Israel: ఇజ్రాయెల్‌ రాజకీయాల్లో కీలక మలుపు.. నెతన్యాహుకు షాక్‌!
ఈ వార్తాకథనం ఏంటి
ఇజ్రాయెల్‌ రాజకీయాల్లో కీలక పరిణామం చోటుచేసుకుంది. అధికారాన్ని నిలబెట్టుకోవాలని ప్రయత్నిస్తున్న ప్రధానమంత్రి బెంజమిన్‌ నెతన్యాహుకు ఎదురుదెబ్బ తగిలింది. ప్రతిపక్ష నేత, మాజీ ఆర్మీ చీఫ్‌ గాడీ ఐసెన్‌కోట్‌ (Gadi Eisenkot)కు ప్రభుత్వాన్ని ఏర్పాటు చేసే అవకాశం లభించింది. ఇజ్రాయెల్‌ అధ్యక్షుడు ఐజాక్‌ హెర్జోగ్‌.. ప్రభుత్వ ఏర్పాటుకు ఐసెన్‌కోట్‌ను ఆహ్వానించారు.
వివరాలు
నెతన్యాహు, ఐసెన్‌కోట్‌లతో విడివిడిగా భేటీ
ఈ నిర్ణయాన్ని ప్రకటించడానికి ముందు అధ్యక్షుడు ఐజాక్‌ హెర్జోగ్‌.. నెతన్యాహు, ఐసెన్‌కోట్‌లతో విడివిడిగా సమావేశమయ్యారు.
తన నిర్ణయాన్ని వారికి తెలియజేశారు. ఆదివారం సాయంత్రం 5 గంటలకు (స్థానిక కాలమానం ప్రకారం) అధ్యక్ష భవనంలో జరిగే కార్యక్రమంలో ఐసెన్‌కోట్‌కు ప్రభుత్వ ఏర్పాటుకు సంబంధించిన అధికారిక ఆహ్వానాన్ని అందజేయనున్నారు.
ప్రభుత్వ ఏర్పాటుకు 28 రోజుల గడువు
అధ్యక్షుడి నుంచి అధికారిక ఆహ్వానం అందుకున్న తర్వాత ప్రభుత్వ సంకీర్ణాన్ని ఏర్పాటు చేసేందుకు ఐసెన్‌కోట్‌కు 28 రోజుల సమయం ఉంటుంది.
ఈ గడువులోగా సంకీర్ణాన్ని ఏర్పాటు చేయలేకపోతే.. మరో 14 రోజుల పాటు సమయాన్ని పొడిగించే అవకాశం కూడా ఉంది.
వివరాలు
67 మంది సభ్యుల సిఫార్సు.. నెతన్యాహుకు 46 మంది మద్దతు
ఇటీవల జరిగిన ఎన్నికల్లో ఏ కూటమికీ ప్రభుత్వాన్ని ఏర్పాటు చేసేందుకు అవసరమైన స్పష్టమైన మెజారిటీ లభించలేదు.
దీంతో కొన్ని రోజులుగా ఇజ్రాయెల్‌లో ప్రభుత్వ ఏర్పాటుపై రాజకీయ గందరగోళం నెలకొంది.
ఈ నేపథ్యంలో అధ్యక్షుడిని సంప్రదించిన పార్లమెంటరీ వర్గాల్లో 67 మంది సభ్యులు ఐసెన్‌కోట్‌కు ప్రభుత్వ ఏర్పాటుకు అవకాశం ఇవ్వాలని సిఫార్సు చేశారు.
మరోవైపు బెంజమిన్‌ నెతన్యాహుకు 46 మంది సభ్యులు మద్దతు తెలిపారు. ఈ పరిణామాల నేపథ్యంలో అధ్యక్షుడు ఐసెన్‌కోట్‌ను ప్రభుత్వ ఏర్పాటుకు ఆహ్వానించడం ఇజ్రాయెల్‌ రాజకీయాల్లో ప్రాధాన్యం సంతరించుకుంది.