Ohio plane crash: అమెరికా ఒహాయోలో కుప్పకూలిన చిన్న విమానం.. ప్రమాదంలో ఆరుగురు ప్రయాణికులు మృతి
ఈ వార్తాకథనం ఏంటి
అమెరికాలో ఓ భయానక విమాన ప్రమాదం చోటుచేసుకుంది. ఒహాయో రాష్ట్రంలో జరిగిన ఈ దుర్ఘటనలో ఓ చిన్న విమానం కూలిపోయి అందులో ప్రయాణిస్తున్న ఆరుగురు ప్రాణాలు కోల్పోయారు. విమానం టేకాఫ్ అయిన కొన్ని నిమిషాల వ్యవధిలోనే ఈ విషాదకర ఘటన జరిగినట్లు తెలుస్తోంది. ఫెడరల్ ఏవియేషన్ అడ్మినిస్ట్రేషన్ (ఎఫ్ఏఏ) విడుదల చేసిన వివరాల ప్రకారం, ఆదివారం ఉదయం యంగ్స్‌టౌన్-వారెన్ ప్రాంతీయ విమానాశ్రయం నుండి బయలుదేరిన సెస్నా 441 మోడల్ చిన్న విమానం గాల్లోకి లేచిన కొద్ది సేపటికే కుప్పకూలిపోయింది. ఈ విమానంలో ఆరుగురు ప్రయాణికులు ఉన్నారు. ఘటన జరిగిన వెంటనే స్థానిక అధికారులు సహాయక చర్యలు ప్రారంభించారు.
వివరాలు
ప్రాణాలతో ఎవరూ బయటపడలేదని అధికారుల నిర్ధారణ
ఈ ప్రమాదంలో ఎవరూ సజీవంగా బయటపడలేదని, అందులోని ఆరుగురు ప్రయాణికులంతా మరణించినట్లు వెస్టర్న్ రిజర్వ్ పోర్ట్ అథారిటీ ఎగ్జిక్యూటివ్ డైరెక్టర్ ఆంతోనీ ట్రెవెనా స్పష్టం చేశారు. మృతదేహాలను ట్రంబుల్ కౌంటీకి చెందిన కరోనర్ కార్యాలయానికి తరలించినట్లు కూడా ఆయన తెలియజేశారు. మృతుల వ్యక్తిగత వివరాలు ఇంకా వెల్లడికాలేదు. వారి గుర్తింపు ప్రక్రియ ఇంకా కొనసాగుతోందని అధికారులు తెలిపారు. ప్రమాదం జరిగిన ప్రాంతం చేరుకోవడం చాలా సవాలుతో కూడుకున్నదని, సహాయక సిబ్బందికి అక్కడకు చేరడంలో ఇబ్బందులు ఎదుర్కొన్నాయని హౌలాండ్ టౌన్‌షిప్ అగ్నిమాపక శాఖ చీఫ్ రేమండ్ పేస్ వెల్లడించారు. ఈ ప్రమాదానికి కారణాలేంటో తెలుసుకోవడానికి సంబంధిత అధికారులు దర్యాప్తు ప్రారంభించినట్లు సమాచారం.