Trump-Mexico: మదురో ఆపరేషన్ తర్వాత, మెక్సికోపై దాడి చేయబోతున్నట్లు ట్రంప్ ప్రకటన
ఈ వార్తాకథనం ఏంటి
ట్రంప్ అన్నట్టుగానే మరొక దేశంపై సైనిక దాడి ప్రారంభించారు. మెక్సికోలో భూ ఆపరేషన్ను ప్రారంభిస్తున్నట్లు సోషల్ మీడియా ప్లాట్ఫారం ట్రూత్ సోషల్లో ఆయన వెల్లడించారు. "మాదక ద్రవ్యాల అక్రమ రవాణాపై భూభాగంలో ఆపరేషన్ ప్రారంభిస్తున్నాం. మెక్సికోలో మాదక ద్రవ్యాల అక్రమ రవాణాదారులు దేశాన్ని పాలిస్తున్నారు. ఆ పరిస్థితి చాలా విచారకరంగా ఉంది. వీరి కారణంగా అమెరికాలో 3 లక్షల మందికి పైగా ప్రాణాలు కోల్పోయారు" అని సోషల్ మీడియాలో రాసుకొచ్చారు.
వివరాలు
డ్రగ్స్ కార్టెళ్లపై భూభాగ దాడులు త్వరలో ప్రారంభిస్తాం: ట్రంప్
అంతకముందు గురువారం ఫాక్స్ న్యూస్ తో ఇచ్చిన ఇంటర్వ్యూలో ట్రంప్ మాట్లాడుతూ, సముద్ర మార్గాల్లో మాదక ద్రవ్యాల అక్రమ రవాణాపై అమెరికా పెద్ద విజయం సాధించినట్లు తెలిపారు. "సముద్ర మార్గంలో మాదక ద్రవ్యాల దాదాపు 97 శాతం నియంత్రణలోకి తీసుకున్నాం. ఇప్పుడు భూభాగంపై దృష్టి సారించబోతున్నాం. డ్రగ్స్ కార్టెళ్లపై భూభాగ దాడులు త్వరలో ప్రారంభిస్తాం" అని చెప్పారు. "మెక్సికోను మాదక ద్రవ్యాల అక్రమ రవాణాదారులు పాలిస్తున్నారు. ఆ దేశ పరిస్థితి బాధాకరంగా ఉంది. అక్కడ ఏమి జరుగుతుందో అర్థం కావడం లేదు" అని వ్యాఖ్యానించారు. అందుకుముందు, మెక్సికో అధ్యక్షురాలు క్లాడియా షీన్బామ్ అమెరికా సైనిక చర్యను ఖండించారు.
వివరాలు
మెక్సికోపై దాడి
"మెక్సికో భద్రతా విషయంలో అమెరికాకు సహకరిస్తాం. కానీ మాదక ద్రవ్యాల అక్రమ రవాణా, వ్యవస్థీకృత నేరాల పట్ల పోరాటంలో అంతర్జాతీయ సహకారం పరస్పర గౌరవం,సమానత్వంపై ఆధారపడి ఉండాలి. మెక్సికోను ప్రజలు పాలిస్తున్నారు. ఎవరూ ఊహించిన విధంగా దేశాన్ని స్వాధీనం చేసుకోలేరు. ఎటువంటి విదేశీ సైనిక జోక్యాన్ని కూడా మేము అంగీకరించము" అని షీన్బామ్ పేర్కొన్నారు. గత శనివారం, వెనిజులా అధ్యక్షుడు నికోలస్ మదురోను అమెరికా సైన్యం కిడ్నాప్ చేసి తీసుకువచ్చింది. అప్పటినుండి, త్వరలో కొలంబియా, మెక్సికో, క్యూబా వంటి దేశాలపై సైనిక చర్యలు జరుగబోతున్నట్లు ప్రకటించారు. తాజాగా మెక్సికోపై దాడి చేస్తున్నట్లు వెల్లడించారు.