Donald Trump: ట్రంప్ సర్కార్ దూకుడు: స్టీల్,ఫార్మాపై భారీ టారిఫ్లు
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ వాణిజ్య విధానాల్లో మరో కీలక నిర్ణయం తీసుకున్నారు. జాతీయ భద్రతను కారణంగా చూపుతూ స్టీల్, అల్యూమినియం, కాపర్ వంటి లోహాలతో పాటు పేటెంట్ ఉన్న ఔషధాల దిగుమతులపై అధిక సుంకాలు విధించాలని ఆదేశాలు జారీ చేశారు. ఈ చర్యల ప్రధాన ఉద్దేశ్యం దేశీయ పరిశ్రమలకు రక్షణ కల్పించడం అని శ్వేతసౌధం వెల్లడించింది. కొత్త మార్గదర్శకాల ప్రకారం విదేశాల నుంచి వచ్చే పేటెంట్ ఔషధాలు,వాటి తయారీలో ఉపయోగించే ముడి పదార్థాలపై (API) గరిష్టంగా 100 శాతం వరకు సుంకం విధించనున్నారు. అయితే తమ ఉత్పత్తి యూనిట్లను అమెరికాకు మార్చే కంపెనీలకు ప్రత్యేక సడలింపులు కల్పించారు. అలాంటి సంస్థలకు నాలుగేళ్ల పాటు కేవలం 20 శాతం సుంకమే వర్తిస్తుంది.
వివరాలు
ఫార్మా సుంకాలు 2026 జూలై 31 నుంచి దశలవారీగా అమల్లోకి
అదే సమయంలో యూరోపియన్ యూనియన్, జపాన్, దక్షిణ కొరియా వంటి మిత్రదేశాలపై 15 శాతం టారిఫ్ అమలు చేయనున్నారు. ప్రస్తుతం జనరిక్ ఔషధాలను ఈ సుంకాల నుంచి మినహాయించారు. ఈ ఫార్మా సుంకాలు 2026 జూలై 31 నుంచి దశలవారీగా అమల్లోకి రానున్నాయి. ఇక లోహాల దిగుమతుల విషయంలో కూడా ప్రభుత్వం కఠిన వైఖరిని అవలంబించింది. ప్రాథమిక ఉక్కు, అల్యూమినియం ఉత్పత్తులపై 50 శాతం సుంకం విధించగా,వాటి ఆధారంగా తయారయ్యే ఇతర ఉత్పత్తులపై 25 శాతం సుంకం అమలు చేయనున్నారు. గతంలో కొందరు ఎగుమతిదారులు తప్పుడు వివరాలతో తక్కువ సుంకాలు చెల్లించారని గుర్తించిన అధికారులు, ఇకపై నిజమైన లావాదేవీ విలువ ఆధారంగానే సుంకాలు వసూలు చేస్తామని స్పష్టం చేశారు.
వివరాలు
లోహాలపై సుంకాలు ఏప్రిల్ 6 నుంచే అమల్లోకి..
ఈ లోహాలపై సుంకాలు ఏప్రిల్ 6 నుంచే అమల్లోకి వస్తాయని తెలిపారు. ఈ నిర్ణయాల ఫలితంగా దేశీయంగా ఉక్కు, అల్యూమినియం ఉత్పత్తి సామర్థ్యం 80 శాతానికి పెరుగుతుందని ప్రభుత్వం అంచనా వేస్తోంది. అయితే ఈ సుంకాల పెంపు వినియోగదారులపై పెద్దగా భారం మోపదని ఒక ఉన్నతాధికారి పేర్కొన్నారు. మొత్తంగా కీలక రంగాల్లో విదేశీ ఆధారాన్ని తగ్గించి, అమెరికాలోనే తయారీ కార్యకలాపాలను పెంచే దిశగా ట్రంప్ ప్రభుత్వం ఈ నిర్ణయాలు తీసుకుంది.