France Wildfire: ఫ్రాన్స్-స్పెయిన్ సరిహద్దులో తగ్గుముఖం పట్టిన కార్చిచ్చు.. ఇంటి బాట పట్టిన 84 వేల మంది
ఈ వార్తాకథనం ఏంటి
వారం రోజులుగా ఫ్రాన్స్, స్పెయిన్ సరిహద్దులోని అటవీ ప్రాంతాలను వణికించిన కార్చిచ్చు (France Wildfire) క్రమంగా అదుపులోకి వస్తోంది. రెండు దేశాల అధికారులను తీవ్ర ఆందోళనకు గురిచేసిన ఈ అగ్నిప్రమాదం తీవ్రత తగ్గుముఖం పట్టడంతో ప్రజలకు ఊరట లభిస్తోంది. పరిస్థితి మెరుగుపడుతున్న నేపథ్యంలో, మంటల ముప్పు కారణంగా సురక్షిత ప్రాంతాలకు తరలించిన వారిలో 84వేల మందికి తిరిగి తమ ఇళ్లకు వెళ్లేందుకు ఫ్రాన్స్ ప్రభుత్వం అనుమతి ఇచ్చింది. గత శుక్రవారం ప్రారంభమైన ఈ కార్చిచ్చు కారణంగా సుమారు 42వేల హెక్టార్ల అటవీ ప్రాంతం అగ్నికి ఆహుతైంది. ఈ విస్తీర్ణం ఫ్రాన్స్ రాజధాని పారిస్ నగర వైశాల్యానికి నాలుగు రెట్లు ఎక్కువగా ఉండటం పరిస్థితి తీవ్రతను సూచిస్తోంది.
వివరాలు
సహాయక చర్యల్లో 2,200 మంది అగ్నిమాపక సిబ్బంది, 20 అగ్నిమాపక విమానాలు
మంటల ప్రమాదం దృష్ట్యా గత వారం రోజుల్లో దాదాపు రెండు లక్షల మందిని అధికారులు సురక్షిత ప్రాంతాలకు తరలించారు.
ప్రస్తుతం వాతావరణ పరిస్థితులు అనుకూలంగా మారడంతో అగ్నిమాపక సిబ్బందికి మంటలను అదుపు చేయడం సులభమవుతోంది.
గాలిలో తేమశాతం పెరగడం, ఉష్ణోగ్రతలు తగ్గడం, కొన్ని ప్రాంతాల్లో తేలికపాటి వర్షాలు కురవడం వల్ల మంటలు త్వరలోనే పూర్తిగా అదుపులోకి వస్తాయని అధికారులు ఆశాభావం వ్యక్తం చేస్తున్నారు.
గత రాత్రి మంటలు కొత్త ప్రాంతాలకు వ్యాపించలేదని ఫ్రాన్స్ ప్రభుత్వం వెల్లడించింది.
అయితే ప్రమాదం పూర్తిగా తొలగిపోలేదని పేర్కొంటూ అప్రమత్తత కొనసాగిస్తున్నట్లు స్పష్టం చేసింది.
ప్రస్తుతం 2,200 మంది అగ్నిమాపక సిబ్బంది, 20 అగ్నిమాపక విమానాలు సహాయక చర్యల్లో పాల్గొంటున్నాయి.
వివరాలు
బోర్డో ప్రాంతంలో వర్షం
కార్చిచ్చు తీవ్రంగా ప్రభావం చూపిన బోర్డో ప్రాంతంలో గురువారం తెల్లవారుజామున వర్షం కురవడంతో పరిస్థితులు మరింత అనుకూలంగా మారాయి.
మంటలు పూర్తిగా అదుపులోకి వచ్చిన వెంటనే తాత్కాలిక ఆశ్రయ కేంద్రాల్లో ఉన్న మిగిలిన వారిని కూడా దశలవారీగా వారి స్వగృహాలకు పంపేందుకు అధికారులు ఏర్పాట్లు చేస్తున్నట్లు వెల్లడించారు.