Nikhi Prasad: టీమిండియా యువ స్పిన్నర్ సంచలనం.. అంతర్జాతీయ టీ20ల్లో అరుదైన రికార్డు!
ఈ వార్తాకథనం ఏంటి
భారత టీ20 క్రికెట్‌లో యువ స్పిన్నర్ నిఖీ ప్రసాద్ అరుదైన రికార్డు సృష్టించింది. అంతర్జాతీయ టీ20 క్రికెట్‌లో తన కెరీర్‌లో వేసిన తొలి రెండు బంతులకే రెండు వికెట్లు పడగొట్టి సంచలనం సృష్టించింది. దీంతో పురుషులు, మహిళల అంతర్జాతీయ టీ20 క్రికెట్‌లో ఈ ఘనత సాధించిన తొలి భారత క్రికెటర్‌గా నిలిచింది. జింబాబ్వేతో రాయ్‌పుర్ వేదికగా ఆదివారం జరిగిన రెండో టీ20 మ్యాచ్‌లో నిఖీ ఈ రికార్డును నెలకొల్పింది. 2025లో భారత అండర్‌-19 మహిళల జట్టుకు నాయకత్వం వహించిన నిఖీ ప్రసాద్.. రెండోసారి ఐసీసీ అండర్‌-19 మహిళల టీ20 ప్రపంచకప్‌ను భారత్ గెలుచుకోవడంలో కీలక పాత్ర పోషించింది. ఇప్పుడు సీనియర్ జట్టులోనూ తన ప్రతిభను చాటుకుంటోంది.
వివరాలు
రెండు బంతుల్లో రెండు వికెట్లు
జింబాబ్వేతో జరిగిన రెండో టీ20లో రెండు ఓవర్లు బౌలింగ్ చేసి ఏడు పరుగులిచ్చి రెండు వికెట్లు పడగొట్టింది.
భారత ఇన్నింగ్స్ 15వ ఓవర్లో కెప్టెన్ స్మృతి మంధాన నిఖీకి బంతిని అందించింది.
అంతర్జాతీయ టీ20ల్లో తన కెరీర్‌లో వేసిన తొలి బంతికే చిపో ముగేరి-తిరిపానోను నిఖీ ఔట్ చేసింది. ఆమె కొట్టిన బంతిని వికెట్ కీపర్ రిచా ఘోష్ అందుకుంది.
ఆ తర్వాతి బంతికే న్యాషా గ్వాంజురాను ఎల్బీడబ్ల్యూగా వెనక్కి పంపింది. ఇలా వరుసగా తొలి రెండు బంతుల్లోనే రెండు వికెట్లు తీసి అందరినీ ఆశ్చర్యపరిచింది.
వివరాలు
తొలి బంతికే వికెట్ తీసిన మహిళా బౌలర్ల జాబితాలో నిఖీ
అంతర్జాతీయ టీ20ల్లో తమ కెరీర్‌లో తొలి బంతికే వికెట్ తీసిన మహిళా బౌలర్ల జాబితాలోనూ నిఖీ ప్రసాద్ చోటు సంపాదించింది.
ఈ జాబితాలో గతంలో క్లోయ్ ట్రయాన్ (2010), అక్షతా రావు (2019), సుహానీ థడానీ (2021) ఉన్నారు. అయితే కెరీర్‌లో తొలి రెండు బంతులకే రెండు వికెట్లు పడగొట్టడం మరింత అరుదైన ఘనత.
ఈ రికార్డుతో నిఖీ ప్రసాద్ ఆస్ట్రేలియా మాజీ క్రికెటర్ మైఖేల్ కాస్ప్రోవిచ్, అమెరికా మహిళా క్రికెటర్ అక్షతా రావు సరసన నిలిచింది.
2005లో న్యూజిలాండ్‌తో జరిగిన టీ20 మ్యాచ్‌లో కాస్ప్రోవిచ్ తన తొలి రెండు బంతుల్లోనే స్టీఫెన్ ఫ్లెమింగ్, మాథ్యూ సింక్లెయిర్‌లను ఔట్ చేశాడు.
వివరాలు
తొలి బంతికే వికెట్ తీసిన భారత ఆటగాళ్లు వీరే
ఇక మహిళల టీ20 క్రికెట్‌లో అక్షతా రావు 2019లో బంగ్లాదేశ్‌తో జరిగిన మ్యాచ్‌లో తొలి రెండు బంతుల్లోనే అయేషా రెహ్మాన్, సంజిదా ఇస్లామ్‌ల వికెట్లు పడగొట్టింది.
భారత పురుషుల క్రికెట్‌లోనూ పలువురు ఆటగాళ్లు తమ అంతర్జాతీయ టీ20 కెరీర్‌లో తొలి బంతికే వికెట్ సాధించారు.
2006లో అజిత్ అగార్కర్ హెర్షెల్ గిబ్స్‌ను, 2009లో ప్రజ్ఞాన్ ఓజా షకీబ్ అల్ హసన్‌ను ఔట్ చేశారు. 2011లో విరాట్ కోహ్లీ కూడా కెవిన్ పీటర్సన్‌ను స్టంపింగ్ ద్వారా ఔట్ చేయడంలో భాగమయ్యాడు.
అయితే వీరిలో ఎవరూ తమ కెరీర్‌లో తొలి రెండు బంతుల్లోనే రెండు వికెట్లు పడగొట్టలేదు. దీంతో నిఖీ ప్రసాద్ సాధించిన ఘనత ప్రత్యేకంగా నిలిచింది.
వివరాలు
అరంగేట్రం మ్యాచ్‌లో బ్యాటింగ్‌తో మెరిసి
నిఖీ ప్రసాద్ అక్టోబర్ 16న రాయ్‌పుర్‌లోనే భారత జట్టు తరఫున అంతర్జాతీయ టీ20 క్రికెట్‌లో అరంగేట్రం చేసింది.
తొలి మ్యాచ్‌లో ఆమెకు బౌలింగ్ చేసే అవకాశం రాలేదు. అయితే బ్యాటింగ్‌లో మాత్రం సత్తా చాటింది. 35 బంతుల్లో 39 పరుగులు సాధించింది.
రెండో మ్యాచ్‌లో బంతి అందుకున్న నిఖీ.. అద్భుతమైన బౌలింగ్ ప్రదర్శనతో వరుసగా రెండు బంతుల్లో రెండు వికెట్లు పడగొట్టి అరుదైన రికార్డును తన ఖాతాలో వేసుకుంది.
ఇలా బ్యాటింగ్‌తో పాటు బౌలింగ్‌లోనూ తన సత్తా చాటుతూ భారత క్రికెట్‌లో ప్రత్యేక గుర్తింపు సంపాదించుకుంది.