Train Derails: జర్మనీలో పట్టాలు తప్పిన రైలు.. ముగ్గురు మృతి, 34 మందికి గాయాలు
ఈ వార్తాకథనం ఏంటి
జర్మనీలో ఘోర రైలు ప్రమాదం చోటుచేసుకుంది.దాదాపు 100 మంది ప్రయాణికులతో వెళ్తున్న రైలు పట్టాలు తప్పడంతో ఈ ప్రమాదం సంభవించింది. ఇందులో ముగ్గురు మరణించగా, 34 మందికి గాయాలయ్యాయి. ఈ రైలు సిగ్మరింగెన్ పట్టణం నుంచి ఉల్మ్ నగరానికి ప్రయాణిస్తోంది. ఆదివారం సాయంత్రం 6:10 గంటల సమయంలో (అక్కడి ప్రాదేశిక కాలమానం ప్రకారం),బాడెన్‌-వుర్టెంబర్గ్ రాష్ట్ర పరిధిలో ఉన్న రీడ్లింగెన్ పట్టణ సమీపంలోని అటవీ ప్రాంతంలో ఈ ప్రమాదం జరిగింది. పోలీసుల ప్రకారం,ముగ్గురు ప్రయాణికులు ఈ ప్రమాదంలో ప్రాణాలు కోల్పోయారు. అయితే తొలుత నలుగురు మరణించారని అధికారులు ప్రకటించారు. అనంతరం ముగ్గురు మాత్రమే చనిపోయారని, మరొకరి పరిస్థితి విషమంగా ఉందని చెప్పారు.
వివరాలు
40 కిలోమీటర్ల మేర రైళ్ల రాకపోకలను నిలిపివేత
ప్రమాదానికి గల కారణం ఇంకా తెలియరాలేదని అధికారులు పేర్కొన్నారు. రెండు రైలు బోగీలు పట్టాలు తప్పాయని, దర్యాప్తు కొనసాగుతోందని తెలిపారు. ఈ ప్రమాదం నేపథ్యంలో,ప్రమాదం జరిగిన మార్గంలో దాదాపు 40 కిలోమీటర్ల పాటు రైలు రాకపోకలను తాత్కాలికంగా నిలిపివేశారు. ఇది స్థానిక రవాణా వ్యవస్థపై తీవ్ర ప్రభావాన్ని చూపింది.జర్మన్ చాన్సలర్ ఫ్రెడరిక్ మెర్జ్,మృతుల కుటుంబాలకు తన ప్రగాఢ సంతాపాన్ని తెలియజేశారు. ఈ ఘటనపై రవాణా మంత్రులతో తాను మాట్లాడుతున్నట్టు చెప్పారు. సహాయక చర్యల కోసం అత్యవసర సేవలను వెంటనే అందించాల్సిందిగా కోరినట్టు వెల్లడించారు.
వివరాలు
1998లో లోయర్ సాక్సోనీలోని ఎస్చెడ్‌లో పట్టాలు తప్పిన హై-స్పీడ్ రైలు
ఇలాంటి ప్రమాదాలు గతంలో కూడా జర్మనీలో చోటు చేసుకున్నాయి. 2022 జూన్‌లో దక్షిణ జర్మనీలోని బవేరియన్ ఆల్పైన్ రిసార్ట్ సమీపంలో రైలు పట్టాలు తప్పగా, నాలుగు మంది మృతిచెందారు. అలాగే, 1998లో లోయర్ సాక్సోనీలోని ఎస్చెడ్ ప్రాంతంలో ఒక హై-స్పీడ్ రైలు పట్టాలు తప్పిన ఘటనలో 101 మంది మరణించారు. ఈ సంఘటనలు జర్మనీలో రైలు భద్రతపై ఆందోళనలు వ్యక్తం చేయిస్తున్నాయి.