World Chess Championship 2024: ప్రపంచ చదరంగ ఛాంపియన్‌షిప్‌లో భారత యువ గ్రాండ్‌మాస్టర్‌ ఓటమి
ఈ వార్తాకథనం ఏంటి
ప్రపంచ చదరంగ ఛాంపియన్‌షిప్‌లో తన ఆధిక్యాన్ని కొనసాగించి ఒత్తిడి లేకుండా టైటిల్‌ను సాధించే గొప్ప అవకాశాన్ని భారత యువ గ్రాండ్‌మాస్టర్‌ దొమ్మరాజు గుకేశ్‌ చేజార్చుకున్నాడు.
11వ గేమ్‌లో అద్భుత విజయంతో మెరిసిన 18 ఏళ్ల ఈ చెన్నై కుర్రాడు, 12వ రౌండ్లో మాత్రం 39 ఎత్తుల్లో పరాజయాన్ని చవిచూడాల్సి వచ్చింది.
అనవసర తప్పిదాలతో తన స్థానాన్ని కోల్పోయాడు. మిగిలిన మూడు గేమ్‌లతో 6-5 ఆధిక్యంలో కొనసాగుతున్న గుకేశ్‌కు టైటిల్‌ను సాధించే మెరుగైన అవకాశాలు కనిపించాయి.
మిగిలిన గేమ్‌లను డ్రాగా ముగించినా టైటిల్‌ గుకేశ్‌కే దక్కేది.
కానీ సోమవారం జరిగిన గేమ్‌లో డిఫెండింగ్‌ ఛాంపియన్‌ డింగ్‌ లిరెన్‌ గెలిచి స్కోరును 6-6తో సమం చేశాడు, గుకేశ్‌ అవకాశాలను సంక్లిష్టం చేశాడు.
వివరాలు
గేమ్‌లో ఎదురు దాడి చేయడంలో విఫలం
ఇంకా రెండు రౌండ్లు మాత్రమే మిగిలి ఉండగా మంగళవారం విశ్రాంతి దినంగా ఉంది.
12వ గేమ్‌లో 32 ఏళ్ల లిరెన్‌ తెల్లపావులతో దూకుడు ప్రదర్శించగా, గుకేశ్‌ తేలిపోయాడు.
గత గేమ్‌లలో ప్రదర్శించిన స్ఫూర్తిని ఈ రౌండ్లో నిలబెట్టుకోలేకపోయాడు.
లిరెన్‌ ఇంగ్లిష్‌ ఓపెనింగ్‌తో ప్రారంభించి, గుకేశ్‌ బెనోని డిఫెన్స్‌తో స్పందించినప్పటికీ మధ్యలో గేమ్‌లో ఎదురు దాడి చేయడంలో విఫలమయ్యాడు.
లిరెన్‌ ప్రతిఒక్క ఎత్తును పక్కాగా వేసి గేమ్‌పై పట్టును సాధించాడు.
17వ, 22వ ఎత్తుల్లో గుకేశ్‌ చేసిన పొరపాట్లతో లిరెన్‌కు మరింత ప్రాభవం లభించింది.
చివర్లో, ఏనుగును త్యాగం చేసి లిరెన్‌ గేమ్‌పై పూర్తి నియంత్రణ సాధించాడు. ఈ ఒత్తిడిని తట్టుకోలేక గుకేశ్‌ ఓటమిని అంగీకరించాడు.
వివరాలు
గేమ్‌ ఓడిపోవడం కొంచెం నిరాశ కలిగించింది: గుకేశ్‌
''ఈ ఛాంపియన్‌షిప్‌ రెండో భాగంలో నాకు పలు విజయావకాశాలు లభించాయి. కానీ ఈ గేమ్‌ మాత్రం నా స్థాయికి తగ్గట్టు ఆడలేకపోయాను. కొన్నిసార్లు ఇటువంటి పరిస్థితులు ఎదురవుతాయి. అయితే తొలి భాగంతో పోలిస్తే ఇప్పుడు మేమిద్దరం మెరుగ్గా ఆడుతున్నామనే నమ్మకం ఉంది. 6-6 అనేది మంచి ఫలితమే, కానీ ఆదివారం ఆధిక్యంలో ఉన్న నేను ఈ గేమ్‌ ఓడిపోవడం కొంచెం నిరాశ కలిగించింది. అయినప్పటికీ స్కోరు సమంగా ఉండటం ఊరట ఇస్తోంది. ఇంకా రెండు గేమ్‌లు మిగిలి ఉన్నాయి'' అని గుకేశ్‌ తన భావాలను వ్యక్తం చేశాడు.