Liechtenstein: సొంత కరెన్సీ, ఎయిర్‌పోర్ట్‌ లేని దేశం.. కానీ ప్రపంచంలోనే అత్యంత సంపన్నం!
ఈ వార్తాకథనం ఏంటి
ఒక దేశ శక్తిని సాధారణంగా సైనిక బలం, ఆర్థిక స్వాతంత్య్రం వంటి అంశాల ఆధారంగా కొలుస్తారు. అయితే ఈ దేశం మాత్రం ఆ రెండింటిలోనూ పెద్దగా ఏమీ లేకపోయినా, ప్రపంచంలోని అత్యంత సంపన్న దేశాల జాబితాలో అగ్రస్థానంలో నిలుస్తోంది. సొంత కరెన్సీ లేదు, అంతర్జాతీయ విమానాశ్రయం లేదు, అయినా కూడా ఆర్థికంగా అత్యంత బలమైన దేశంగా పేరు తెచ్చుకుంది. అంటే పరిమిత వనరుల్నే సద్వినియోగం చేస్తే, ఆవిష్కరణలతో ముందుకెళ్తే, సంపదతో పాటు స్థిరత్వం కూడా సాధ్యమని ఈ దేశం సాక్ష్యంగా నిలుస్తోంది.
Details
ఆర్థికంగా మరింత బలపడింది
ఆ దేశం యూరప్‌లోని చిన్న దేశం లీక్టెన్‌స్టీన్‌ (Liechtenstein). ప్రపంచంలో అత్యంత స్థిరమైన, ధనిక దేశాల్లో ఇది ఒకటి. ఆశ్చర్యమేమిటంటే ఈ దేశం తన సొంత కరెన్సీని ముద్రించదు. అంతర్జాతీయ విమానాశ్రయం కూడా లేదు. అయినా దాని ఆర్థిక స్థిరత్వం ప్రపంచం మొత్తాన్ని ఆకట్టుకుంటోంది. అందుకు కారణం దాని ప్రత్యేక ఆర్థిక వ్యూహం. ఇతర దేశాలు తమ సార్వభౌమాధికార చిహ్నాలుగా కరెన్సీ, భాష, జాతీయ విమానయాన సంస్థల్ని కాపాడుకుంటుంటే, లీక్టెన్‌స్టీన్‌ మాత్రం విరుద్ధ దిశలో నడిచింది. అప్పుతో కూడిన పరిస్థితుల్లో కూడా స్మార్ట్ నిర్ణయం తీసుకుంటూ, స్విస్‌ ఫ్రాంక్‌ (Swiss Franc)ను అధికారిక కరెన్సీగా స్వీకరించింది. దాంతో కరెన్సీ నిర్వహణ బాధ్యతలు, కేంద్ర బ్యాంకు వ్యయాలు అన్నీ తప్పించుకుని ఆర్థికంగా మరింత బలపడింది.
Details
బిలియన్ల డాలర్ల ఆదా
అదేవిధంగా స్విట్జర్లాండ్‌, ఆస్ట్రియా రవాణా నెట్‌వర్క్‌లను వాడుకోవడం ద్వారా స్వంత విమానాశ్రయం నిర్మాణ ఖర్చు వంటి బిలియన్ల డాలర్లను ఆదా చేసుకుంది. ఈ విధంగా మౌలిక వసతులపై భారీగా ఖర్చు పెట్టకుండా స్థిరమైన అభివృద్ధి సాధించింది. లీక్టెన్‌స్టీన్‌ బలం మాత్రం పరిశ్రమలు, సాంకేతిక ఆవిష్కరణల్లో ఉంది. దంతవైద్యంలో వాడే మైక్రో డ్రిల్ల్స్‌ నుంచి ఏరోస్పేస్‌, ఆటోమొబైల్‌ పరికరాల వరకు అన్నింటినీ ఉత్పత్తి చేస్తూ ఈ దేశం ఇంజినీరింగ్‌ రంగంలో అగ్రగామిగా నిలిచింది. ప్రపంచ ప్రఖ్యాత నిర్మాణ పరికరాల సంస్థ 'హిల్టీ (Hilti)' కూడా ఇక్కడే ఉంది — ఇది లీక్టెన్‌స్టీన్‌ పారిశ్రామిక శక్తికి ప్రతీకగా భావిస్తారు.
Details
ప్రభుత్వం ఆదాయం ఎప్పుడూ మిగులుగానే
ఇక్కడ కంపెనీల సంఖ్య ప్రజల కంటే ఎక్కువ! అంటే ఇక్కడ ఎక్కువగా రిజిస్టర్డ్‌ సంస్థలే ఉంటాయి. ఫలితంగా నిరుద్యోగం అనే మాటే ఉండదు. పౌరుల ఆదాయాలు నిరంతరం పెరుగుతూనే ఉంటాయి. అందువల్ల పేదరికం అనే భావనే ఇక్కడ దూరం. మొత్తం జనాభా కేవలం 40 వేల మంది మాత్రమే, అయినా జీవన ప్రమాణాలు ప్రపంచంలోనే అగ్రస్థాయిలో ఉంటాయి. ఇంకో విశేషం ఇది రుణరహిత దేశం. ప్రభుత్వ ఆదాయం ఎల్లప్పుడూ మిగుల్తూనే ఉంటుంది.
Details
భద్రత, విశ్వాసంతో జీవిస్తారు
నేరాల సంఖ్య చాలా తక్కువగా ఉండటంతో జైళ్లలో కూడా కొద్దిమంది ఖైదీలే ఉంటారు. ఇక్కడ ప్రజలు రాత్రిళ్లు తమ ఇళ్లకు తాళాలు వేయరట. అంత భద్రతగా, విశ్వాసంతో జీవిస్తారు. ఈ చిన్న దేశం చూపిస్తున్న సందేశం స్పష్టంగా ఉంది. సంపద అనేది కేవలం వనరుల పరిమాణంలో కాకుండా, వాటిని సద్వినియోగం చేసే తెలివితేటల్లో ఉందని, భద్రత, శాంతి, జీవన ప్రమాణాలు — ఇవన్నీ కలిపి లీక్టెన్‌స్టీన్‌ను నిజమైన సంపన్న దేశంగా నిలబెట్టాయి.