Bangladesh Protest: బంగ్లాదేశ్‌లో మళ్లీ భారత్‌ వ్యతిరేక నినాదాలు.. ఢాకాలో భారీ ర్యాలీ
ఈ వార్తాకథనం ఏంటి
బంగ్లాదేశ్‌లో మరోసారి భారత్‌కు వ్యతిరేకంగా నినాదాలు వినిపించాయి. దేశంలో నిత్యావసర వస్తువుల ధరలు పెరగడం, విద్యుత్‌ కోతలు, ఇంధనం, గ్యాస్‌ కొరతతో ప్రజలు తీవ్ర ఇబ్బందులు ఎదుర్కొంటున్నారు. ఈ సమస్యలపై ప్రధాని తారిఖ్‌ రెహ్మాన్‌ నేతృత్వంలోని ప్రభుత్వానికి వ్యతిరేకంగా నిరసనలు వెల్లువెత్తాయి. హోం, ఇంధన శాఖల మంత్రులు రాజీనామా చేయాలని రాజకీయ నేతలు డిమాండ్ చేశారు. ఈ క్రమంలో నేషనల్‌ సిటిజన్‌ పార్టీ (ఎన్‌సీపీ) నిర్వహించిన భారీ ర్యాలీలో భారత్‌ వ్యతిరేక నినాదాలు మార్మోగాయి. ఢాకాలోని నేషనల్‌ మ్యూజియం ఎదుట శుక్రవారం ఈ ర్యాలీ జరిగింది. ఎన్‌సీపీ కన్వీనర్‌ నహీద్‌ ఇస్లాం నేతృత్వంలో నిర్వహించిన ఈ కార్యక్రమానికి వేలాది మంది హాజరయ్యారు.
వివరాలు
ఎలాంటి ఆధారాలూ చూపలేదు
'ఢిల్లీ కాదు.. ఢాకా' అంటూ పార్టీ నేతలు నినాదాలు చేయగా.. సభకు వచ్చినవారు 'ఢాకా.. ఢాకా' అంటూ బదులిచ్చినట్లు సామాజిక మాధ్యమాల్లో వైరల్‌ అయిన వీడియోలు చూపించాయి.
2024లో షేక్‌ హసీనా ప్రభుత్వాన్ని గద్దె దించేందుకు జరిగిన విద్యార్థుల ఉద్యమం నుంచి ఎన్‌సీపీ ఆవిర్భవించింది.
ర్యాలీలో ప్రసంగించిన నహీద్‌ ఇస్లాం భారత్‌పై పలు ఆరోపణలు చేశారు. బంగ్లాదేశ్‌కు వ్యతిరేకంగా భారత్‌ కుట్రలు చేస్తోందని, సరిహద్దుల్లో హత్యలు జరుగుతున్నాయని ఆరోపించారు.
అసోం, పశ్చిమ బెంగాల్‌లో ముస్లింలపై వేధింపులు కొనసాగుతున్నాయని, ఢిల్లీలో మసీదులను కూల్చేందుకు ప్రయత్నాలు జరుగుతున్నాయని పేర్కొన్నారు.
అయితే ఈ ఆరోపణలకు సంబంధించి ఆయన ఎలాంటి ఆధారాలూ చూపలేదని కథనం వెల్లడించింది.
వివరాలు
ఇంధన సంక్షోభంతో బంగ్లాదేశ్‌లో కష్టాలు
గంగా జలాల ఒప్పందాన్ని న్యాయంగా పునరుద్ధరించకపోతే మరోసారి ఆందోళనలు చేపడతామని నహీద్‌ ఇస్లాం హెచ్చరించారు.
భారత్‌, బంగ్లాదేశ్‌ మధ్య కుదిరిన 30 ఏళ్ల గంగా జలాల ఒప్పందం ఈ ఏడాది డిసెంబరుతో ముగియనుంది.
బంగ్లాదేశ్‌లో గత కొన్ని నెలలుగా ఇంధన సంక్షోభం మరింత తీవ్రంగా మారింది. మధ్యప్రాచ్యంలో చోటుచేసుకుంటున్న పరిణామాల కారణంగా ఇంధన సరఫరాకు అంతరాయాలు ఏర్పడ్డాయి.
ఆ దేశం తన చమురు అవసరాల్లో 90 శాతానికి పైగా, గ్యాస్‌ అవసరాల్లో 30 శాతం దిగుమతుల ద్వారానే సమకూర్చుకుంటోంది.
ఇంధన కొరతతో విద్యుత్‌ కోతలు పెరిగాయి. ఫలితంగా వస్త్ర పరిశ్రమల్లో ఉత్పత్తి కూడా దెబ్బతింటోంది.
మరోవైపు 2026లో ద్రవ్యోల్బణం సుమారు 8.5 శాతంగా ఉండటంతో సామాన్యులపై ధరల భారం పెరిగింది.
వివరాలు
మంత్రుల రాజీనామాకు ఎన్‌సీపీ డిమాండ్
గత ఏడాదితో పోలిస్తే అదనంగా 21 లక్షల మంది పేదరికంలోకి వెళ్లినట్లు ప్రపంచ బ్యాంకు నివేదిక వెల్లడించింది.
దేశంలో నెలకొన్న ఈ పరిస్థితులకు ప్రభుత్వమే బాధ్యత వహించాలని నహీద్‌ ఇస్లాం డిమాండ్ చేశారు.
హోం మంత్రి సలాహుద్దీన్‌ అహ్మద్‌, ఇంధన మంత్రి ఇక్బాల్‌ హసన్‌ మహమూద్‌ వెంటనే తమ పదవులకు రాజీనామా చేయాలని కోరారు.
వారు తప్పుకోకపోతే దేశవ్యాప్తంగా ఆందోళనలు చేపడతామని హెచ్చరించారు. అంతేకాకుండా ప్రధాని తారిఖ్‌ రెహ్మాన్‌ నివాసాన్ని ముట్టడిస్తామని ప్రకటించారు.
దేశంలో పెరుగుతున్న ధరలు, విద్యుత్‌ కోతలు, ఇంధన కొరత వంటి సమస్యలపై ప్రారంభమైన నిరసనల్లో భారత్‌ వ్యతిరేక నినాదాలు కూడా వినిపించడం చర్చనీయాంశమైంది.
ఇప్పటికే ఒడుదొడుకులకు లోనవుతున్న భారత్‌-బంగ్లాదేశ్‌ సంబంధాలపై ఈ పరిణామాలు మరోసారి చర్చకు దారితీశాయి.