AI executives: 'చంపేస్తాం' అంటూ బెదిరింపులు.. ప్రపంచ అగ్ర AI సీఈవోలు ప్రాణభయంతో ఎందుకు ఉన్నారు?
ఈ వార్తాకథనం ఏంటి
కృత్రిమ మేధస్సు (AI) వేగంగా విస్తరిస్తున్న నేపథ్యంలో ప్రపంచంలోని ప్రముఖ AI కంపెనీల అధినేతలు, కీలక అధికారులు తీవ్ర భద్రతా సవాళ్లను ఎదుర్కొంటున్నారు. AI కారణంగా భవిష్యత్తులో ఉద్యోగాలు కోల్పోతామనే భయం ప్రజల్లో పెరుగుతుండటంతో, ఆగ్రహం నేరుగా ఈ సంస్థల నాయకులపై వ్యక్తమవుతోంది. దీంతో పలు కంపెనీలు తమ సీఈవోలు, ఉద్యోగులకు ప్రత్యేక భద్రతా ఏర్పాట్లు చేపడుతున్నాయి. ది వాల్ స్ట్రీట్ జర్నల్ వెల్లడించిన వివరాల ప్రకారం, ఓపెన్ఏఐ (OpenAI), ఆంత్రోపిక్ (Anthropic) వంటి ప్రముఖ AI సంస్థల ఉన్నతాధికారులకు గత కొన్ని నెలలుగా ప్రాణహాని బెదిరింపులు పెరిగాయి. పోలీసు రికార్డులు, కంపెనీల వివరాలు, భద్రతా నిపుణుల సమాచారం ఆధారంగా ఈ నివేదిక వెలువడింది.
వివరాలు
ఓపెన్ఏఐ సీఈవో శామ్ ఆల్ట్మన్ నివాసంపై ఫైర్బాంబ్ దాడి
ఈ ఏడాది ఏప్రిల్ 15న ఆంత్రోపిక్ కార్యాలయంలో ఓ వ్యక్తి ఉద్యోగిని వెంబడిస్తూ సెక్యూరిటీ గేటు దాటి లోపలికి ప్రవేశించినట్లు తెలుస్తోంది.
అనంతరం ఓ సీనియర్ అధికారికి సంబంధించిన పేరుతో ఉన్న కవరును సెక్యూరిటీ గార్డుకు చూపిస్తూ,"ఆ అధికారిని చంపేస్తారు.. వెంటనే ఎవరికైనా చెప్పాలి"అని హెచ్చరించాడు.
అదృష్టవశాత్తూ ఈ ఘటన ఎలాంటి హింసకు దారితీయలేదు.ఎవరినీ అరెస్ట్ కూడా చేయలేదు.
ఈ ఘటనకు కొద్ది రోజుల ముందే ఓపెన్ఏఐ సీఈవో శామ్ ఆల్ట్మన్ నివాసంపై ఫైర్బాంబ్ దాడికి యత్నించిన ఘటన చోటుచేసుకున్నట్లు సమాచారం.
టెక్సాస్కు చెందిన నిందితుడిపై హత్యాయత్నం,అగ్నిప్రమాదానికి యత్నించిన కేసులు నమోదు చేశారు.
అతని వద్ద AI కంపెనీల సీఈవోలు,పెట్టుబడిదారులను హత్య చేయాలని పిలుపునిచ్చిన మేనిఫెస్టోను పోలీసులు స్వాధీనం చేసుకున్నట్లు నివేదిక పేర్కొంది.
వివరాలు
జూన్లో మరో ఘటన
అయితే నిందితుడు తనపై వచ్చిన ఆరోపణలను ఖండించాడు.
ఆంత్రోపిక్ సంస్థకు సంబంధించిన మరికొన్ని ఘటనలు కూడా వెలుగులోకి వచ్చాయి.
నకిలీ పేరుతో ఉద్యోగానికి దరఖాస్తు చేసిన ఓ వ్యక్తి, తన పరిశోధనను కంపెనీ దొంగిలించిందని ఆరోపిస్తూ ఉద్యోగుల పిల్లలపై దాడి చేస్తానని బెదిరించినట్లు పోలీసులు తెలిపారు.
ఈ కేసును ఉగ్రవాద తరహా బెదిరింపుగా నమోదు చేసినప్పటికీ ఎలాంటి అరెస్టులు జరగలేదు.
