Trump: ట్రంప్ నివాసం వద్ద సెక్యూరిటీ వైఫల్యం.. ఆంక్షల వలయంలోకి దూసుకొచ్చిన ప్రైవేటు విమానం
ఈ వార్తాకథనం ఏంటి
అమెరికాలోని వైట్‌హౌస్‌ సమీపంలో ఇటీవల ఓ అనుమానితుడి కదలికలు కలకలం రేపిన సంగతి తెలిసిందే.
ఈ ఘటన అనంతరం అధ్యక్షుడు డొనాల్డ్‌ ట్రంప్ భద్రతా సిబ్బంది మరింత అప్రమత్తమయ్యారు.
అయితే, తాజాగా మరోసారి భద్రతా లోపం బయటపడింది. అమెరికా కాలమానం ప్రకారం, ఆదివారం ఫ్లోరిడాలోని ట్రంప్ నివాసం సమీపంలో అమలులో ఉన్న విమాన ప్రయాణ ఆంక్షలు ఉల్లంఘించబడ్డాయి.
ఈ మేరకు ఓ పౌర విమానం ఆ భవనం దిశగా వెళ్తుండగా, అమెరికా వైమానిక దళం అప్రమత్తమై దానిని అడ్డుకుంది.
వివరాలు
ట్రంప్ బీచ్‌లో గోల్ఫ్ ఆడుతున్న సమయంలో..
ఈ ఘటన ట్రంప్ వెస్ట్‌ పామ్ బీచ్‌లో గోల్ఫ్ ఆడుతున్న సమయంలో జరిగింది.
నార్త్ అమెరికన్ ఏరోస్పేస్ డిఫెన్స్ కమాండ్ ప్రకటన ప్రకారం, ఆంక్షలు అమలులో ఉన్న ప్రదేశంలోకి ప్రైవేట్ విమానం ప్రవేశించగా, ఎఫ్-16 జెట్‌లు దానిని అడ్డుకున్నాయి.
అంతేకాదు, శనివారం కూడా ఇలాంటి మరో ఘటన చోటుచేసుకుంది, ఆ సమయంలోనూ జెట్‌ ఫైటర్లు ఓ పౌర విమానాన్ని నిలువరించాయి.
ఈ తరచు జరుగుతున్న ఘటనల నేపథ్యంలో, ప్రైవేట్ విమానాల పైలట్లు భద్రతా నిబంధనలను తక్కువగా తీసుకుంటున్నారనే విమర్శలు వ్యక్తమవుతున్నాయి.
వివరాలు
వైట్‌హౌస్‌ వద్ద ఉద్రిక్తత
ఇక వైట్‌హౌస్‌ సమీపంలో అనుమానాస్పద వ్యక్తి సంచరించాడన్న సమాచారం స్థానిక పోలీసుల ద్వారా సీక్రెట్ సర్వీస్‌కు చేరింది.
అప్రమత్తమైన అధికారులు, అధ్యక్ష భవనానికి సమీపంలో నిలిపివున్న ఓ వాహనాన్ని గుర్తించారు.
అలాగే, ఓ వ్యక్తి అక్కడ నడుచుకుంటూ వెళ్తుండటం గమనించి, అతడిని అడ్డుకునేందుకు ప్రయత్నించారు.
అయితే, అధికారులను చూశాక ఆ వ్యక్తి తన వద్ద ఉన్న తుపాకీని బయటకు తీశాడు. అతడిని అదుపులోకి తీసుకునేందుకు ప్రయత్నించగా, అతను ప్రతిఘటించాడు.
కాల్పులకు యత్నించిన అతడిపై భద్రతా సిబ్బంది కూడా ఎదురు కాల్పులు జరిపారు.
ఈ ఘటన సమయంలో ట్రంప్ ఫ్లోరిడాలో ఉన్నారు. గాయపడిన అనుమానితుడిని ఆసుపత్రికి తరలించి చికిత్స అందిస్తున్నారు. ఈ కేసుపై దర్యాప్తు కొనసాగుతోంది.