4 వికెట్లు, అశ్విన్ 3 వికెట్లు తీశారు, ఆకాశ్‌దీప్‌, వాషింగ్టన్‌ సుందర్‌లకు చెరో వికెట్ దక్కింది.