అనంతరం తాను నిజంగా ఎవరినీ హాని చేయాలనే ఉద్దేశంతో అనలేదని ఆ వ్యక్తి చెప్పాడు.
జూన్లో మరో ఘటనలో ఒక వ్యక్తి కస్టమర్ సపోర్ట్ ద్వారా స్పందన రాకపోవడంతో, తన డబ్బు తిరిగి ఇవ్వకపోతే తుపాకీతో కంపెనీ కార్యాలయానికి వస్తానని సోషల్ మీడియాలో బెదిరింపులు చేసినట్లు వెల్లడైంది.
వివరాలు
ఫిబ్రవరి చివరి నుంచి మే వరకు ఏడు రెట్లు పెరిగిన బెదిరింపులు
భౌతిక బెదిరింపులతో పాటు ఆన్లైన్లో కూడా AI కంపెనీల అధికారులు, డేటా సెంటర్లను లక్ష్యంగా చేసుకుని వచ్చే బెదిరింపులు భారీగా పెరిగినట్లు సైబర్ థ్రెట్ ఇంటెలిజెన్స్ సంస్థ లైఫ్రాఫ్ట్ తెలిపింది.
ఫిబ్రవరి చివరి నుంచి మే వరకు ఇటువంటి బెదిరింపులు ఏడు రెట్లు పెరిగినట్లు సంస్థ గుర్తించింది.
ఈ పరిస్థితుల నేపథ్యంలో AI సంస్థలు తమ సీఈవోలు, ఉన్నతాధికారులకు భద్రతను మరింత కట్టుదిట్టం చేస్తున్నాయి.
నియంత్రణ సంస్థలకు సమర్పించిన నివేదికల ఆధారంగా, 2025లో అమెరికాలోని S&P 500 టెక్నాలజీ కంపెనీల్లో 38.1 శాతం సంస్థలు తమ అధికారుల భద్రత కోసం ప్రత్యేకంగా ఖర్చు చేస్తున్నట్లు వెల్లడైంది. 2021లో ఈ సంఖ్య 26.8 శాతంగా ఉంది.
వివరాలు
4 మిలియన్ డాలర్ల వరకు భద్రతా వ్యయాన్ని పెంచిన సేల్స్ఫోర్స్
పలాంటిర్ టెక్నాలజీస్ తన అధికారుల భద్రత కోసం చేసే వ్యయాన్ని దాదాపు 150 శాతం పెంచి సుమారు 3 మిలియన్ డాలర్లకు చేర్చగా, ఒరాకిల్ 85.5 శాతం పెంచి 5.6 మిలియన్ డాలర్లు ఖర్చు చేసింది.
సేల్స్ఫోర్స్ కూడా దాదాపు 4 మిలియన్ డాలర్ల వరకు భద్రతా వ్యయాన్ని పెంచినట్లు వెల్లడైంది.
ఆంత్రోపిక్ సంస్థ 2024 నుంచే 24 గంటల భద్రతా వ్యవస్థను అమలు చేస్తున్నట్లు, కొత్తగా ఎదురయ్యే ముప్పులపై ఉద్యోగులకు ఎప్పటికప్పుడు సమాచారం అందిస్తున్నట్లు తెలిపింది.
వివరాలు
AI ప్రభావంపై ప్రజల్లో ఆందోళన
ఇదిలా ఉండగా, AI ప్రభావంపై ప్రజల్లో ఆందోళన మరింత పెరుగుతోంది.
మార్చిలో నిర్వహించిన ఓ సర్వేలో అమెరికన్లలో AIపై ఆందోళన వ్యక్తం చేసిన వారి సంఖ్య, ఆందోళన లేని వారికంటే నాలుగు రెట్లకు పైగా ఉందని తేలింది.
అలాగే 55 శాతం మంది AI వల్ల సమాజానికి మేలు కంటే నష్టమే ఎక్కువ జరుగుతోందని అభిప్రాయపడ్డారు.
ఈ ఏడాది జరిగిన AI-ఉద్యోగాల సదస్సులో పలాంటిర్ సీఈవో అలెక్స్ కార్ప్ మాట్లాడుతూ, "మీ ఉద్యోగం ఇక ఉండదు అని చెబితే ప్రజలు తీవ్ర ఆగ్రహంతో స్పందిస్తారు. అదే ఇప్పుడు కనిపిస్తోంది" అని వ్యాఖ్యానించారు.