Dana White: వైట్‌హౌస్‌లో కీలక పదవి.. యూఎఫ్‌సీ చీఫ్ డేనా వైట్‌కు ట్రంప్ ఆఫర్!
ఈ వార్తాకథనం ఏంటి
అమెరికా రాజకీయాల్లో ఆసక్తికర పరిణామం చోటుచేసుకుంది. అధ్యక్షుడు డొనాల్డ్ ట్రంప్.. మిక్స్‌డ్ మార్షల్ ఆర్ట్స్ (MMA) సంస్థ అల్టిమేట్ ఫైటింగ్ ఛాంపియన్‌షిప్ (UFC) చీఫ్ డేనా వైట్‌కు కీలక పదవిని ఆఫర్ చేశారు. వైట్‌హౌస్ ప్రెస్ సెక్రటరీగా బాధ్యతలు చేపట్టాలని స్వయంగా ఆహ్వానించారు. ట్రంప్ చేసిన ఈ అనూహ్య ప్రతిపాదన అమెరికా రాజకీయ, క్రీడా వర్గాల్లో చర్చనీయాంశంగా మారింది.
వివరాలు
ట్రూత్ సోషల్‌లో ట్రంప్ ప్రకటన
శనివారం తన అధికారిక సోషల్ మీడియా వేదిక 'ట్రూత్ సోషల్'లో ట్రంప్ ఈ విషయాన్ని వెల్లడించారు.
"గొప్ప వ్యక్తి, ఒక వయొలెంట్ ఫైటర్, యోధుడు అయిన డేనా వైట్‌కు అమెరికా ప్రెస్ సెక్రటరీ ఉద్యోగాన్ని ఆఫర్ చేసినట్లు ప్రకటించడానికి సంతోషిస్తున్నాను.
డేనా.. దయచేసి ఈ ఉద్యోగాన్ని స్వీకరించు!" అని తన పోస్ట్‌లో పేర్కొన్నారు.
వైట్‌హౌస్ కూడా తన అధికారిక ఖాతాలో ట్రంప్ పోస్ట్‌ను షేర్ చేయడంతో ఈ ప్రతిపాదనకు మరింత ప్రాధాన్యం ఏర్పడింది.
వివరాలు
'తదుపరి అధ్యాయానికి సిద్ధం' అంటూ వైట్ పోస్ట్
ట్రంప్ ఆఫర్‌పై డేనా వైట్ నేరుగా స్పందించలేదు. అయితే, వైట్‌హౌస్ ప్రెస్ బ్రీఫింగ్ రూమ్‌లోని పోడియం వెనుక తాను నిలబడి ఉన్న ఫొటోను సోషల్ మీడియాలో షేర్ చేశారు.
దానికి "తదుపరి అధ్యాయానికి సిద్ధం" అనే క్యాప్షన్ జోడించారు. దీంతో ఆయన ఈ పదవిని స్వీకరించే అవకాశాలున్నాయనే ఊహాగానాలు మొదలయ్యాయి.
కేటీ జకారియా ఆ పదవి నుంచి తప్పుకోవడంతో అక్టోబర్ 16 నుంచి వైట్‌హౌస్ ప్రెస్ సెక్రటరీ పోస్టు ఖాళీగా ఉంది.
వివరాలు
ట్రంప్‌తో డేనా వైట్‌కు సుదీర్ఘ స్నేహం
57 ఏళ్ల డేనా వైట్, ట్రంప్ చాలా కాలంగా సన్నిహిత మిత్రులు. తన 'మాగా' (MAGA) బ్రాండ్ రాజకీయాలను ప్రపంచవ్యాప్తంగా ప్రజాదరణ పొందిన యూఎఫ్‌సీతో అనుసంధానించేందుకు ట్రంప్ తరచూ ప్రయత్నిస్తుంటారు.
2024లో ట్రంప్ రెండోసారి అధ్యక్షుడిగా ఎన్నికైన తర్వాత నిర్వహించిన విజయ ప్రసంగంలో డేనా వైట్ కూడా ఆయన పక్కనే ఉన్నారు.
అంతకుముందు ట్రంప్ 80వ పుట్టినరోజు సందర్భంగా వైట్‌హౌస్ సౌత్ లాన్‌లో యూఎఫ్‌సీ కేజ్ ఫైట్‌ను నిర్వహించడం వారి స్నేహానికి మరో ఉదాహరణగా నిలిచింది.
వివరాలు
వైట్‌హౌస్‌కు ఆరుగురు యూఎఫ్‌సీ ఫైటర్లు?
డేనా వైట్‌కు ప్రెస్ సెక్రటరీ పదవిని ప్రతిపాదించడంతో పాటు, ఆరుగురు యూఎఫ్‌సీ ఫైటర్లను వైట్‌హౌస్‌కు సలహాదారులుగా తీసుకురావాలని ట్రంప్ పేర్కొన్నారు.
వారిలో కొందరు విదేశీయులైనా అభ్యంతరం లేదని తెలిపారు. ఈ ఆరుగురిలో ఇద్దరు రష్యా, ఒకరు బ్రెజిల్‌కు చెందిన ఫైటర్లు ఉన్నారు.
ట్రంప్ తిరిగి ఎన్నికైన తర్వాత డేనా వైట్ టెక్ దిగ్గజం మెటా బోర్డులో చేరడం కూడా అప్పట్లో చర్చనీయాంశంగా మారింది.